மசூதிக்கு அருகே ஆக்கிரமிப்புகள் இருப்பதாக ‘சேவ் இந்தியா பவுண்டேஷன்’ தாக்கல் செய்த மனுவின் அடிப்படையில் உயர் நீதிமன்றத்தின் இந்த உத்தரவு பிறப்பிக்கப்பட்டது.

உத்தரவின்படி, மசூதிக்கு அருகில் சுமார் 39 ஆயிரம் சதுர மீட்டர் பரப்பளவில் சட்டவிரோத ஆக்கிரமிப்பு இருந்தது.

இருப்பினும், மசூதி கமிட்டி அந்த நிலத்தின் மீது தனக்கு உரிமை இருப்பதாகக் கூறி வந்ததுடன், இந்த உத்தரவுக்கு எதிராக டெல்லி உயர் நீதிமன்றத்தில் ஒரு ரிட் மனுவைத் தாக்கல் செய்திருந்தது.

மசூதி கமிட்டியுடன் தொடர்புடைய ஜாவேத் கான் செவ்வாய்க்கிழமை மாலை பிபிசியிடம் கூறுகையில், “நிர்வாகம் தனக்குரியது என்று உரிமை கொண்டாடும் இடம் முன்னதாக ஒரு மயானமாக இருந்தது. நிலம் தொடர்பான ஆவணங்களை நீதிமன்றத்தில் சமர்ப்பிப்போம்,” என்றார்.

இருப்பினும் “எங்களது தரப்பு கேட்கப்படவில்லை. நாங்கள் உச்ச நீதிமன்றத்தில் போராடுவோம்,” என்று அவர் மேலும் தெரிவித்தார்.

இதற்கிடையே ஆக்கிரமிப்பின் ஒரு பகுதி நேற்றிரவு அகற்றப்பட்டது.

ஆக்கிரமிக்கப்பட்டதாகக் கருதப்படும் பகுதியில் ஒரு மருந்தகம் கட்டப்பட்டிருந்தது மற்றும் ஒரு திருமண மண்டபம் இயங்கி வந்தது.

இருப்பினும், மசூதி கமிட்டி சமீப காலங்களில் திருமண மண்டபம் மற்றும் மருந்தகத்தை மூடியிருந்தது.

ஜனவரி 4-ஆம் தேதியும் எம்.சி.டி அதிகாரிகள் சம்பவ இடத்தைப் பார்வையிட்டு ஆக்கிரமிப்பு பகுதியை அடையாளம் கண்டு குறியிட்டனர்.

டிசம்பர் 22 அன்று மசூதி கமிட்டிக்கு அனுப்பிய நோட்டீஸில், 0.195 ஏக்கர் நிலத்தைத் தவிர, மீதமுள்ள நிலம் இந்திய அரசாங்கத்திற்குச் சொந்தமானது என்றும் அதில் செய்யப்பட்ட கட்டுமானம் சட்டவிரோதமானது என்றும் எம்.சி.டி கூறியிருந்தது.

நிலத்தின் மீதான உரிமை தொடர்பான ஆவணங்களைச் சமர்ப்பிக்க மசூதி கமிட்டிக்கு ஒரு விசாரணை வாய்ப்பையும் எம்.சி.டி வழங்கியிருந்தது.

எம்.சி.டி ஆணையர் டிசம்பர் 22-ஆம் தேதியிட்ட தனது உத்தரவில், 1940-இல் செய்யப்பட்ட பத்திரத்தின் கீழ் பெறப்பட்ட 0.195 ஏக்கர் நிலத்தைத் தவிர மீதமுள்ள நிலத்தின் மீது மசூதி கமிட்டிக்கும் வக்ஃப் வாரியத்திற்கும் உரிமை இல்லை என்று கூறினார்.

இந்த நிலத்தில் கட்டப்பட்டுள்ள மசூதியைத் தவிர, மற்ற பகுதிகள் ஆக்கிரமிப்பு என்பதால் அவற்றை அகற்ற வேண்டும் என்றும் அந்த உத்தரவில் கூறப்பட்டிருந்தது.

மசூதி கமிட்டி இந்த எம்.சி.டி உத்தரவை எதிர்த்து உயர் நீதிமன்றத்தில் ரிட் மனுத் தாக்கல் செய்தது, ஆனால் உடனடி நிவாரணம் கிடைக்கவில்லை.

ஆக்கிரமிப்பை அகற்றுவதற்கான எம்.சி.டியின் நோட்டீஸிற்கு எதிராக மசூதி மேலாண்மைக் குழு டெல்லி உயர் நீதிமன்றத்தில் மனு தாக்கல் செய்திருந்தது, அது செவ்வாயன்று விசாரணைக்கு வந்தது.

மஸ்ஜித் சையத் ஃபைஸ் இலாஹி மேலாண்மைக் குழு தாக்கல் செய்த மனு குறித்து எம்சிடி, டெல்லி மேம்பாட்டு ஆணையம், நகர்ப்புற மேம்பாட்டு அமைச்சகத்தின் நிலம் மற்றும் மேம்பாட்டு அலுவலகம், பொதுப்பணித்துறை மற்றும் டெல்லி வக்ஃப் வாரியம் ஆகியவற்றுக்கு பதிலளிக்கும்படி நீதிபதி அமித் பன்சால் நோட்டீஸ் பிறப்பித்தார். இந்த வழக்கின் அடுத்த விசாரணை ஏப்ரல் 22-ஆம் தேதி நடைபெறும்.

இந்த நிலம் வக்ஃப் சொத்து என்றும், அது தொடர்பான எந்தவொரு தகராறையும் தீர்க்க வக்ஃப் தீர்ப்பாயத்திற்கு உரிமை உண்டு என்றும் மசூதி மேலாண்மைக் குழு தனது மனுவில் தெரிவித்துள்ளது.

இந்த வக்ஃப் நிலத்தைப் பயன்படுத்தியதற்காக வக்ஃப் வாரியத்திற்கு வாடகை செலுத்தி வருவதாகவும் கமிட்டி கூறியுள்ளது.

மசூதி கமிட்டியுடன் தொடர்புடையவர்களும் உள்ளூர் மக்களும் கட்டுமானம் சட்டவிரோதமானது என்று கூறப்படும் இடத்தில் ஒரு கல்லறை இருந்ததாகக் கூறுகின்றனர்.

மசூதி கமிட்டியுடன் தொடர்புடைய 72 வயதான நஜிமுதீன் சவுத்ரி கூறுகையில், “இந்த சட்டவிரோத ஆக்கிரமிப்பு என்று கூறப்படும் இடத்தில் ஒரு கல்லறை இருந்தது. இந்த மசூதி சுமார் இருநூறு முதல் இருநூற்று ஐம்பது ஆண்டுகள் பழமையானது. இப்போது பழைய மசூதி இருந்த இடத்தில் புதிய மசூதி உள்ளது,” என்றார்.

“எங்களுக்குத் தேவையான பதிவுகள் அடங்கிய கோப்புகள் காணவில்லை. 1940-இல் செய்யப்பட்ட பத்திரமே இறுதியான ஆவணமாகக் கருதப்படுகிறது. இன்று எம்.சி.டி இந்த நிலம் எங்களுக்குச் சொந்தமானது என்கிறது. நிலம் எம்.சி.டிக்குச் சொந்தமானது என்றால், எம்.சி.டி தனது ஆவணங்களை நீதிமன்றத்தில் காட்ட வேண்டும்,” என்று நஜிமுதீன் சவுத்ரி கூறினார்.

நஜிமுதீன் கூறுகையில், “இன்று இங்கே அகழ்வாராய்ச்சி செய்தால், அடியில் ஒரு தர்காவும் கல்லறைகளும் கிடைக்கும். இங்கே கல்லறைகள் உள்ளன, நிலத்தின் அடியில் தர்கா உள்ளது, அப்படி இருக்கையில் அந்த நிலம் எப்படி எம்.சி.டி அல்லது இந்திய அரசாங்கத்தின் சொத்தாக மாறியது என்பதுதான் எங்களது கேள்வி?” என்றார்.

துர்க்மேன் கேட் பகுதியைச் சேர்ந்த முகமது காசிம், தர்காவிற்கு அருகில் ஒரு மல்யுத்தக் களம் இருந்ததாகவும், அங்கு தான் சிறுவயதில் மல்யுத்தம் செய்ததாகவும் கூறுகிறார்.

காசிம் கூறுகையில், “இங்கே கல்லறைகள் இருந்தன, ஒரு மல்யுத்தக் களம் இருந்தது, நானும் டெல்லியின் பல மல்யுத்த வீரர்களும் சிறுவயதில் இங்கே மல்யுத்தம் செய்துள்ளோம்,” என்றார்.

இங்குள்ள பலருக்கு 1976-ஆம் ஆண்டு அவசரநிலையின் போது நடத்தப்பட்ட இடிப்பு நடவடிக்கை நினைவில் இருக்கிறது. 1976-இல் துர்க்மேன் கேட் அருகே சட்டவிரோதமாகக் கருதப்பட்ட குடியிருப்புகள் அகற்றப்பட்டன, அப்போது போராட்டக்காரர்கள் மீது காவல்துறை துப்பாக்கிச் சூடு நடத்தியதில் பலர் உயிரிழந்தனர்.

ஓரிடத்தைச் சுட்டிக்காட்டி 70 வயதான நசிருதீன் கூறுகையில், “1976-இல் புல்டோசர் ஓடியபோது தர்கா இடிக்கப்பட்டது. இங்கே பல கல்லறைகள் இருந்தன. அவை அனைத்தும் அடியில் புதைந்துவிட்டன,” என்றார்.

மற்றொரு முதியவர் தில்ஷாத் கூறுகையில், “நாங்கள் இங்கேதான் பிறந்தோம். இந்த மசூதி நூற்றுக்கணக்கான ஆண்டுகளாக இங்கே இருக்கிறது, இது ஒரு மயானமாக இருந்தது. இந்த இடம் இப்போது எப்படி எம்.சி.டி சொத்தாக மாறியது?” என்றார்.

1976 சம்பவத்தை நினைவு கூர்ந்த 70 வயதான முகமது தீன், “புல்டோசர் ஓடியபோது நான் இதே மசூதியில் தான் தொழுது கொண்டிருந்தேன். நானும் சிறைக்கு அனுப்பப்பட்டேன். இது முஸ்லிம்களுக்கு முன்பே நடந்துள்ளது, மீண்டும் நடக்கும்,” என்றார்.

நீதிமன்ற உத்தரவுக்கு முன்பு, எம்.சி.டியோ அல்லது வேறு எந்த அரசுத் துறையோ நிலம் தொடர்பாக எந்த நோட்டீஸும் வழங்கவில்லை என்றும் மசூதி கமிட்டி கூறுகிறது.

மசூதி மேலாண்மைக் குழுவுடன் தொடர்புடைய ஜாவேத் கான் கூறுகையில், “நவம்பர் 12 அன்று இந்த இடம் குறித்து நீதிமன்ற உத்தரவு வந்தது, அதற்கு முன்பு எந்த அரசுத் துறையும் எங்களைத் தொடர்பு கொள்ளவில்லை. ஒரு சதித்திட்டத்தின் ஒரு பகுதியாகவே இந்த மனு தாக்கல் செய்யப்பட்டது, முஸ்லிம்களின் இந்த இடம் குறிவைக்கப்பட்டது,” என்றார்.

“நாங்கள் பாபர் மசூதி தீர்ப்பை ஏற்றுக்கொண்டோம், இந்த வழக்கிலும் நீதிமன்றம் எடுக்கும் எந்த முடிவையும் ஏற்றுக்கொள்வோம். ஆனால் குறைந்தபட்சம் எங்கள் தரப்பை முன்வைக்க எங்களுக்கு ஒரு வாய்ப்பையாவது வழங்க வேண்டும் என்று நாங்கள் விரும்புகிறோம். தேவைப்பட்டால் நாங்கள் உச்ச நீதிமன்றம் கூட செல்வோம். இந்த முடிவை நாங்கள் நீதிமன்றத்தில் எதிர்கொள்வோம், தெருக்களில் அல்ல,” என ஜாவேத் கான் கூறுகிறார்.

– இது, பிபிசிக்காக கலெக்டிவ் நியூஸ்ரூம் வெளியீடு