அரியலூரில் ரூ.77 லட்சம் ஹவாலா பணத்துடன் வந்த இளைஞரை வருமான வரித்துறையினர் கைது செய்து விசாரணை நடத்தி வருகின்றனர் என்று தினத்தந்தி நாளிதழ் செய்தி வெளியிட்டுள்ளது.

“மேற்குவங்க மாநிலம் ஹவுராவில் இருந்து திருச்சி செல்லும் ஹவுரா எக்ஸ்பிரஸ் ரெயில் பிப்ரவரி 28 நள்ளிரவு சுமார் 1.30 மணியளவில் அரியலூர் ரயில் நிலையத்திற்கு வந்தது. அப்போது ரயில்வே போலீசார் கஞ்சா உள்ளிட்ட போதைப்பொருட்கள் கடத்தப்படுவதை தடுப்பதற்காக சோதனையில் ஈடுபட்டிருந்தனர்.

ஒரு பயணியின் பையில் சோதனை செய்தபோது, அதில் கட்டுக்கட்டாக 500 ரூபாய் நோட்டுகள் இருந்தன. இதனால் சந்தேகமடைந்த போலீசார், அந்த பயணியை ரயில்வே போலீஸ் நிலையத்திற்கு அழைத்து சென்று விசாரணை நடத்தினர். இதில் அவர், பெரம்பலூர் மாவட்டம் மேலமாத்தூர் கிராமத்தை சேர்ந்த வினோத்குமார் (வயது 28) என்பதும், சென்னையில் இருந்து அவர் அரியலூர் வந்ததும் தெரியவந்தது.

அந்த பையில் ரூ.77,11,640 பணம் இருந்தது. இதுகுறித்து வினோத்குமாரிடம் போலீசார் விசாரித்தபோது, அவர் சரியான பதிலையோ, உரிய ஆவணங்களையோ அளிக்கவில்லை. இதனால் இதுகுறித்து திருச்சி வருமான வரித்துறை அலுவலகத்திற்கு ரயில்வே போலீசார் தகவல் தெரிவித்தனர்.

நேற்று காலை அரியலூர் ரயில்வே போலீஸ் நிலையத்திற்கு வருமான வரித்துறையினரிடம் வினோத்குமாரையும், பறிமுதல் செய்த பணத்தையும் போலீசார் ஒப்படைத்தனர்.

தற்போது வினோத்குமார் கைது செய்யப்பட்டு திருச்சிக்கு அழைத்து செல்லப்பட்டுள்ளார். அங்கே விசாரணை மேற்கொள்ளப்பட்டு வருகிறது. இதுகுறித்து வருமான வரித்துறை அதிகாரிகளிடம் கேட்டபோது, ‘இந்த பணம் ஹவாலா பணமாக இருப்பதற்கு வாய்ப்புள்ளது. மேலும் இதுதொடர்பான தகவல் விசாரணையில்தான் தெரியவரும்’ என்று தெரிவித்தனர்,” என்று அந்த செய்தியில் குறிப்பிடப்பட்டுள்ளது.