காட்டுப்பன்றிகளை சுடுவதற்கு யாருக்கு பயிற்சியும், அதிகாரமும் வழங்க வேண்டுமென்பதையும் அந்த அரசாணை தெரிவித்துள்ளது.

இதன்படி காட்டுப்பன்றிகள் நடமாட்டமுள்ள ஒவ்வொரு வனச்சரகத்திலிருந்தும் களப்பணியாளர்களாகவுள்ள வனவர் மற்றும் வனக்காப்பாளர் ஆகிய இரு நிலைகளில் உள்ள வன ஊழியர்களுக்கு பயிற்சி வழங்கப்படுகிறது.

இவற்றுக்கான உபகரணங்கள், துப்பாக்கி சுடும் பயிற்சி, விழிப்புணர்வு, வேட்டை ஏற்பாடுகள், வாகனங்கள், இறந்த பன்றிகளை அழித்தல், எரித்தல் போன்றவற்றுக்குத் தேவையான செலவினம் வனத்துறை மூலமாக அரசால் வழங்கப்படும் என்று அரசாணையில் தெரிவித்தபடி, ரூ.5 கோடி நிதியும் ஒதுக்கப்பட்டுள்ளது.

கோவையில் உள்ள தமிழ்நாடு வன உயர் பயிற்சியகத்தில் இந்த பயிற்சி வழங்கப்படுகிறது.

இந்த பயிற்சியை வழங்கும் தமிழ்நாடு வன உயர் பயிற்சியகத்தின் முதல்வரான சேவாசிங் பிபிசி தமிழிடம், ”தமிழகம் முழுவதும் உள்ள வன அலுவலர்களுக்கு இந்த மாதம் முழுவதும் ஐந்தாறு பிரிவாக பயிற்சி வழங்கப்படவுள்ளது. காட்டுப்பன்றியை சுடும் பயிற்சியாக மட்டுமின்றி, விளைநிலங்கள் மற்றும் குடியிருப்புகளில் ஊடுருவும் காட்டுயிர்களை துரத்துவது, பாதிப்புக்குள்ளான காட்டுயிர்களை மீட்பது போன்ற பல விதமான பயிற்சி வழங்கப்படவுள்ளது.” என்றார்.

வனத்துறையின் களப்பணியாளர்களுக்குரிய இந்த பயிற்சிக்கான ஒருங்கிணைப்பாளராக ஓய்வு பெற்ற மாவட்ட வன அலுவலர் சந்திரசேகரன் நியமிக்கப்பட்டுள்ளார்.

பயிற்சியில் பங்கேற்பவர்களுக்கு பல்வேறு துறைகளைச் சேர்ந்த வல்லுநர்கள், காட்டுயிர் ஆய்வாளர்கள் ஆகியோரைக் கொண்டு வகுப்புகள் எடுக்கப்படுவதுடன், காட்டையொட்டிய பகுதிகளில் நேரடியாக களப்பயிற்சியும் அளிக்கப்படுகிறது.

துப்பாக்கி சுடுவதற்கான பயிற்சி வழங்குவதற்கு, வனத்துறையில் பணியாற்றும் முன்னாள் ராணுவத்தினர் மட்டுமின்றி, ஆயுதப்படை, அதிரடிப்படை உள்ளிட்ட காவல்துறையின் உயரதிகாரிகளும் பயன்படுத்தப்படுவதாக சந்திரசேகரன் தெரிவித்தார்.

”காட்டுப்பன்றிகளை சுட்டுக்கொல்வது எளிதான காரியமில்லை. இதயம், மூளை, நுரையீரல் பகுதிகளில் சுட்டால் மட்டுமே அவை உடனே இறக்க வாய்ப்புண்டு. இல்லாவிடில் ஓடிவிடும். அத்துடன் காட்டுப்பன்றிகள் இரவு நேரங்களில்தான் வெளியில் வருகின்றன. அதனால் அவற்றைச் சுடும்போது, மற்றவர்களுக்கு எந்த பாதிப்பும் ஏற்படாத வகையில் துப்பாக்கிகளைக் கையாள வேண்டும். அத்துடன் அவற்றைப் பராமரிப்பதும் அவசியம். இவையனைத்துக்கும் பயிற்சி தரப்படுகிறது. கூடுமானவரை சுடாமல் அவற்றை அப்புறப்படுத்த வேண்டுமென்பதையும் இந்த பயிற்சியில் வலியுறுத்திச் சொல்லித் தருகிறோம். ” என்றார் அவர்

காட்டுப்பன்றிகள், காடுகளின் துாய்மைப் பணியாளர் என்பதால், அவற்றைப் பெருமளவில் கொல்வது, காடு, காட்டுயிர்களின் சூழல் மற்றும் வாழ்க்கைச் சுழற்சியைப் பாதிக்கும் என்பதும் இந்த பயிற்சியில் கற்றுத்தரப்படுவதாக, பயிற்சியில் பங்கேற்ற களப்பணியாளர்கள் சிலர் பிபிசி தமிழிடம் தெரிவித்தனர்.

அதனால் வலை வைத்துப் பிடிப்பது, காட்டின் உட்பகுதிகளுக்குத் துரத்துவது ஆகிய நடவடிக்கைகளுக்குப் பின்பு, இறுதி முயற்சியாகவே அவற்றை சுட்டுக்கொல்ல வேண்டுமென்றும் அறிவுறுத்தப்படுகிறது.

இந்த பயிற்சி பெற்ற குற்றாலம் வனச்சரகத்தைச் சேர்ந்த வனவர் சங்கர் ராஜா, ”இந்தப் பயிற்சியில் காட்டுப்பன்றியை கொல்வதை விட, அவற்றை அப்புறப்படுத்துவது எப்படி என்று கற்றுக் கொண்டோம். வனத்துறையில் ஏற்கெனவே பயன்பாட்டிலுள்ள ரைபிள்களுடன் புதிதாக 7.62 ரக துப்பாக்கியை எப்படிக் கையாள்வது, எவ்வளவு துாரத்தில் பன்றி இருந்தால் அதை எப்படி இயக்குவது என்று தெரிந்து கொண்டோம்,” என்றார்.

”காட்டுப்பன்றிகள் இல்லாவிட்டால் காட்டுக்குள் விதை பரவலும், காட்டைத் துாய்மையாக்கும் பணியும் தடுக்கப்படும். வெளியிலிருக்கும் காட்டுப்பன்றிகளை அடர்ந்த காட்டுக்குள் விட்டு விட்டால் மீண்டும் வருவதற்கான வாய்ப்பு குறைவு” என்றார் கடையத்தைச் சேர்ந்த வனவர் அம்பலவாணன்.