ஜகன் நாத் ஸ்யால் ஒரு ஓய்வு பெற்ற பள்ளி முதல்வர். இந்தியன் எக்ஸ்பிரஸ் பத்திரிகையின்படி ஜகன் நாத் ஸ்யால், அவரது மனைவி வீனா ஸ்யால் இருவரும் தற்போது கோவையில் தங்கள் மகன் நமனின் வீட்டில் இருக்கிறார்கள்.

தங்கள் பேத்தி ஆர்யா ஸ்யாலை பார்த்துக்கொள்வதற்காக இரண்டு வாரங்களுக்கு முன்பு காங்ராவில் இருந்து கோவை வந்ததாக அவர் இந்தியன் எக்ஸ்பிரஸ் பத்திரகைக்குத் தெரிவித்தார். நமனின் மனைவி கொல்கத்தாவில் பயிற்சியில் ஈடுபட்டிருக்கிறார்.

2009ஆம் ஆண்டு தேசிய பாதுகாப்பு அகாடெமியில் இருந்து தேர்ச்சி பெற்று ராணுவத்தில் இணைந்தார் நமான்ஷ் ஸ்யால். அவர் படிப்பில் மிகவும் சிறந்தவர் என அவரது தந்தை கூறினார்.

“இந்த சம்பவம் பற்றி அறிவிக்க வந்த விமானப் படை அதிகாரியிடம் என் மகனின் உடல் எப்போது வரும் என்று கேட்டேன். அவரால் உறுதியாக ஒரு நேரத்தைச் சொல்ல முடியவில்லை. ஆனால் மீதமுள்ள நடைமுறைகள் முடிய இரண்டு நாள்கள் ஆகும் என்று கூறினார்” என நமான்ஷின் தந்தை இந்தியன் எக்ஸ்பிரஸ் பத்திரிகையிடம் தெரிவித்தார்.

இமாச்சல பிரதேசத்தின் ஹமிர்பூர் தொகுதி எம்பி-யான அனுராக் தாக்கூர் தன் வருத்தத்தை எக்ஸ் தளத்தில் பதிவிட்டார். “துபை கண்காட்சியில் நடந்த தேஜஸ் விமான விபத்தில் இமாச்சல பிரதேசத்தின் காங்ரா மாவட்டத்தைச் சேர்ந்த நமான்ஷ் ஸ்யால் அவர்கள் உயிரிழந்த செய்தி பெரும் வலியை ஏற்படுத்தியுள்ளது” என்று அவர் எழுதியிருந்தார்.

இந்தியாவின் பாதுகாப்புத் துறை அமைச்சரான ராஜ்நாத் சிங் தன் எக்ஸ் பக்கத்தில், “துபை விமான கண்காட்சியில் ஏரோபேட்டிங் காட்சியின்போது ஒரு தைரியமான இந்திய விமானப்படை விமானி உயிரிழந்த செய்து பெரும் துயரத்தை ஏற்படுத்தியிருக்கிறது. வருத்தத்தில் வாடும் அவருடைய குடும்பத்துக்கு என்னுடைய அனுதாபங்கள். இந்தத் தருணத்தில் இந்த மொத்த தேசமும் அவருடைய குடும்பத்துடன் நிற்கும்” என்று பதிவிட்டிருந்தார்.

இந்தியாவின் பாதுகாப்புப் படைத் தலைவர் ஜெனரல் சௌஹான் மற்றும் இந்திய ராணுவத்தின் அனைத்து நிலை அதிகாரிகளும் இந்த தேஜஸ் விமான விபத்து நிகழ்வுக்கு தங்கள் அஞ்சலியைத் தெரிவித்திருக்கின்றனர்.

ஒற்றை எஞ்சின் கொண்ட தேஜஸ் போர் விமானம் இந்துஸ்தான் ஏரோனாடிக்ஸ் லிமிடட் நிறுவனத்தால் முழுக்கவும் உள்நாட்டிலேயே தயாரிக்கப்பட்டது.

இந்த விமானம் தொலைதூரத்தில் உள்ள எதிரி விமானங்களைக் குறிவைக்கும் திறன் கொண்டது. மேலும் எதிரி ரேடாரைத் தகர்க்கும் திறனையும் பெற்றுள்ளது. இது, அதிக எடையுடைய சுகோய் விமானத்துக்கு இணையான அளவு ஆயுதங்களையும் ஏவுகணைகளையும் ஏந்தும் திறன் கொண்டது.

2004ம் ஆண்டு முதல் மேம்படுத்தப்பட்ட F404-GE-IN20 எஞ்சினை தேஜஸ் விமானம் பயன்படுத்தி வருகிறது. தேஜஸ் மார்க் 1 ரக விமானம் F404 IN20 எஞ்சினைப் பயன்படுத்துகிறது.

மார்க் 1ஏ ரக விமானம் அதே எஞ்சினைப் பயன்படுத்தும். அதேசமயம் எதிர்காலத்தில் மார்க் 2 ரக விமானம் இன்னும் சக்தி வாய்ந்த F414 INS6 எலக்ட்ரிக் எஞ்சினைப் பயன்படுத்தும்.

தேஜஸ் போர் விமானம் சுகோய் போர் விமானங்களை விட எடை குறைவானவை. எட்டு முதல் ஒன்பது டன் வரை சுமந்து செல்லும் திறன் கொண்டவை. அவை மேக் (mach) 1.6 முதல் 1.8 வரை, அதாவது ஒலி வேகத்தில், 52,000 அடிவரை உயரத்தில் பறக்கக்கூடியவை.

மின்னணு முறையில் ஸ்கேன் செய்யப்படும் அதிர்வெண் ரேடார் (Electronically-Scanned Radar), கண் காணாத தூரத்தைக் கடந்தும் தாக்கும் திறன் கொண்ட BVR ஏவுகணைகள், மின்னணு போரியல் அமைப்பு (Electronic Warfare Suite), மற்றும் வானில் எரிபொருள் நிரப்பும் வசதி (Air-to-Air Refuelling) உள்ளிட்ட தொழில்நுட்பங்கள் தேஜஸ் விமானத்தில் பயன்படுத்தப்பட்டுள்ளன.

இந்த ஆண்டு செப்டம்பர் மாதம், இந்திய பாதுகாப்பு அமைச்சகம் 97 தேஜஸ் விமானங்களை வாங்குவதற்காக இந்துஸ்தான் ஏரோனாடிக்ஸ் லிமிடட் உடன் ஒப்பந்தம் கையெழுத்திட்டது. 2027 முதல் அந்த விமானங்கள் பாதுகாப்புத் துறைக்கு வழங்கப்படும்.

முன்னதாக, 2021ம் ஆண்டு இவ்விரு தரப்புகளுக்கு இடையே 83 தேஜஸ் விமானங்களுக்கான ஒப்பந்தம் கையெழுத்தானது. 2024ம் ஆண்டிலிருந்து டெலிவரி கொடுக்கப்படும் என்று எதிர்பார்க்கப்பட்டிருந்த நிலையில் அமெரிக்காவிலிருந்து இறக்குமதி செய்யப்பட்ட எஞ்சின்கள் போதுமான அளவு இல்லாததால் அது தாமதமானது.

– இது, பிபிசிக்காக கலெக்டிவ் நியூஸ்ரூம் வெளியீடு