தரங்கம்பாடி கடற்கரையில் கடல் அலைகள் சுமார் 8 அடிக்கு மேல் எழுந்தது. இதனால் தரங்கம்பாடி சுற்றுலா தலம் வெறிச்சோடி காணப்படுகிறது.

சின்னங்குடி கடற்கரையில் அலைகள் ஐந்து அடி உயரம் வரை எழும்பி வருகிறது. மீனவர்கள் தங்களது படகுகளை கடற்கரைகளில் பாதுகாப்பாக நிறுத்தி கட்டி வைத்துள்ளனர்.

மேலும், நாகை மாவட்டத்தில் அதிக கனமழை பெய்துள்ளது.

தமிழ்நாட்டில் அதிகபட்சமாக கோடியக்கரையில் கடந்த 24 மணிநேரத்தில் 250 மி.மீ மழைப்பதிவாகி உள்ளது.

அத்துடன் வேதாரண்யத்தில் 185 மி.மீ மழை, வேளாங்கண்ணியில் 133 மி.மீ மழை திருப்பூண்டியில் 123 மி.மீ மழைப் பதிவாகி உள்ளது.

தூத்துக்குடி மாவட்டத்தில் காயல்பட்டினத்தில் அதிகபட்சமாக 70 மி.மீ மழை பதிவாகியுள்ளது. அதேபோன்று, சிவகங்கை மாவட்டத்தில் இளையாங்குடியில் அதிகபட்சமாக 68 மிமீ மழைப் பதிவாகியுள்ளது.

மேலும் ராமநாதபுரம் மாவட்டத்தில் பாம்பனின் அதிகபட்சமாக 74.2 மிமீ மழைப் பதிவாகியுள்ளது.

கடலூர் மாவட்டத்திற்கு இன்று ரெட் அலர்ட் விடுக்கப்பட்டுள்ளதுடன் புயல் எச்சரிக்கையும் கொடுக்கப்பட்டுள்ளது.

கடலூரில் கடும் கடல் சீற்றம் ஏற்பட்டுள்ளது. கடல் அலைகள் 3 முதல் 5 மீட்டர் உயரத்திற்கும் அதிகமாக எழும்பி வருகின்றன.

மாவட்டம் முழுவதும் அனைத்து துறைகளும் தயார் நிலையில் இருக்க மாவட்ட நிர்வாகம் உத்தரவிட்டுள்ளது.

அதேசமயம், புயல் முன்னெச்சரிக்கை நடவடிக்கையாக பொதுமக்கள் காய்கறி உள்ளிட்ட அத்தியாவசிய பொருட்களை வாங்க கடைகளில் குவிந்து வருகின்றனர்.

புதுச்சேரியில் நான்காம் எண் புயல் எச்சரிக்கை கூண்டு ஏற்றப்பட்டுள்ள நிலையில், கடல் மிகுந்த சீற்றத்துடன் காணப்படுவதால் பொதுமக்கள் மற்றும் சுற்றுலா பயணிகள் கடலில் இறங்க போலீசார் தடை விதித்துள்ளனர்.

புதுச்சேரிக்கு இன்று ரெட் அலர்ட் விடுக்கப்பட்டுள்ளது. அதிகாலை முதல் மழை பெய்ய துவங்கி உள்ளது.

பொதுமக்கள் தேவையில்லாமல் வெளியே செல்வதை தவிர்க்குமாறு பொதுமக்களுக்கு மாவட்ட ஆட்சியர் குலோத்துங்கன் அறிவுறுத்தி உள்ளார்.

புயல் எச்சரிக்கை காரணமாக புதுச்சேரியில் இருந்து ஹைதராபாத் மற்றும் பெங்களூரு செல்லக்கூடிய விமானங்களும் ரத்து செய்யப்பட்டுள்ளன.

திட்வா புயல் காரணமாக கனமழை பெய்வதால், தூத்துக்குடி விமான நிலையத்தில் இருந்து விமான சேவைகள் ரத்து செய்யப்பட்டுள்ளன.

தூத்துக்குடி விமான நிலையத்தில் தினசரி 6 விமான சேவைகள் இயக்கப்படுகின்றன.

சென்னைக்கு 5 விமான சேவைகளும் பெங்களூருவில் இருந்து தூத்துக்குடிக்கு ஒரு சேவையும் இயக்கப்படுகின்றன.

புயல் காரணமாக ஆறு விமான சேவைகளும் இன்று (29-11-25) ரத்து செய்யப்படுவதாக அறிவிக்கப்பட்டுள்ளது.

தூத்துக்குடி ஒட்டப்பிடாரம் சட்டமன்ற தொகுதிக்கு உட்பட்ட கேவிகே சாமி நகர் பகுதியில் சுமார் 300-க்கும் மேற்பட்ட வீடுகளை மழை நீர் சூழ்ந்துள்ளதால் அந்தப் பகுதியைச் சேர்ந்த பொதுமக்களின் இயல்பு வாழ்க்கை பாதிக்கப்பட்டுள்ளது.

மழைநீருடன் கழிவுநீரும் கலந்து துர்நாற்றம் வீச துவங்கியுள்ளதால் தொற்று நோய் அபாயம் ஏற்பட்டுள்ளதாக பொதுமக்கள் புகார் கூறுகின்றனர்.

அதேபோன்று, நாகை நகராட்சிக்குட்பட்ட வள்ளியம்மை நகர் பகுதிக்குள் மழை நீர் புகுந்தது.

திருவாரூர் மாவட்டத்தில் மழையால் பாதிக்கப்பட்ட பயிர்களை தமிழ்நாடு தொழில் துறை அமைச்சர் டிஆர்பி ராஜா நேரில் பார்வையிட்டார்.

அதன்பின் அவர் செய்தியாளர்களிடம் பேசுகையில், “திருவாரூர் மாவட்டத்தை பொறுத்தவரை 1 லட்சத்து 46 ஆயிரம் ஹெக்டேர் சம்பா – தாளடி பயிர் செய்யப்பட்ட நிலையில், 15,000 ஹெக்டேர் அளவுக்கு தற்போது நீரில் மூழ்கி இருக்கின்றன.” என்றார்.

அதிகபட்சமாக முத்துப்பேட்டையில் மட்டும் 7 ஆயிரம் ஹெக்டேர் அளவுக்கு பயிர்கள் நீரில் மூழ்கியுள்ளன என்றார் அவர்.

– இது, பிபிசிக்காக கலெக்டிவ் நியூஸ்ரூம் வெளியீடு