இன்று சட்டப்பேரவைக் கூட்டத்திற்கு தமிழக சட்டப்பேரவையின் பிரதான எதிர்க்கட்சியான அதிமுக எம்.எல்.ஏ.க்கள், அண்ணா பல்கலைக்கழகத்தில் மாணவி பாலியல் வன்கொடுமைக்கு உள்ளான விவகாரத்தைக் குறிக்கும் வகையில் தங்களது சட்டைகளில் ‘யார் அந்த சார்?’ என்ற பேட்ஜை அணிந்து வந்தனர். பதாகைகளையும் வைத்திருந்தனர். காங்கிரஸ் கட்சியின் உறுப்பினர்கள் கறுப்பு பேட்ஜ் அணிந்து வந்திருந்தனர்.

செய்தியாளர்களிடம் பேசிய ஆளுநர் அப்பாவு, ” ஆளுநர் தேசிய கீதத்தையெல்லாம் ஒரு சாக்காக சொல்கிறாரே தவிர, உரையை வாசிக்க விருப்பம் இல்லாததால் இப்படிச் செய்கிறார் என புரிந்துகொள்கிறேன். ஆளுநர் முதல் கூட்டத்திற்கு வர வேண்டுமென்பது மரபு. அதற்காக அவரை மரியாதை நிமித்தமாக அழைத்தபோது மகிழ்ச்சியாக வரவேற்றுப் பேசினார். ஆனால், ஆளுநர் இப்படிச் செய்கிறார். அடுத்த ஆண்டும் இதேபோல அழைப்போம், வாசிப்பதும் வாசிக்காததும் அவரது விருப்பம். இந்தியாவின் எந்த மாநிலத்திலாவது இந்தப் பிரச்சனை இருக்கிறதா? கொள்கை ரீதியான அரசு இருப்பதால் இப்படிச் செய்கிறார்களா எனத் தெரியவில்லை. மதச் சார்பற்ற நாடு என அரசியலமைப்புச் சட்டத்தில் இருக்கிறது. மதச்சார்புள்ள நாடு என சொல்கிறார்கள். இப்படி செய்தால் என்ன செய்வது?” என்று தெரிவித்தார்.

ஆளுநர் உரை நேரலை செய்யப்படாதது ஏன் எனக் கேட்டபோது, “ஏதாவது தொழில்நுட்பக் கோளாறு இருக்கலாம், நேரலை செய்யப்பட்டதாகத்தான் நினைத்துக் கொண்டிருக்கிறேன்” எனத் தெரிவித்தார்.

தமிழ்நாடு சட்டப்பேரவையில், ஆளுநர் உரை நிகழ்த்தும் தினத்தில் இதுபோல சர்ச்சை நடப்பது முதல் முறையில்லை. கடந்த 2023-ஆம் ஆண்டில் அந்த ஆண்டுக்கான முதல் கூட்டத்தொடர் ஆளுநர் உரையுடன் ஜனவரி 9ஆம் தேதி தொடங்கியது.

உரையை வாசித்த ஆளுநர் ஆர்.என். ரவி, அந்த உரையில் இருந்த சில வரிகளைத் தவிர்த்துவிட்டு வாசித்தார். சில வாசகங்களை சேர்த்தும் படித்தார். ஆனால், ஆளுநர் உரையின் தமிழாக்கத்தை வாசித்த சபாநாயகர் அப்பாவு, தமிழ்நாடு அரசு தயாரித்து அளித்த உரையை முழுமையாக வாசித்தார். இதன்பிறகு பேரவையில் பேசிய முதல்வர் மு.க.ஸ்டாலின் அரசு தயாரித்த உரையை ஆளுநர் முறையாக படிக்கவில்லை என்று குற்றம்சாட்டினார்.

அவர் பேசுகையில்,”தமிழக அரசு தயாரித்த உரையை ஆளுநர் முறையாக படிக்கவில்லை. உரையில் ஆளுநர் சொந்தமாக சேர்த்துப்படித்த எதுவும் அவைக்குறிப்பில் இடம்பெறாது” என்று தெரிவித்து இது தொடர்பான தீர்மானத்தை கொண்டு வந்தார்.

இந்த தீர்மானம் சட்டப்பேரைவில் ஒருமனதாக நிறைவேற்றப்பட்டது.

இந்தத் தீர்மானம் கொண்டு வரப்பட்டுக் கொண்டிருந்தபோதே, அவையைவிட்டு அவசரஅவசரமாக ஆளுநர் ஆர்.என். ரவி வெளியேறினார். இது அந்தத் தருணத்தில் பெரும் சர்ச்சையை ஏற்படுத்தியது.

இதற்குப் பிறகு 2024-ஆம் ஆண்டிற்கான தமிழ்நாடு சட்டப்பேரவையின் கூட்டத்தொடர் பிப்ரவரி 12ஆம் தேதி தொடங்கியது. அன்று தமிழ்த் தாய் வாழ்த்துடன் சட்டப்பேரவை தொடங்கியது. இதற்குப் பிறகு தனது உரையை வாசிக்க ஆரம்பித்த ஆளுநர் ஆர்.என். ரவி, சட்டப்பேரவை துவங்கும் முன்பாகவும் முடியும்போதும் தேசிய கீதத்தை இசைக்க வேண்டும் என்ற தனது வேண்டுகோள் புறக்கணிக்கப்பட்டு, தேசிய கீதத்திற்கு போதிய மரியாதை தரப்படவில்லையென்று குறிப்பிட்டார்.

மேலும், ஆளுநர் உரையில் தகவல் ரீதியாகவும் தார்மீக ரீதியாகவும் தன்னால் ஏற்க முடியாத பகுதிகள் இடம்பெற்றிருக்கின்றன என்றும் அவற்றை வாசிப்பது அரசியல் சாசனத்தை அவமதிப்பதாக அமையும் என்றும் கூறிவிட்டு, உரையை வாசிக்காமல் அமர்ந்தார்.

இதற்குப் பிறகு அவை முன்னவரும் அமைச்சருமான துரைமுருகன் சட்டப்பேரவை விதி 17ஐத் தளர்த்தி தீர்மானம் ஒன்றைக் கொண்டுவந்தார். “2024ஆம் ஆண்டுக்கான முதல் கூட்டத்தொடரில் தமிழ், ஆங்கிலத்தில் தவிர்க்கப்பட்ட ஆளுநர் உரை, இந்த அவைக்கு வழங்கப்பட்ட படியே அவைக்குறிப்பில் பதிவேற்றம் செய்யப்பட வேண்டும்” என்ற அந்தத் தீர்மானம் குரல் வாக்கெடுப்பின் மூலம் ஒரு மனதாக நிறைவேற்றப்பட்டதாக அறிவிக்கப்பட்டது.

– இது, பிபிசிக்காக கலெக்டிவ் நியூஸ்ரூம் வெளியீடு.