தொடக்கப்பள்ளி முதல் 12ஆம் வகுப்பு வரை பள்ளிக் கல்வியில் அனைவருக்கும் தரமான, சமமான கல்வி கிடைப்பதை உறுதி செய்வது மற்றும் ஆசிரியர் பயிற்சி மையங்களை வலுப்படுத்துவதே சமக்ரா ஷிக்‌ஷா அபியான் திட்டத்தின் நோக்கம்.

இந்தத் திட்டம் கடந்த 2018ஆம் ஆண்டு மத்திய அரசால் அறிமுகப்படுத்தப்பட்டது. இதன்கீழ், 2024-25 கல்வியாண்டுக்காக தமிழ்நாட்டிற்கென ரூ.3,586 கோடி நிதி ஒதுக்கப்பட்டது. இதில், மத்திய அரசின் பங்களிப்பு 60%, மாநில அரசின் பங்களிப்பு 40%.

இந்நிலையில், தனது 60 சதவீதம் பங்கான ரூ.2,152 கோடி நிதியையே பிற மாநிலங்களுக்குத் திருப்பிவிட்டுவிட்டதாக மத்திய அரசு மீது மு.க.ஸ்டாலின் குற்றம்சாட்டியுள்ளார்.

தமிழ்நாட்டு மக்களுடைய வரிப்பணத்தை, அதன் கல்வி செலவுகளுக்காக வழங்குவதை மத்திய அரசு நிறுத்தினால், அரசுப் பள்ளிகளில் போதிய மற்றும் தரமான ஆசிரியர்களுக்கு பற்றாக்குறை ஏற்படும் என்று கூறுகிறார் கல்வியாளர் பிரின்ஸ் கஜேந்திர பாபு.

“மத்திய அரசு நவோதயா வித்யாலயா, கேந்த்ரியா வித்யாலயா போன்ற சிறப்புப் பள்ளிகளை மட்டுமே நடத்துகிறது. அனைவரும் படிக்கும் வகையில் இருப்பது மாநில அரசுகள் நடத்தும் பள்ளிகளே. மற்றொரு புறம், கல்வி பொதுப் பட்டியலில் இருப்பதால், மத்திய, மாநில அரசுகள் இரண்டுமே அதற்கான நிதியை வழங்க வேண்டும்.

ஆனால், அப்படி ஒரு மாநிலத்திற்கு உரித்தான நிதியை வழங்குவதற்கு, தேசிய கல்விக் கொள்கையில் உள்ள கூறுகளை ஏற்றுக்கொண்டாக வேண்டுமென்று நிபந்தனை விதிப்பதற்கான உரிமையை மத்திய அரசுக்கு வழங்கியது யார்?” என்று கேள்வி எழுப்புகிறார் அவர்.

மாவட்டத்திற்கு ஒரு சிறப்புப் பள்ளியாக பி.எம்.ஸ்ரீ பள்ளியும் பிற பள்ளிகள் சாதாரணமானவையாகவும் இருக்கும் எனக் கூறும் மத்திய அரசு, சமத்துவக் கல்வி கோட்பாட்டிற்கு எதிரான இத்தகைய திட்டத்தை ஏற்காமல் போனால் நிதி கிடையாது எனவும் கூறுவது நியாயமல்ல என்றும் விமர்சிக்கிறார் பிரின்ஸ் கஜேந்திர பாபு.

ஒருங்கிணைந்த கல்வித் திட்டத்தின் கீழ் கிடைக்கும் நிதி பள்ளிக் கல்வியின் பல்வேறு நடவடிக்கைகளுக்கு செலவு செய்யப்படும் என்கிறார் பிரின்ஸ் கஜேந்திர பாபு.

அடிப்படையில், “அதை மாணவர்களின் கற்றலுக்கான செலவு எனக் கூறலாம். ஆசிரியர்களுக்கு மற்றும் பள்ளி சார்ந்த பிற ஊழியர்களுக்கு சம்பளம் வழங்குவதற்கு அந்த நிதி வேண்டும். அதோடு, கணினி, அறிவியல் ஆய்வுக்கூடங்களுக்குத் தனியாக பராமரிப்பாளர் நியமிப்பது, விளையாட்டு மைதானத்தைப் பராமரிப்பது, உடற்கல்வி பயிற்றுவிப்பது என அனைத்துக்கும் அந்த நிதி அவசியம்,” என்கிறார் அவர்.

அப்படிப்பட்ட மிக முக்கியமான நிதியை வழங்காமல் தவிர்த்தால் அது மிகப்பெரிய கேடாக முடியும் என எச்சரிக்கிறார் கல்வியாளர் நெடுஞ்செழியன்.

மத்திய அரசை விமர்சிக்க எதுவுமில்லாத காரணத்தால், முதல்வர் மு.க.ஸ்டாலின் இந்தக் குற்றச்சாட்டை முன்வைப்பதாகக் கூறுகிறார் பாஜக மாநில செயற்குழு உறுப்பினர் ராஜலட்சுமி.

பிபிசி தமிழிடம் பேசிய அவர், “தமிழ்நாடு கல்வித்துறையில் நன்கு வளர்ந்துள்ளது. ஆனால், தொடக்கக் கல்வியில் கூட இன்னும் பெரியளவில் முன்னேறாத மாநிலங்களுக்கு கூடுதல் நிதியைக் கொடுப்பதன் மூலம் அவற்றின் வளர்ச்சியை ஊக்குவிக்க முடியும். அத்தகைய மாநிலங்களுக்கு முன்னுரிமை கொடுக்கப்பட வேண்டிய அவசியம் உள்ளது,” என்று தெரிவித்தார்.