எடப்பாடி பழனிசாமியின் விமர்சனம் மற்றும் வணிகர்களின் குற்றச்சாட்டு தொடர்பாக, தமிழ்நாடு ஊரக தொழில்துறை மற்றும் பஞ்சாயத்து ராஜ் துறையின் அமைச்சர் ஐ.பெரியசாமி விளக்கம் ஒன்றை அளித்துள்ளார்.

அவர் வெளியிட்டுள்ள செய்திக் குறிப்பில், ‘கிராமப்புறங்களில் சிறுதொழில் மற்றும் வணிகம் செய்ய உரிமக் கட்டணம் என்ற ஒரு சட்டத்தை தமிழ்நாடு அரசு ஏதோ புதிதாக கொண்டு வந்தது போல தனது வழக்கமான அவதூறு பிரசாரத்தை அ.தி.மு.க பொதுச்செயலாளர் எடப்பாடி பழனிசாமி கையில் எடுத்துள்ளதாக விமர்சித்தார்.

கிராம ஊராட்சிகளில் தொழில் உரிமம் பெற வேண்டும் என்ற சட்டம் 1958 ஆம் ஆண்டே கொண்டு வரப்பட்டுள்ளதாகக் கூறியுள்ள அமைச்சர் ஐ.பெரியசாமி, ‘இது தமிழ்நாடு ஊராட்சிகள் சட்டம் 1994 பிரிவு 159ன் படி அ.தி.மு.க. ஆட்சிக்காலத்தில் உறுதிப்படுத்தப்பட்டுள்ளது. இதன்படி ‘அபாயகரமானதும் மற்றும் தீங்கு விளைவிக்கும் பொருட்களுக்கான வர்த்தக உரிமம் (Dangerous and Offensive Trade Licence) என்ற பெயரில் வழங்கப்பட்டு வந்தது’ எனக் கூறியுள்ளார்.

‘அபாயகரமானதும் மற்றும் தீங்கு விளைவிக்கும் பொருள் வர்த்தக உரிமம்’ என்ற பெயரை, ‘வணிகம் அல்லது தொழில் உரிம விதிகள்’ என மாற்றி சட்டமன்றத்தில் நிறைவேற்றப்பட்டுஅரசிதழில் வெளியிடப்பட்டுள்ளது. இதன்மூலம் தமிழ்நாடு ஊராட்சிகள் சட்டம் திருத்தி அமைக்கப்பட்டுள்ளது’ எனவும் அமைச்சர் ஐ.பெரியசாமி தெரிவித்துள்ளார்.

உரிமக் கட்டணம் என்பது எப்போதும் உள்ளதாகக் கூறியுள்ள அமைச்சர் ஐ.பெரியசாமி, ‘ஒவ்வொரு ஆண்டும் இந்த உரிமம் புதுப்பிக்கப்பட வேண்டும் என்ற நடைமுறையும் இருந்து வருகிறது. இன்றும் தமிழ்நாட்டில் உள்ள அனைத்து ஊராட்சிகளிலும் பல்வேறு வகையான நிறுவனங்கள் தொழில் உரிமம் பெற்று செயல்பட்டு வருகின்றன. இதன்மூலம் ஊராட்சிகளுக்கு வரி வருமானம் கிடைத்து வருகிறது’ என்கிறார்.

‘தொழில் உரிமம் பெறுவதற்கான சட்டப்பிரிவு பல ஆண்டுகளாக இருந்தபோதும் முறையான விதிகள் (Rules) இல்லாததால் ஒவ்வொரு கிராம ஊராட்சிகளிலும் தங்களது தீர்மானத்தின் அடிப்படையில் பல்வேறு விதமான கட்டணங்களை நிர்ணயம் செய்து வசூலித்து வந்தன. இக்குறைகளை நீக்கும் வகையில் புதிய விதிகள் உருவாக்கப்பட்டுள்ளது’ எனக் குறிப்பிட்டுள்ளார்.

புதிய நடைமுறையின்படி, வணிக உரிமம் பெறும் விண்ணப்பம் மீது 30 நாட்களுக்குள் முடிவு எடுக்காவிட்டால் உரிமம் வழங்கப்பட்டதாக கருதப்படும் (Deemed Approval) என்ற சலுகையும் விண்ணப்பங்களுக்கு உரிய வாய்ப்பு அளிக்காமல் நிராகரிக்கக்க கூடாது என்ற நிபந்தனை உள்பட பல்வேறு நன்மைகள் உள்ளதாகவும் குறிப்பிட்டுள்ளார்.

இந்தநிலையில், வணிக உரிமத்தை எளிமைப்படுத்துவது தொடர்பாக தமிழ்நாடு வணிகர் சங்கங்களின் பேரமைப்பு அளித்த கோரிக்கை மனுவை ஏற்று ஆய்வு மேற்கொள்ளப்பட உள்ளதாகவும் ஐ.பெரியசாமி தெரிவித்துள்ளார்.

இதற்காக துறை அலுவலர்கள் மற்றும் வணிகர் சங்க அமைப்புகளின் பிரதிநிதிகளைக் கொண்ட ஆலோசனைக் குழு ஒன்றை அமைப்பதற்கு முதலமைச்சர் ஸ்டாலின் உத்தரவிட்டுள்ளதாகக் கூறியுள்ள அமைச்சர் ஐ.பெரியசாமி, ‘அதன் அடிப்படையில் புதிய சட்டத்தை நடைமுறைபடுத்துவது குறித்து முடிவு மேற்கொள்ளப்படும்’ எனக் கூறியுள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு