சிஎஸ்கே அணிக்கு கேப்டனாக இருந்தகாலத்தில் அந்த அணியை 11 முறை அரையிறுதிக்கு தோனி அழைத்துச் சென்றுள்ளார், 5 முறை 2வது இடம் பிடித்துள்ளது. தோனி கேப்டனாக இருந்தவரை சிஎஸ்கே லீக் சுற்றோடு 2 முறைதான் வெளியேறியிருக்கிறது.

சிஎஸ்கே அணியை தோனி அந்த அளவு விரும்பினார், காதலித்தார், அந்த அணியை பார்த்துப் பார்த்து செதுக்கினார், வீரர்களை உருவாக்குவதில் முக்கியப் பங்காற்றினார் என்று சொல்லலாம்.

43 வயதிலும் தோனி இன்னும் உத்வேகத்தோடு, புத்துணர்சியுடன் உடற்தகுதியை பராமரித்து விக்கெட் கீப்பிங் செய்வது உண்மையில் பிரமிக்க வைக்கிறது. இந்த வயதிலும் உலகக் கிரிக்கெட்டில் அதிவேகத்தில் விக்கெட் கீப்பிங் யாரும் செய்ய முடியாத அளவுக்கு தோனி களத்தில் ஜொலிக்கிறார். ஆனால் பேட்டிங் என்று வரும்போது மட்டும் 9-வது வீரராகவும், 7-வது வீரராகவும் தோனி களமிறங்கியது ரசிகர்கள் மத்தியில் விமர்சனத்தை கிளப்பியுள்ளது.

இந்த விஷயம்தான் இன்று சமூக வலைத்தளங்களில் விவாதப்பொருளாக மாறியுள்ளது. ஏனென்றால் இந்த ஐபிஎல் சீசனில் சிஎஸ்கே அணி 3 போட்டிகளில் விளையாடி 2 ஆட்டங்களில் தோல்வி அடைந்தது. ஆனால், ஆர்சிபி அணிக்கு எதிராக சென்னையில் நடந்த ஆட்டத்தில் 9வது வீரராக தோனி களமிறங்கி தோல்விக்கு காரணமாகியது கடும் விமர்சனங்களை கிளப்பியது.

குவஹாட்டியில் நேற்று நடந்த ராஜஸ்தான் அணிக்கு எதிரான ஆட்டத்தில் 7வது வீரராக தோனி களம் இறங்கினார். முன்புபோல் விளையாட அவரது மனம் விரும்பினாலும், உடல் ஒத்துழைக்கிறதா என்பது கேள்விக்குறியாக உள்ளது.

தோனி 9-வது வீரராக களமிறங்கியது குறித்து சிஎஸ்கே அணியின் பயிற்சியாளர் ஸ்டீபன் பிளெம்மிங் அளித்த விளக்கத்தில் ” தோனியின் உடலும் முழங்கால்களும் முன்பு போல் இல்லை. அவரால் நன்றாக நகர முடிகிறது. ஆனால், அவரால் தொடர்ந்து 10 ஓவர்கள் முழுமையாக பேட்டிங் செய்ய முடியாது. எனவே அவர் நமக்கு என்ன கொடுக்க முடியும் என்பதை அன்றைய தினம் மதிப்பிடுவார். ஆட்டம் சமநிலையில் இருந்தால், அவர் சற்று முன்னதாகவே செல்வார். மற்ற சமயங்களில் அவர் மற்ற வீரர்களுக்கு ஆதரவாக இருப்பார்.

அதற்காக, 43 வயதான தோனியை அணியில் தொடர்ந்து தக்க வைப்பதற்கான வழிகளை சிஎஸ்கே நிர்வாகம் கண்டுபிடித்து வருகிறது என்று அர்த்தமல்ல. கடந்த ஆண்டும் நான் சொன்னேன், அவர் எங்களுக்கு மிகவும் மதிப்பு மிக்க ஒரு வீரர். தலைமைத்துவம் மற்றும் விக்கெட் கீப்பிங் திறன் கொண்ட அவர் சிறப்பானவர். 10 ஓவர்கள் களத்தில் பேட்டிங் செய்வது என்பதை அவர் ஒருபோதும் செய்ததில்லை. சுமார் 13-14 ஓவர்களில் ஆட்டத்தின் நிலைமையைப் பொருத்து அவர் களமிறங்க விரும்புகிறார்” என்று பிளமிங் தெரிவித்தார்.

ஆனால், 20 ஓவர்கள் களத்தில் விக்கெட் கீப்பிங்கை நின்றுகொண்டே செய்யும் தோனியால், சிஎஸ்கேஅணிக்கு தேவைப்படும் நேரத்தில் “ஆங்கர் ரோல்” எடுத்து பேட் செய்யவோ, அல்லது “பிஞ்ச் ஹிட்டர்” போல் அதிரடியாக ஆடிக்கொடுக்கவோ முடியாதா? 20 ஓவர்கள் விக்கெட் கீப்பிங் செய்த தோனியால் 4வது 5வது வீரராக களமிறங்கி அணிக்காக 5 ஓவர்கள் விளையாடமாட்டாரா? என்று ரசிகர்கள் சமூக வலைத்தளங்களில் கேள்வி எழுப்பியுள்ளனர்.

ஆர்சிபி அணிக்கு எதிராக சென்னையில் 17 ஆண்டுகளுக்குப்பின் சிஎஸ்கே அணி தோல்வி அடைந்ததற்கான காரணங்களைப் பட்டியலிட்டால் நிச்சயமாக தோனியும் ஒரு காரணமாக இருப்பார் என்று ரசிகர்கள் ஆதங்கத்தை வெளிப்படுத்தியுள்ளனர்.

சிஎஸ்கே அணி இக்கட்டான கட்டத்தில் இருந்தபோதுகூட 13 அல்லது 14வது ஓவரிலேயே களமிறங்கியிருக்க வேண்டிய தோனி, தோல்வி என உறுதி செய்தவுடன் 9-வது வீரராக களமிறங்கியதை சிஎஸ்கே ரசிகர்களால் ஜீரணிக்க முடியவில்லை.