எந்த அறிகுறியும் இல்லாமல் தட்டையான பாதங்கள் கொண்டிருப்பவர்களால் 100% இயல்பு வாழ்க்கையை மேற்கொள்ள முடியும் என்று மருத்துவர்கள் கூறுகின்றனர்.

“தட்டையான பாதம் கொண்டிருப்பதாலேயே அவர்களுக்கு எந்த இயலாமையும் ஏற்படப் போவதில்லை. அவர்களால் வழக்கம் போல நடப்பது, ஓடுவது என அனைத்து விதமான செயல்களையும் செய்ய முடியும்.” என்கிறார் மருத்துவர் சுந்தர் குமார்.

ஒருவருக்கு தட்டையான பாதங்கள் இருப்பதாலேயே அவரால் வாகனம் ஓட்ட இயலாது என்று கூற முடியாது என்கிறார் மருத்துவர் சுந்தர் குமார்.

“தட்டையான பாதங்கள் கொண்டவருக்கு கூடுதலாக வேறு என்ன பாதிப்புகள் உள்ளன என்று அறிந்துக் கொள்ளவேண்டும், அவர் உடல் பருமனாக இருக்கிறாரா, அவருக்கு வலி, வீக்கம் இருக்கிறதா, எலும்புகள் சிதைந்துள்ளனவா என்று கண்டறிய வேண்டும்.”

“இவற்றை கவனிக்காமல் ஒருவருக்கு தட்டையான பாதங்கள் இருப்பதாலேயே அவரால் வாகனம் ஓட்ட இயலாதென்று கூற முடியாது. உலக புகழ்பெற்ற, வேகமான ஓட்டப்பந்தய வீரர் ஹூசைன் போல்ட் தட்டையான பாதங்கள் கொண்டவர். அவருக்கு தட்டையான பாதங்கள் எந்த விதத்திலும் தடையாக இருக்கவில்லை” என்கிறார் மருத்துவர் சுந்தர் குமார்.

ஆரோக்யமான வாழ்க்கை முறையை பின்பற்றுவது மிகவும் அவசியம் என மருத்துவர்கள் வலியுறுத்துகின்றனர். தட்டையான பாதங்கள் கொண்டவர்களுக்கு உடல் பருமனாகாமல் பார்த்துக் கொள்வது அவசியமாகிறது. உடல் எடை அதிகரிக்கும் போது, தட்டையான பாதங்களினால் வலி ஏற்படலாம். அதே போன்று, மந்தமாக இல்லாமல் சுறுசுறுப்பாக இருப்பதும் அறிகுறிகள் தென்படாமல் இருக்க அவசியமானது என்று மருத்துவர்கள் வலியுறுத்துகின்றனர்.

நடக்கும் போது, பாதங்கள் முழுவதுமாக காலில் பதிந்தால் தட்டையான பாதங்கள் இருப்பதாக அறிந்துக் கொள்ளலாம் என்று மருத்துவர் பி சுந்தர் குமார். “அல்லது காலை நீரில் நனைத்து பின்பு வறண்ட கான்கிரீட் போன்ற தளத்தில் நடக்கும் போது, அதில் பதியும் கால் தடத்தைப் பார்த்து தெரிந்துக் கொள்ளலாம். பாதங்கள் இயல்பாக இருந்தால் அந்த தடத்தில் ஒரு வளைவு தெரியும். வளைவு இல்லாமல் கால் பாதம் முழுவதும் தெரிந்தால் தட்டையான பாதங்கள் உள்ளதாக அர்த்தம்” என்கிறார்.

நிறைய குழந்தைகளில் தட்டையான பாதங்கள் காணப்படும் என்று மருத்துவர்கள் கூறுகின்றனர். பிறக்கும் போது தட்டையாக இருந்தாலும், வளரும் போது குழந்தைகளுக்குப் பாதத்தில் தேவையான வளைவு ஏற்படும், அதற்கான தசை மற்றும் எலும்பு வளர்ச்சி தானாக ஏற்படும் என்று கூறுகின்றனர்.

“குழந்தைகள் நடப்பத்தில் தாமதம், வித்தியாசமாக நடப்பது, சமநிலையில்லாமல் நடப்பது ஆகியவற்றை கவனித்தால் மருத்துவர்களை அணுகலாம். சில நேரங்க்களில் எலும்புகள் சரியாக பிரிந்து வளராமல் ஒன்றாக ஒட்டிக் கொண்டிருக்கலாம். அது போன்றவற்றுக்கு மருத்துவ கவனம் தேவைப்படும்.” என்கிறார் மருத்துவர் சுந்தர் குமார்.

ஏற்கெனவே குறிப்பிட்டது போல தட்டையான பாதங்களோடுச் சேர்த்து அதனுடன் சம்பந்தப்பட்ட அறிகுறி கொண்டவர்களுக்கு மட்டுமே சிகிச்சை தேவைப்படும் என்று மருத்துவர்கள் கூறுகின்றனர்.

“எலும்புகளில் ஏதேனும் கோளாறு இருந்தால் அதனைச் சரி செய்ய அறுவை சிகிச்சை தேவைப்படலாம். ஆனால் அனைவருக்கும் அறுவை சிகிச்சை செய்ய வேண்டிய அவசியமில்லை. சிலருக்குப் பிரத்யேக காலணிகள் பயன்படுத்துவதே வலியிலிருந்து நிவாரணம் அளிக்கும். மேலும் சிலருக்கு காலுக்கான சில பயிற்சிகள் சொல்லித்தரப்படும்” என்று மருத்துவர் சுந்தர் குமார் கூறுகிறார்.

– இது, பிபிசிக்காக கலெக்டிவ் நியூஸ்ரூம் வெளியீடு