கட்சிக்கும் தலைமைக்கும் அவப்பெயர் விளைவிப்பது போல் ஒருவர் செயல்பட்டு வருகிறார் என்று பெயர் குறிப்பிடாமல் அறிக்கையில் துரை வைகோ தெரிவித்துள்ளார்.

யார் அந்த ஒருவர் என்று பிபிசி தமிழ், அக்கட்சியின் துணைப் பொதுச்செயலாளர் தி.மு.ராஜேந்திரனிடம் கேட்டது.

“நாளை (ஏப்ரல் 20) அன்று நடைபெறும் நிர்வாகக் குழு கூட்டத்தில் இந்த அறிக்கை தொடர்பாக விசாரிக்கப்பட்டு அந்த ‘ஒருவர்’ மீது நடவடிக்கை மேற்கொள்ளப்படும்,” என்று கூறினார் ராஜேந்திரன்.

மேற்கொண்டு பேசிய அவர், “கட்சியில் துரை வைகோவே முதன்மைச் செயலாளராக தொடர வேண்டும் என்பது தான் எங்கள் அனைவரின் கருத்தும் ஆசையும். எனவே நாளை நடைபெறும் நிர்வாகக் குழு கூட்டத்தில் துரை வைகோ தன்னுடைய அறிக்கையில் குறிப்பிடப்பட்டிருக்கும் அதிருப்தியை நிவர்த்தி செய்து, அவருடைய பணியைத் தொடர அவரிடம் வேண்டுகோள் வைக்கப்படும்,” என்று கூறினார்.

இந்த விவகாரம் தொடர்பாக பிபிசி தமிழிடம் பேசிய, அக்கட்சியின் முன்னாள் மாணவரணி துணைச் செயலாளர் சத்தியகுமரன், அந்த ஒருவர் ‘மல்லை சத்யா’ என்று குறிப்பிட்டார்.

“மதிமுகவின் துணைப் பொதுச்செயலாளரான மல்லை சத்யா, துரை வைகோவுக்கு பதவி வழங்கப்பட்ட காலத்தில் இருந்தே கட்சிக்கு எதிராக செயல்பட்டு வருகிறார்,” என்று குறிப்பிட்டார் சத்தியகுமரன்.

“துரை வைகோ, பொதுக்குழு உறுப்பினர்களால் தேர்வு செய்யப்பட்டவர். அவரின் தேர்வையும், பொதுக்குழுவின் முடிவையும் எதிர்த்து கடந்த நான்கு ஆண்டுகாலமாக அவர் செயல்பட்டு வருகிறார். துரை வைகோவின் வளர்ச்சி இங்குள்ள கட்சிகள் மத்தியில் அச்சத்தை ஏற்படுத்தியுள்ளது. அவரை எதிர்த்து கட்சிக்கு அவப்பெயர் பெற்றுத்தரும் செயல்பாட்டில் ஈடுபட்டு வருகிறார் மல்லை சத்யா,” என்றும் குறிப்பிட்டார் அவர்.

துரை வைகோ விலகியது மற்றும் குற்றச்சாட்டுகள் குறித்து பிபிசி தமிழ் மல்லை சத்யாவிடம் பேசியபோது, “இந்த விவகாரம் தொடர்பாக எதுவாக இருந்தாலும் நிர்வாகக் குழு கூட்டம் முடிந்த பின்பு அறிவிப்பேன்,” என்று தெரிவித்தார்.