விலை வீழ்ச்சியின் பின்னணியில் பர்கூர் சட்டமன்ற உறுப்பினரும், கிருஷ்ணகிரி மாவட்ட திமுக செயலாளருமான மதியழகன் இருப்பதாகவும் விவசாயிகள் தரப்பில் குற்றம்சாட்டப்படுகிறது. இவர் மாம்பழக்கூழ் ஆலை அதிபர்கள் கூட்டமைப்பின் தலைவராகவும் உள்ளார்.

ஒவ்வொரு ஆண்டிலும் விலை தொடர்பாக நடக்கும் முத்தரப்புக் கூட்டத்துக்கு பெரிய ஆலை உரிமையாளர்கள் வரமாட்டார்கள் என்று கூறும் விவசாயிகள் சங்கப்பிரதிநிதிகள், சிறிய ஆலை அதிபர்களால் முடிவெடுக்க முடியாது என்கின்றனர்.

கிருஷ்ணகிரி மாவட்ட மா விவசாயிகள் கூட்டமைப்பின் தலைவர் சௌந்தரராஜன் இந்த விவகாரம் பற்றி பேசுகையில், ”இந்த ஆண்டு விளைச்சல் அதிகமாக இருந்ததால், அனைத்து ஆலை அதிபர்களும் வரவேண்டுமென்று ஆட்சியர் அறிவுறுத்தியும் முத்தரப்பு கூட்டத்துக்கு மதியழகன் வரவில்லை. அவர் அண்ணன் உதயகுமார் வந்தார். விவசாயிகள் கிலோவுக்கு 15 ரூபாய் விலை கேட்டோம். அவர் 12 ரூபாய் தருவதாகவும் மே 10 லிருந்து கொள்முதல் செய்வதாகவும் கூறினார். ஆனால், பெங்களூரா ரக மாம்பழங்களை கிலோ ரூ.10லிருந்து ரூ.5க்குள்தான் வாங்குகின்றனர். ஒரு டன் மாங்காயைப் பறித்து ஆலைக்குக் கொண்டுவரவே ரூ.3,500 செலவாகிறது. ஒரு டன் பழத்துக்கு ரூ.1500 கிடைத்தால் ஒரு விவசாயி எப்படி விவசாயம் செய்ய முடியும்.” என்கிறார்.

கிலோவுக்கு ரூ.12 விலை கொடுக்க மாங்கூழ் ஆலை உரிமையாளர்கள் சொன்னதை ஒப்புக்கொள்ளும் கிருஷ்ணகிரி மாவட்ட தோட்டக்கலைத்துறை இணை இயக்குநர் இந்திரா, இப்போது வெளிநாட்டு ஏற்றுமதி குறைந்துவிட்டதால் பழைய ஸ்டாக் இருப்பதாகக் கூறி அந்த விலையைக் கொடுக்க முடியவில்லை என்று ஆலை அதிபர்கள் கூறுவதாக பிபிசி தமிழிடம் தெரிவித்தார்.

இந்த விலை வீழ்ச்சி விவகாரம், விவசாயிகள், மாங்கூழ் அதிபர்களிடையிலான மோதலாக மட்டுமின்றி, அரசியல்ரீதியான மோதலாகவும் உருமாறியுள்ளது.

மா விவசாயிகளின் கோரிக்கையை நிறைவேற்ற வலியுறுத்தி, கடந்த ஜூன் 20 அன்று கிருஷ்ணகிரியில் அதிமுக சார்பில் உண்ணாவிரதப் போராட்டம் நடைபெற்றது.

மாம்பழத்துக்கு கிலோவுக்கு ரூ.13 விலை தரவேண்டும்; பாதிக்கப்பட்ட விவசாயிகளுக்கு ஏக்கருக்கு ரூ.30 ஆயிரம் வழங்க வேண்டும்; மாங்கூழ் மீதான ஜிஎஸ்டி வரியை 12 சதவிகிதத்திலிருந்து 5 சதவிகிதமாகக் குறைக்க வேண்டும் போன்ற கோரிக்கைகள் அதில் வலியுறுத்தப்பட்டன.

நெல், கரும்பு உள்ளிட்ட பயிர்களுக்கு வழங்குவது போல, மாம்பழங்களுக்கு குறைந்தபட்ச ஆதாரவிலையை நிர்ணயிக்க வேண்டுமென்று நாம் தமிழர் கட்சி ஒருங்கிணைப்பாளர் சீமான் அறிக்கை விடுத்துள்ளார்.

அதேபோன்று, மாம்பழங்களை மாங்கூழ் ஆலைகளுக்கு கொள்முதல் செய்வதையும், டன்னுக்கு ரூ.4 ஆயிரம் ஊக்கத்தொகை வழங்குவதையும் தமிழக அரசு உறுதி செய்ய வேண்டுமென்று பாமக தலைவர் அன்புமணி ராமதாஸ் தனது அறிக்கையில் வலியுறுத்தியிருந்தார்.

கர்நாடகாவில் விலை வீழ்ச்சியால் பாதிக்கப்பட்டுள்ள மாம்பழ விவசாயிகளுக்கு நிவாரணம் அளிக்கும் வகையில், 2.5 லட்சம் டன் மாம்பழங்களை கூட்டாக கொள்முதல் செய்யவும், டன்னுக்கு ரூ.4,000 ஊக்கத் தொகை வழங்கவும் கர்நாடக அரசும், மத்திய அரசும் கூட்டாக முடிவு செய்ததை வரவேற்றிருந்த அவர், தமிழக அரசு எதுவும் செய்யாததால் மாம்பழங்களை மீன்களுக்கு உணவாகவும் வீதியிலும் கொட்ட வேண்டிய அவலநிலை தமிழக மா விவசாயிகளுக்கு ஏற்பட்டுள்ளதாகவும் அவர் குற்றம்சாட்டியிருந்தார்.