ஏனென்றால் “அடிப்படை ஏஐ கண்டுபிடிப்புகள் பெரும்பாலும் பல்கலைக் கழகங்கள் மற்றும் தனியார் நிறுவன ஆய்வுகளின் ஆராய்ச்சியில் இருந்து உருவாகின்றன,” என்கிறார் பிந்த்ரா.

மேலும் இந்தியாவில் ஆராய்ச்சிக்கு ஆதரவளிக்கும் சூழல் குறைவாக உள்ளது. இந்தியாவின் பல்கலைக்கழகங்கள் மற்றும் தனியார் நிறுவனங்களில் இருந்து சில முன்னோடி தொழில்நுட்ப கண்டுபிடிப்புகள் மட்டுமே உருவாகியுள்ளன.

இந்தியாவின் பணப்பரிவர்த்தனை புரட்சியின் மிகப்பெரிய வெற்றி, அரசு, தொழில்துறை, கல்வி நிறுவனங்கள் ஆகியவை இணைந்து செயல்பட்டதால்தான் நடந்தது. அதே மாதிரியான கூட்டணி முறை, ஏஐ வளர்ச்சிக்கும் பயன்படுத்தப்பட வேண்டும் என்று குறிப்பிடுகிறார் பிந்த்ரா.

யுனிஃபைட் பேமென்ட் இன்டர்ஃபேஸ் (UPI) என்பது இந்தியாவில் ஒரு அரசு நிறுவனத்தால் உருவாக்கப்பட்ட டிஜிட்டல் பணப்பரிவர்த்தனை முறைமை.

இது, வெகு எளிதாக ஒரு பட்டனை அழுத்துவதன் மூலம் அல்லது QR குறியீட்டை ஸ்கேன் செய்வவதன் மூலம், மில்லியன் கணக்கான மக்களைப் பணப் பரிவர்த்தனை செய்ய அனுமதிக்கிறது.

பெங்களூருவின் 200 பில்லியன் டாலர் மதிப்புள்ள அவுட்சோர்சிங் தொழில், லட்சக்கணக்கான குறியீட்டாளர்கள் (coders) வேலை செய்கின்ற இடமாக உள்ளது. இது, இயல்பாகவே, இந்தியாவின் செயற்கை நுண்ணறிவுத் திட்டங்களை முன்னணி இடத்துக்குக் கொண்டு செல்ல வேண்டும்.

ஆனால், அங்கு செயல்படும் தகவல் தொழில்நுட்ப நிறுவனங்கள், இதுவரை தங்களின் கவனத்தை மலிவான சேவை அடிப்படையிலான வேலைகளில் இருந்து, நுகர்வோருக்கான அடிப்படை செயற்கை நுண்ணறிவு தொழில்நுட்பங்களை உருவாக்கும் திசைக்கு மாற்றிக் கொள்ளவில்லை.

“அந்த நிறுவனங்கள் விட்டுச்சென்ற அந்த மிகப்பெரிய இடைவெளியை, தொடக்கநிலை நிறுவனங்கள் நிரப்ப வேண்டியுள்ளது” என்கிறார் ராய்.

ஆனால் தொடக்கநிலை நிறுவனங்கள் மற்றும் அரசாங்கத் திட்டங்கள் இந்தப் பெரும் பொறுப்பை விரைவாக மேற்கொள்ள முடியுமா என்பதில் சந்தேகம் இருப்பதாகக் கூறும் அவர், “இந்த 10 மாத காலக்கெடு அமைச்சரால் அறிவிக்கப்பட்டதற்குக் காரணம், டீப்சீக் திடீரென வெளியானதற்கான உடனடி எதிர்வினையாக இருக்கலாம்” என்றும் கூறுகிறார்.

தொடர்ந்து பேசிய அவர், “குறைந்தபட்சம் இன்னும் சில ஆண்டுகளுக்கு டீப்சீக் போன்ற ஒன்றை இந்தியாவால் உருவாக்க முடியும் என நான் நினைக்கவில்லை” என்றும் தெரிவித்தார்.

இதே கருத்தைப் பலரும் பகிர்ந்து கொள்கின்றனர்.

இருப்பினும், டீப்சீக் போன்ற வெளிப்படையான மூல தளங்களைப் பயன்படுத்தி, செயலிகளை உருவாக்கி, அதை மேம்படுத்துவதன் மூலம், “நமது சொந்த ஏஐ முன்னேற்றத்தை விரைவுபடுத்த முடியும்,” என்று இந்தியாவின் முதல் ஏஐ தொடக்கநிலை நிறுவனங்களில் ஒன்றான க்ருட்ரிமின் நிறுவனர் பவிஷ் அகர்வால் சமீபத்தில் எக்ஸ் பக்கத்தில் பகிர்ந்துள்ளார்.

மேலும் ஒரு அடிப்படை மாதிரியை உருவாக்குவது மிக முக்கியமாக இருக்கும்.

இது ஏஐ துறையில் தன்னாட்சி பெறவும், பிறநாட்டு இறக்குமதிகளைச் சார்ந்திருப்பதைக் குறைக்கவும், தடைகள் போன்ற அபாயங்களைத் தவிர்க்கவும் உதவும் என்று நிபுணர்கள் கூறுகிறார்கள்.

அத்தகைய மாதிரிகளை இயக்க இந்தியா அதன் கணக்கீட்டு சக்தி அல்லது வன்பொருள் உள்கட்டமைப்பை அதிகரிக்க வேண்டும். இந்தச் செயல்முறை செமிகண்டக்டர்களை உற்பத்தி செய்வதை உள்ளடக்கியது. ஆனால் அந்தத் தொழில் இன்னும் நாட்டில் சரியாக வளர்ச்சி அடையவில்லை.

எனவே அமெரிக்கா, சீனாவுடனான இடைவெளியை இந்தியா குறைக்க வேண்டுமென்றால், இதுபோன்ற பல முக்கியக் கூறுகள் கவனிக்கப்பட வேண்டும்.

– இது, பிபிசிக்காக கலெக்டிவ் நியூஸ்ரூம் வெளியீடு