அதில் மனிதர்கள் புரிந்துகொள்ளும் தற்போதைய அஞ்சல் முகவரியுடன் இயந்திரங்களும் புரிந்துகொள்ளும் டிஜிபின்னும் சேர்ந்து இணைக்கப்படும். இதனால் உங்கள் மின் முகவரியைக் கொண்டு நீங்கள் எந்த இடத்தில் இருக்கிறீர்கள் என்று துல்லியமாக ஒரு கணினியால் அறிந்து கொள்ள முடியும்.

உங்கள் அனுமதியோடு எப்படி ஆதார் என்பது சுய அடையாள ஆதாரமாக இதர நிறுவனங்களுக்கு இருக்கிறதோ அது போல இத்திட்டம் இருப்பிடங்காட்டியாகச் செயல்படும். இந்தத் தகவல்கள் பாதுகாக்கப்படும், உரிய அனுமதியோடே இதர நிறுவனங்களுக்குப் பகிரப்படும் என்று வாக்குறுதி அளிக்கப்பட்டுள்ளது.

இந்த முழுமையான திட்டத்தின் பெயர் “துருவா”. இதனால் எதிர்காலத்தில் இயந்திரங்கள் எளிதில் உங்கள் முகவரியை அடையாளங்கண்டு வந்தடையும். இந்தியாவில் பணப் பரிவர்த்தனை செயல்பாடுகளில் யுபிஐ எப்படி ஒரு புரட்சியைச் செய்ததோ, அதுபோல இந்த துருவா விநியோகத் துறையில் புரட்சியை உண்டாக்கும் என எதிர்பார்க்கப்படுகிறது.

இந்த முறையில் சில குறைபாடுகளும் உள்ளன. இந்தியாவின் எல்லையோரப் பகுதிகளில் இந்த இலக்கம் ஒதுக்கீடு செய்யப்படவில்லை. குறிப்பாக ராமேஸ்வரம் பகுதியில் உள்ள பல தீவுகளுக்கு இந்த இலக்கங்கள் ஒதுக்கீடு செய்யப்படவில்லை. எல்லையோரம் என்பதால் டிஜிபின் தளமே அதைத் தவிர்க்கிறது என்பதே அதற்குக் காரணம். இதைச் சீர்படுத்தினால் மீனவர்களுக்கு அவரச நேரத்தில் உதவிகரமாக இருக்கும்.

கூகுள் அல்லது வாட்3வேர்ட்ஸ் போல இதர துணை நுட்பங்கள் தற்போதைக்கு அறிமுகமாகவில்லை. அதாவது ஒரு முகவரியில் இருந்து இன்னொரு முகவரிக்குச் செல்லும் வழிகாட்டல், இரண்டு இலக்கங்களுக்கு இடையே உள்ள தூரத்தைக் கணக்கிடுவது போன்ற பல வசதிகள் தற்போதைய செயலியில் இல்லை.

அதனால் இணையமின்றி முகவரிகள் இடத்தைச் சுட்டிக் காட்டினாலும் பயணம் செய்ய கூகுள் மேப் அல்லது ஓபன்ஸ்ட்ரீட் மேப் போன்ற வேறு ஒரு வழிகாட்டுதல் செயலியின் உதவி தேவைப்படுகிறது. மேலும் இதர முறைகளில் பல கருவிகளுக்கான ஒத்திசைவு உண்டு.

அதாவது வாகனங்கள், கையடக்கக் கருவிகளில் குறுஞ்செயலிகளாக உள்ளதால் அதைப் பயன்படுத்துவது எளிது. ஆனால் இந்த விஷயத்தில் டிஜிபின் செல்ல வேண்டிய தூரம் அதிகமாக உள்ளது.