தொகுதி மறுவரையறை தொடர்பான கூட்டு நடவடிக்கை குழு கூட்டம் சென்னை கிண்டியில் உள்ள நட்சத்திர ஓட்டலில் இன்று (மார்ச் 22) நடைபெற்றது. தமிழ்நாடு முதலமைச்சர் மு.க,ஸ்டாலின் தலைமையில் நடைபெற்ற இந்த கூட்டத்தில் கேரள முதல்வர் பினராயி விஜயன், தெலங்கானா முதல்வர் ரேவந்த் ரெட்டி, பஞ்சாப் முதல்வர் பகவந்த் மான், கர்நாடக துணை முதல்வர் டி.கே.சிவகுமார் மற்றும் பல்வேறு முக்கிய அரசியல் கட்சிகளின் தலைவர்கள் பங்கேற்றனர்.

மொத்தம் 24 கட்சிகளைச் சேர்ந்த தலைவர்கள் இந்த கூட்டத்தில் பங்கேற்றனர். ஒவ்வொரு தலைவர்களின் மேஜையின் மீதும் அவர்களின் தாய்மொழி மற்றும் ஆங்கிலம் என இரு மொழிகளில் பெயர்ப் பலகைகள் வைக்கப்பட்டிருந்தன.

கூட்டத்தில் பேசிய தமிழ்நாடு முதலமைச்சர் ஸ்டாலின், “நாட்டில் உள்ள ஒவ்வொரு மாநிலமும் பல்வேறு மொழிகள், இனங்கள், வழிபாட்டு நம்பிக்கைகள், பண்பாடு, உடைகள், உணவுகள் என பழக்க வழக்கங்களைக் கொண்டுள்ளன. இத்தகைய மாநிலங்கள் சுயாட்சியுடன் செயல்பட்டால் தான் உண்மையான கூட்டாட்சி உருவாக முடியும்” எனக் கூறினார்.

தொடர்ந்து தொகுதி மறுசீரமைப்பு குறித்துப் பேசிய ஸ்டாலின், மக்கள் தொகை அடிப்படையிலான தொகுதி மறுசீரமைப்பு என்பது நம்மைப் போன்ற மாநிலங்களை வெகுவாக பாதிக்கும் என்று குறிப்பிட்டார்.

“பல்வேறு சமூகநலத் திட்டங்கள் மூலமாக மக்கள் தொகையைக் கட்டுப்படுத்திய மாநிலங்கள், மக்களவைத் தொகுதி எண்ணிக்கையில் பிரநிதித்துவத்தை இழக்க நேரிடும். எனவே இதனை கடுமையாக எதிர்க்க வேண்டிய காலகட்டத்தில் இருக்கிறோம்” எனவும் முதலமைச்சர் ஸ்டாலின் பேசினார்.

“மக்கள்தொகை அடிப்படையிலான தொகுதி மறுசீரமைப்பை ஏற்க முடியாது” எனக் கூறிய ஸ்டாலின், இது வெறும் எண்ணிக்கையைப் பற்றியது மட்டும் அல்ல, அதிகாரம் மற்றும் எதிர்கால நலன்களை உள்ளடக்கியதாக உள்ளதாகவும் அவர் குறிப்பிட்டார்.

“தொகுதிகளின் எண்ணிக்கையை குறைக்க அனுமதித்தால் சொந்த நாட்டில் அரசியல் அதிகாரம் இழந்த குடிமக்களாக மாறும் அபாயம் ஏற்படும். எனவே தான் இந்த விவகாரத்தை சாதாரணமாக கடந்து போகக் கூடாது என தான் கூறுவதாகவும்” ஸ்டாலின் தெரிவித்தார்.

மக்கள் தொகை அடிப்படையில் தொகுதி மறுசீரமைப்பு நடந்தால் தமிழ்நாடு எட்டு இடங்களை இழக்கும் எனக் கூறிய ஸ்டாலின், “மக்களிடம் விழிப்புணர்வை ஏற்படுத்துவதற்கு இந்தக் கூட்டம் அவசியம். அரசியல் மற்றும் சட்ட நடவடிக்கைளை மேற்கொள்ளும் ஒரு குழுவை முன்மொழிகிறேன்” எனக் கூறினார்.