டெல்லியில் கடந்த 1993ஆம் ஆண்டு நடந்த தேர்தலில் பாஜக வெற்றி பெற்றது. அதன் பிறகு, மாநிலத்தின் கட்சித் தலைவர்களையும் உறுப்பினர்களையும் ஒன்றிணைத்து, கட்சியை அடிமட்ட அளவில் ஒழுங்கமைத்து வைத்திருப்பது கட்சிக்கு ஒரு பெரிய சவாலாக இருந்தது.

மூத்த பத்திரிகையாளர் ஷரத் குப்தா இதுகுறித்துப் பேசுகையில், “ஒவ்வொரு சட்டமன்றத் தேர்தலிலும் பாஜக இரட்டை இன்ஜின் அரசாங்கத்தைப் பற்றிப் பேசியபடி மக்களிடம் செல்கிறது. இது பாஜகவின் நுட்பமான அணுகுமுறைக்கு ஓர் எடுத்துக்காட்டு,” என்றார்.

மற்ற கட்சிகளில் இருந்து வந்த தலைவர்களையும் பாஜக திறமையாகப் பயன்படுத்தியது. இதுபோன்ற பல தலைவர்களுக்கு சட்டமன்றத் தொகுதிகளில் போட்டியிட வாய்ப்பளித்தது. அவர்களும் வெற்றி பெற்றனர்.

இதுதொடர்பாக, காங்கிரஸ் தலைவராக இருந்து, கட்சியிலிருந்து வெளியேறி பாஜகவில் இணைந்த தர்விந்தர் சிங் மார்வாவின் பெயர் முக்கியமானது. பாஜக அவருக்கு வாய்ப்பளித்தது. மார்வா முன்னாள் துணை முதல்வர் மணீஷ் சிசோடியாவை ஜங்புரா தொகுதியில் தோற்கடித்தார்.

இதேபோல், முன்னாள் காங்கிரஸ் தலைவர் அரவிந்தர் சிங் லவ்லி காந்தி நகரில் இருந்தும், ராஜ்குமார் சௌகான் மங்கோல்புரியில் இருந்தும் வெற்றி பெற்றனர்.

காங்கிரஸ் ஒரு தொகுதியில்கூட வெற்றி பெறவில்லை என்றாலும், ஆம் ஆத்மி கட்சியின் வாக்குகளைக் குறைத்தது. இது பாஜகவுக்கு உதவியதாகப் பல நிபுணர்கள் கருதுகின்றனர்.

கடந்த 2020 தேர்தலில் ஐந்து சதவீத வாக்குகளைக்கூட பெறாத காங்கிரஸ் கட்சி, இந்தத் தேர்தலில் சுமார் 7 சதவீத வாக்குகளைப் பெற்றுள்ளது.

தற்போதைய தேர்தல் முடிவுகளைப் பற்றிப் பேசுகையில், இதுவரை உள்ள தரவுகளின்படி, ஆம் ஆத்மிக்கும் பாஜகவுக்கும் இடையே இரண்டு சதவீத வாக்குகள் மட்டுமே வித்தியாசம் உள்ளது.

காங்கிரசின் நோக்கம் தன்னை மீண்டும் உயிர்ப்பித்துக் கொள்வதே எனத் தான் கருதுவதாகத் தெரிவித்த ரவீந்தர் பாவா, “ஆனால், சந்தீப் தீட்சித் உள்ளிட்ட பிற முகங்களை காங்கிரஸ் களமிறக்கிய விதம், பழிவாங்கும் அரசியலைச் செய்ய வந்ததைப் போலத் தோற்றமளித்தது. ஒரு வகையில், அக்கட்சி தனது வாக்கு சதவீதத்தை அதிகரிக்க முயன்றது,” என்றும் கூறினார்.

இதன் அடிப்படையில் பார்த்தால், பாஜகவின் வெற்றியில் காங்கிரஸின் மேம்பட்ட செயல் திறன் ஒரு சிறு பங்கைக் கொண்டிருப்பதாகத் தெரிகிறது.

ஜம்மு-காஷ்மீர் முதல்வர் ஒமர் அப்துல்லாவும் தனது எக்ஸ் பதிவில், ஆம் ஆத்மிக்கும் காங்கிரஸ் கட்சிக்கும் இடையிலான மோதலில் இருந்து பாஜக பயனடைந்துள்ளதாகக் குறிப்பிட்டுள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு