அப்பாராவ் குறிப்பிட்ட கிராமங்களில் யாராவது அவரை நினைவில் வைத்திருக்கிறார்களா என்று அறியவே இந்த முயற்சி. பிறகு அப்பாராவின் சமீபத்திய நிலை குறித்த கட்டுரையை பிபிசி வெளியிட்டது.

“பிபிசி கட்டுரையைப் பார்த்ததும் அப்பாராவ் குடும்பத்தினர் மார்ச் 10 அன்று எங்களை தொடர்பு கொண்டனர். உங்கள் முயற்சி பாராட்டத்தக்கது,” என்று பார்வதிபுரம்-மான்யம் மாவட்ட ஆட்சியர் அ. ஷியாம் பிரசாத் பிபிசியிடம் தெரிவித்தார்

“வேலைக்குச் சென்ற என் தந்தை திரும்பி வராதபோது அவர் இறந்துவிட்டார் என்று நினைத்தோம். பிபிசியில் அவரைப் பற்றி படித்தபோது என் தந்தையை நான் அடையாளம் கண்டுகொண்டேன்,” என்று அப்பாராவின் மகள் சய்யம்மா தெரிவித்தார்.

அப்பாராவ் தற்போது தனது மகள் சய்யம்மா வீட்டில் தங்கியுள்ளார்.

ஒடிசாவை சேர்ந்த அப்பாராவ் எப்படி தமிழ்நாட்டில் கொத்தடிமையாக சிக்கிக் கொண்டார், அவர் எப்படி விடுவிக்கப்பட்டார்?

அப்பாராவை சந்திக்க முனக்காயவல்சாவில் உள்ள அவரது மகள் வீட்டிற்கு பிபிசி சென்றது. அங்கு சூழல் கலகலப்பாக இருந்தது.

அப்பாராவின் வேறு சில உறவினர்களும், அவரது சகோதரிகளும் அவரைச் சந்திக்க வந்திருந்தனர். எல்லோரும் சேர்ந்து உணவு சாப்பிட்டபடி 20 வருடங்களுக்கு முந்தைய ஊர் கதைகளை அப்பாராவிடம் சொல்லிக்கொண்டிருந்தார்கள்.

சுக்கையா என்கிற அப்பாராவ் 22 ஆண்டுகளுக்கு முன்பு நடந்ததை பிபிசியிடம் கூறினார்.

“என்னுடை ஊர் ஒடிசாவில் உள்ள சீனவல்லா கிராமம். 2003 இல் சில நண்பர்களுடன் வேலை நிமித்தமாக சென்னைக்குப் புறப்பட்டேன். எங்கே என்று சரியாக ஞாபகம் இல்லை ஆனால்…தமிழ்நாட்டில் ஒரு இடத்தில் தேநீர் அருந்துவதற்காக ரயிலில் இருந்து இறங்கி மீண்டும் ரயிலில் ஏறுவதற்குள் ரயில் கிளம்பி விட்டது. எனவே பாண்டிச்சேரி சென்றுகொண்டிருந்த வேறு ஒரு ரயிலில் ஏறினேன்.

நடுவில் எங்கோ இறங்கி சிவகங்கை மாவட்டம் செல்லும் பேருந்தில் ஏறினேன். அங்கே காபி சாப்பிட்டுக் கொண்டிருந்த போது ஒருவர் என் பெயர், ஊர், வயது போன்ற விவரங்களை கேட்டார். என்னை கிராமத்திற்கு அனுப்பி வைப்பதாக கூறி என்னை தனது வீட்டிற்கு அழைத்துச்சென்றார். அவர் பெயர் அண்ணாதுரை.’

என்னை ஊருக்கு அனுப்பாமல், அன்றிலிருந்து தன் ஆடு, ஆடுகளை மேய்ப்பவராக என்னை ஆக்கிவிட்டார். எப்போது பணம் கேட்டாலும் வங்கிக்கு செல்ல வேண்டும் என 22 ஆண்டுகளாக கூறி வந்தார்,” என்று அவர் குறிப்பிட்டார்.

இறுதியாக 2025 ஜனவரி 31 ஆம் தேதி அதிகாரிகள் அப்பாராவை பற்றி தெரிந்துகொண்டு அவரை விடுவித்தனர்.

“அண்ணாதுரை கைது செய்யப்பட்டார்,” என்று அப்பாராவ் குறிப்பிட்டார்.

அப்பாராவ் தனது குடும்ப உறுப்பினர்கள் மற்றும் சொந்த ஊர் பற்றிய விவரங்களைச் சரியாகச் சொல்ல முடியாததால், தமிழகத்தின் சிவகங்கை மாவட்டத்தில் உள்ள முதியோர் இல்லத்தில் தங்க வைக்கப்பட்டார்.

முதியோர் இல்லத்தில் தங்கியிருந்த அப்பாராவிடம் பிபிசி பேசியது.

அப்போது அவர் பார்வதிபுரம் அருகே உள்ள ஜம்மிதிவல்சா என்றும் ஒடிசாவின் கோராபுட் மாவட்டத்தில் உள்ள ஜம்மிதிவல்சா என்றும் ஊர்களின் பெயர்களை குறிப்பிட்டார்.

அப்பாராவ் குறிப்பிட்ட எல்லா கிராமங்களுக்கும் சென்று அவரது குடும்பத்தினரை கண்டுபிடிக்க பிபிசி முயன்றது. ஆனால் யாருக்கும் அவரைப்பற்றி தெரியவில்லை. அதன்பிறகு இது குறித்து மார்ச் 4 ஆம் தேதி பிபிசியில் செய்தி வெளியிடப்பட்டது.

பார்வதிபுரம் மாவட்ட ஆட்சியரும் சில குழுக்களை பார்வதிபுரத்தின் சில கிராமங்களுக்கு அனுப்பினார், ஆனால் அவர்களுக்கும் வெற்றி கிடைக்கவில்லை.

கொனேரு அப்பாராவின் குடும்பம் மார்ச் 10 ஆம் தேதி கண்டுபிடிக்கப்பட்டது என்று பார்வதிபுரம் கலெக்டர் ஷியாம் பிரசாத் பிபிசியிடம் தெரிவித்தார்.

“ஒடிசா மாநிலம் கோராபுட் மாவட்டத்தைச்சேர்ந்த ஒருவர் பிபிசியில் வந்த செய்தியை பார்த்து என்னை போனில் தொடர்பு கொண்டு, கொனேரு அப்பாராவ் என் சகோதரர். ஆனால் அவரது பெயர் கொனேரு அப்பாராவ் அல்ல கொண்டகோரி சுக்கையா என்றும், கோராபுட் மாவட்டத்தில் உள்ள சீனவாலாடா கிராமத்தை சேர்ந்தவர் என்றும் கூறினார்,” என்று மாவட்ட ஆட்சியர் குறிப்பிட்டார்.

பார்வதிபுரத்தில் உள்ள முனக்காயவல்சா கிராமத்துக்கு புலம்பெயர்ந்து அப்பாராவின் மகள் சய்யம்மாவும், மருமகன் தொம்புதூரா சந்துவும் வசித்து வருகின்றனர் என்று மாவட்ட ஆட்சியர் கூறினார்.