பல சந்தர்ப்பங்களில், துளசி மத நூலான பகவத் கீதையைப் பற்றிப் பேசுவதையும், பாடல்களைப் பாடுவதையும் காண முடிந்தது. துளசி முதன்முறையாக நாடாளுமன்றத்திற்கு வந்தபோது, ​​கீதையின் மீது சத்தியம் செய்தார் என்பதும் குறிப்பிடத்தக்கது.

மேலும் பதவியேற்ற பிறகு, “எனது நாட்டுக்காகவும் மற்றவர்களுக்காகவும் என் வாழ்க்கையை அர்ப்பணிக்க, பகவத் கீதை என்னைத் தூண்டுகிறது” என்று துளசி கூறினார். 2020ஆம் ஆண்டின் கொரோனா பேரிடர்க் காலத்தில், உலகம் கடினமான சூழலைக் கடந்த போது, ​​துளசி ஜனநாயகக் கட்சியின் சார்பாக அதிபர் போட்டிக்கான வேட்பாளராக இருந்தார்.

அப்போது கீதை பற்றிய ஒரு காணொளியை வெளியிட்டு, “தற்போதைய சூழல் மத்திய கிழக்கில் பணியமர்த்தப்பட்ட காலத்தை எனக்கு நினைவூட்டுகிறது. அந்த நேரத்திலும், என் உயிருக்கு ஒவ்வொரு கணமும் ஆபத்து இருந்தது. இன்று போலவே, பலர் தங்கள் உயிரை இழந்தனர். அன்றும் இன்றும், பகவத் கீதை எனக்கு ஆதரவளித்துள்ளது,” என்று தெரிவித்தார்.

கடந்த 2021ஆம் ஆண்டு வங்கதேசத்தில் துர்கா பூஜையின்போது வன்முறை வெடித்து, 100க்கும் மேற்பட்ட இந்து குடும்பங்கள் தாக்கப்பட்டன. அப்போது, பல இந்து கோவில்கள், வீடுகள் மற்றும் கடைகளைச் சேதப்படுத்திய வழக்குகள் பதிவாகியுள்ளன.

இந்தத் தாக்குதல்களைக் கண்டித்து தனது எக்ஸ் பக்கத்தில் ஒரு வீடியோ செய்தியை வெளியிட்டார் துளசி. “வங்கதேச கோவில்களில் பக்தர்களுக்கு எதிராக இவ்வளவு வெறுப்பு மற்றும் வன்முறை நடப்பதைக் காணும்போது என் இதயம் உடைகிறது. கோவில்களையும் சிலைகளையும் எரித்து அழிப்பது தங்கள் கடவுளை மகிழ்விக்கிறது என்ற இந்த ஜிஹாதிகளின் நம்பிக்கை, அவர்கள் உண்மையில் கடவுளிடம் இருந்து எவ்வளவு தூரமாக இருக்கிறார்கள் என்பதைக் காட்டுகிறது.

இந்துக்கள், கிறிஸ்தவர்கள், பௌத்தர்கள் உள்பட அந்நாட்டின் மதச் சிறுபான்மையினரை ஜிஹாதி வெறுப்பு சக்திகளிடம் இருந்து, வங்கதேசத்தின் மதச் சார்பற்ற அரசாங்கம் பாதுகாக்க வேண்டிய நேரம் இது,” என்று அந்த வீடியோவில் அவர் கூறியிருந்தார்.

முன்னதாக, வங்கதேசம் மற்றும் பாகிஸ்தானில் உள்ள இந்துக்கள் மற்றும் பிற சிறுபான்மையினர் பாதுகாப்பு தொடர்பான ஒரு திட்டத்தை துளசி கப்பாட் அமெரிக்க நாடாளுமன்றத்தில் முன்வைத்திருந்தார்.

இந்தத் திட்டத்தை முன்வைக்கும்போது, ​​1971ஆம் ஆண்டு வங்கதேசத்தில் இந்துக்களுக்கு எதிரான அட்டூழியங்கள் தொடங்கியதாகவும், இதற்கு பாகிஸ்தான் ராணுவமே காரணம் என்றும் அவர் கூறியிருந்தார்.

கடந்த 2019ஆம் ஆண்டு ஆகஸ்ட் 5ஆம் தேதியன்று, நரேந்திர மோதி அரசாங்கம் 370வது பிரிவை நீக்கி ஜம்மு-காஷ்மீரின் சிறப்பு அந்தஸ்தை ரத்து செய்தது. ஜம்மு-காஷ்மீர் மற்றும் லடாக் என இரண்டு தனித்தனி யூனியன் பிரதேசங்களாகப் பிரிக்கப்பட்டது.

அதையடுத்து, செப்டம்பர் 2019இல், துளசி கப்பார்டிடம் காஷ்மீர் குறித்து ஒரு கேள்வி கேட்கப்பட்டது. அதற்கு பதிலளிக்கும் விதமாக, “காஷ்மீர் பிரச்னை சிக்கலானது, கடந்த காலத்தில் அங்கு என்ன நடந்திருந்தாலும், பல குடும்பங்கள் தங்கள் வீடுகளை விட்டு வெளியேற வேண்டியிருந்தது, அவர்களால் இன்னும் திரும்பி வர முடியவில்லை” என்று துளசி தெரிவித்தார்.

மேலும், 370வது பிரிவைக் குறிப்பிடாமல், “முந்தைய அரசின் சட்டங்கள் மற்றும் கொள்கைகளின்படி, தன்பால் ஈர்ப்பு இங்கு சட்டவிரோதமானது. இந்தக் கொள்கைகளால் பெண்களின் குரல் ஒடுக்கப்பட்டது. சில நாட்களுக்கு முன்பு, காஷ்மீர் பெண்களுக்கு சொத்துரிமை இல்லை என்று என்னிடம் சொன்ன ஒரு பெண்ணை நான் சந்தித்தேன். எந்தவொரு இறையாண்மை கொண்ட நாட்டின் அரசாங்கமும் அனைத்து வகையிலும் செயல்பட வேண்டும்,” என்று கூறினார்.