பட மூலாதாரம், Alok Kumar Kanungo
இந்தியாவின் வடகிழக்கு மாநிலமான நாகாலாந்தில் இருந்து கொண்டு செல்லப்பட்ட 19-ஆம் நூற்றாண்டைச் சார்ந்த மண்டை ஓடு, கடந்த மாதம் பிரிட்டனில் ஏலத்திற்கு வைக்கப்பட்டதை கண்டு எலன் கொன்யாக் அதிர்ச்சியடைந்தார்.
நாகலாந்து மாநிலத்தில் இருந்து, ஐரோப்பிய காலனித்துவ நிர்வாகிகள் சேகரித்த ஆயிரக்கணக்கான பொருட்களில், நாகா பழங்குடியினரின் கொம்பு மண்டை ஓடும் அடங்கும்.
இந்த மனித எச்சங்களை திரும்ப கொண்டு வருவதற்கான முயற்சிகளை மேற்கொண்டு வரும் நாகா நல்லிணக்க மன்றத்தின் (Forum for Reconciliation- NFR) உறுப்பினர் கொன்யாக், ஏலம் பற்றிய செய்தி தன்னை தொந்தரவு செய்ததாக கூறுகிறார்.
“21-ஆம் நூற்றாண்டில் நமது மூதாதையரின் மனித எச்சங்களை மக்கள் இன்னும் ஏலம் விடுவதைப் பார்ப்பது அதிர்ச்சியாக இருந்தது,” என்று அவர் கூறினார். “உணர்ச்சியற்ற இந்த செயல் மிகவும் புண்படுத்தியது ” என்றும் அவர் குறிப்பிட்டார்.
பிரிட்டனைத் தளமாகக் கொண்ட பழங்கால பொருட்களின் மையமான,’ ஸ்வான் அட் டெட்ஸ்வொர்த்’ இந்த மண்டை ஓட்டை ஏலத்தில் வைத்தது.
இது அவர்களின் “கியூரியஸ் கலெக்டர்ஸ் சேல்”-ன் (Curious Collector Sale) ஒரு பகுதியாக விளம்பரப்படுத்தப்பட்டது. இதன் மதிப்பு 4,490 டாலர் முதல் 5,132 டாலர் வரை என நிர்ணயிக்கப்பட்டது.
இந்த மண்டை ஓட்டுடன் தென் அமெரிக்காவின் ஜிவாரோ மக்களின் சுருங்கிய தலைகளும், மேற்கு ஆப்ரிக்காவின் எகோய் மக்களின் மண்டை ஓடுகளும் விற்பனையில் பட்டியலிடப்பட்டிருந்தன.
மண்டை ஓடு விற்பனைக்கு எதிர்ப்பு
கொன்யாக்கின் சொந்த மாநிலமான நாகாலாந்தின் முதலமைச்சர், இந்திய வெளியுறவு அமைச்சகத்திற்கு ஒரு கடிதம் எழுதினார்.
இந்தச் செயலை “மனிதாபிமானமற்றது ” மற்றும் “எங்கள் மக்கள் மீதான காலனித்துவ வன்முறையின் தொடர்ச்சி ” என்று அக்கடிதத்தில் முதலமைச்சர் விவரித்தார்.
எதிர்ப்பைத் தொடர்ந்து ஏல நிறுவனம் தனது விற்பனையைத் திரும்பப் பெற்றது .
இந்த நிகழ்வு , நாகா மக்களுக்கு அவர்களின் கடந்த காலத்தில் நடந்த வன்முறைச் சம்பவங்களை மீண்டும் நினைவூட்டியது.
அவர்களின் தாய்நாட்டிலிருந்து வெகு தொலைவில் சேமிக்கப்பட்ட அல்லது காட்சிக்கு வைக்கப்பட்டுள்ள அவர்களின் மூதாதையர் எச்சங்களை திரும்ப பெறுவதற்கான முயற்சிகளை மேற்கொள்ள அவர்களைத் தூண்டியது.
பட மூலாதாரம், Alok Kumar Kanungo
மீண்டும் தாயகம் அனுப்பும் சவாலான பணி
இந்த மனித எச்சங்கள் பண்டமாற்று பொருட்கள் அல்லது பரிசுகளாக இருக்கலாம் என்று அறிஞர்கள் தெரிவிக்கின்றனர். ஆனால் மற்றவை அவற்றின் உரிமையாளர்களின் அனுமதியின்றி எடுத்துச் செல்லப்பட்டிருக்கலாம்.
பிரிட்டனின் பொது அருங்காட்சியகங்கள் மற்றும் தனியார் சேகரிப்புகளில் மட்டும் சுமார் 50,000 நாகா பொருட்கள் இருப்பதாக, நாகா கலாசார அறிஞரான அலோக் குமார் கனுங்கோ மதிப்பிட்டுள்ளார்.
ஆக்ஸ்போர்டு பல்கலைக்கழகத்தின் பிட் ரிவர்ஸ் அருங்காட்சியகம் மிகப்பெரிய நாகா சேகரிப்பைக் கொண்டுள்ளது.
நாகாலாந்து மாநிலத்திலிருந்து எடுக்கப்பட்ட 41 மனித எச்சங்கள் உட்பட தோராயமாக 6,550 பொருட்கள் அங்கு உள்ளன.
இந்த அருங்காட்சியகத்தில் பிரிட்டிஷ் இந்தியாவின் பல மாநிலங்களைச் சேர்ந்த மனித எச்சங்களும் உள்ளன .
ஆனால் சமீபத்திய ஆண்டுகளில், மனித எச்சங்களை சேகரிப்பது, விற்பனை செய்வது மற்றும் காட்சிப்படுத்துவது பற்றிய கவலைகள் அதிகரித்து வருவதால், பல சேகரிப்பாளர்கள் தங்கள் அணுகுமுறையை மறுபரிசீலனை செய்கிறார்கள் என்று நிபுணர்கள் கூறுகிறார்கள்.
மனித எச்சங்கள் அருங்காட்சியகங்களுக்கு ‘தேவையற்ற’ ஒன்றாக மாறிவிட்டதாக கனுங்கோ கூறுகிறார்.
“மனித எச்சங்கள், இனி அதன் உரிமையாளர்களால் அப்புறப்படுத்தப்படக்கூடிய அல்லது அவர்கள் வைத்திருக்கக்கூடிய ஒரு பொருளல்ல; இனி சுற்றுலாப் பயணிகளைக் கவர்ந்து பணம் சம்பாதிப்பதற்கான வழியும் அல்ல. மேலும் நாகா மக்களை ‘நாகரிகமற்றவர்கள்’ என்று காட்டுவதற்கு அவர்கள் இனி அவற்றை பயன்படுத்த முடியாது; சமீபகாலமாக, இது உணர்வு ரீதியிலும் அரசியல் ரீதியிலும் சிக்கலான பிரச்னையாக மாறியுள்ளது.” என்கிறார் கனுங்கோ.
எனவே, அருங்காட்சியகங்கள் நியூசிலாந்தின் மவோரி பழங்குடியினர், தைவானின் முடான் போர்வீரர்கள், ஆஸ்திரேலியாவின் பழங்குடியினர் மற்றும் பூர்வீக ஹவாய் மக்கள் போன்ற சமூகங்களின் மனித எச்சங்களைத் திருப்பி அனுப்பத் தொடங்கியுள்ளன.
கடந்த 2019-ஆம் ஆண்டில், இதுபோன்ற 22 பொருட்களை திருப்பி அளித்ததாக பிட் ரிவர்ஸ் அருங்காட்சியகம் பிபிசியிடம் தெரிவித்துள்ளது.
“இந்த எண்ணிக்கை தற்போது 35 ஆக உயர்ந்துள்ளது. இதுவரை இந்த பொருட்கள் அனைத்தும் ஆஸ்திரேலியா, நியூசிலாந்து, அமெரிக்கா மற்றும் கனடாவுக்கு திருப்பி அனுப்பப்பட்டுள்ளன” என்று பிட் ரிவர்ஸ் அருங்காட்சியக செய்தித் தொடர்பாளர் ஒருவர் பிபிசியிடம் கூறினார்.
பட மூலாதாரம், Arkotong Longkumer & Meren Imchen
கிராமத்தினருக்கு விழிப்புணர்வு
இது தொடர்பான நெறிமுறை ஆய்வின் ஒரு பகுதியாக, பிட் ரிவர்ஸ் அருங்காட்சியகம், 2020 இல் நாகா மண்டை ஓடுகளை பொதுக் காட்சியில் இருந்து அகற்றி அவற்றை சேமிப்பகத்தில் வைத்தது.
“நாகா இன வம்சாவளியினரிடமிருந்து இன்னும் முறையான உரிமை கோரப்படவில்லை. மனித எச்சங்களைத் திரும்பப் பெறுவதற்கான செயல்முறைகள் பற்றிய இந்த வழக்கின் சிக்கலான தன்மையைப் பொறுத்து 18 மாதங்கள் முதல் பல ஆண்டுகள் வரை ஆகலாம்” என்றும் அருங்காட்சியகம் கூறியது.
மனித எச்சங்களை திருப்பி அனுப்புவது கலைப்பொருட்களை திருப்பி அனுப்புவதை விட மிகவும் சிக்கலானது.
நெறிமுறைப்படி பொருட்கள் சேகரிக்கப்பட்டதா என்பதைத் தீர்மானிக்கவும், சந்ததியினரை சரியாக அடையாளம் காணவும், மனித எச்சங்களைத் திருப்பி அனுப்பும் அமைப்பைச் சுற்றியுள்ள சிக்கலான சர்வதேச விதிமுறைகளை நெறிப்படுத்தவும் விரிவான ஆராய்ச்சி தேவைப்படுகிறது.
நாகா மன்றம், மானுடவியலாளர்களான டோலி கிகான் மற்றும் ஆர்கோடாங் லாங்குமர் ஆகியோரின் கீழ், “மீட்டெடுக்கவும், புதுப்பிக்கவும், காலனியமயத்தை நீக்குவதற்கான” (Recover, Restore and Decolonise)” குழுவை உருவாக்கியுள்ளது.
“இது ஒரு துப்பறியும் வேலை போன்றது” என்று லாங்குமர் கூறினார்.
“நாங்கள் வெவ்வேறு அடுக்குகளில் தகவல்களைப் பிரித்தெடுத்து, சேகரிப்புகளின் சரியான தன்மை மற்றும் அவை எங்கிருந்து வருகின்றன என்பதைப் பற்றிய உண்மையை அறிய முயற்சிக்க வேண்டும்.”
“ஆனால் நாகா மக்களைப் பொறுத்தவரை, இது வெறுமனே பொருட்களைப் பற்றியது அல்ல. நாங்கள் மனித எச்சங்களை கையாளுகிறோம். இது ஒரு சர்வதேச செயல்முறை மற்றும் சட்ட செயல்முறையும் கூட. மேலும் இது எங்களுக்கு ஒரு புனிதமான செயல் ”, என்று கொன்யாக் கூறினார்.
இந்தக் குழு கிராமங்களுக்குச் சென்று, நாகா பெரியவர்களைச் சந்தித்து, விரிவுரைகளை ஏற்பாடு செய்து, காமிக் புத்தகங்கள் மற்றும் வீடியோக்கள் போன்ற பொருட்களை விநியோகித்து விழிப்புணர்வு ஏற்படுத்துகின்றது.
திருப்பி அனுப்பப்பட்ட மனித எச்சங்களின் இறுதி சடங்குகள் போன்ற விஷயங்களில் நாகா மக்களிடம் ஒருமித்த கருத்தை உருவாக்க இந்தக் குழு முயற்சிக்கின்றது.
பெரும்பாலான நாகா மக்கள் இப்போது கிறிஸ்தவ மதத்தைப் பின்பற்றுகிறார்கள், ஆனால் அவர்களின் மூதாதையர்கள் வெவ்வேறு பிறப்பு மற்றும் இறப்பு சடங்குகளைப் பின்பற்றினார்கள்.
பட மூலாதாரம், Pitt Rivers Museum
நாகா பெரியவர்கள் தங்கள் மூதாதையர்களின் எச்சங்கள் வெளிநாட்டில் இருப்பதைக் கூட அறிந்திருக்கவில்லை என்று இந்தக் குழு கண்டறிந்தது.
மானுடவியலாளரும் தொல்பொருள் ஆய்வாளருமான தியடோஷி ஜமீர், இது “தங்கள் முன்னோர்களின் ஆன்மாவை அமைதியற்றதாக மாற்றும்” என்று ஒரு பெரியவர் தன்னிடம் கூறியதாகத் தெரிவித்தார்.
“வெளிநாட்டு அருங்காட்சியகங்களில் காட்சிக்கு வைக்கப்பட்டிருந்த மண்டை ஓடுகளைப் பற்றி 2000களின் முற்பகுதியில் உள்ளூர் செய்தித்தாளில் படிக்கும் வரை தனக்கும் கூடத் தெரியாது” என்று ஜமீர் கூறினார்.
கடந்த 1832 இல் பிரிட்டிஷ் நாகா பகுதிகளைக் கைப்பற்றினர்.
இந்த பகுதிக்கான அணுகுதலை கட்டுப்படுத்த 1873 ஆம் ஆண்டில், ‘இன்னர் லைன் பெர்மிட்’ என அழைக்கப்படும் பயணிகளுக்கான சிறப்பு அனுமதியை அறிமுகப்படுத்தினர்.
உள்ளூர் மக்களின் கிளர்ச்சிகளை முறியடித்து, அவர்களை அடக்குவதற்காக நாகா கிராமங்களை, காலனித்துவ நிர்வாகிகள் அடிக்கடி எரித்தார்கள் என்று வரலாற்றாசிரியர்கள் கூறுகிறார்கள்.
“வரலாற்றை மீட்டெடுக்கும் முயற்சி”
பிட் ரிவர்ஸ் அருங்காட்சியக பட்டியலில் உள்ள மனித எச்சம் தனது கிராமத்தை மற்றும் பழங்குடியைச் சேர்ந்த ஒருவரது எச்சம் என தான் கண்டுபிடித்ததாக கொன்யாக் கூறுகிறார்.
” இது எனது மூதாதையர்களில் ஒருவருக்கு சொந்தமானது” என்று உணர்ச்சிவசத்துடன் அவர் பிபிசியிடம் கூறினார்.
எச்சங்கள் திரும்பக் கிடைத்தவுடன் இறுதிச் சடங்குகள் எப்படிச் செய்யப்படும் என்பது குறித்து அவர் இன்னும் முடிவு செய்யவில்லை.
“ஆனால் எங்கள் முன்னோர்களுக்கு மரியாதை செலுத்தும் அடையாளமாக நாங்கள் அவற்றைத் திரும்பப் பெற விரும்புகிறோம்.
எங்களது வரலாற்றை மீட்டெடுக்கவும்,எங்களது கதையைச் சொல்வதற்கும் நாங்கள் விரும்புகின்றோம்” என்றும் எலன் கொன்யாக் ஜமீர் கூறினார்.
-இது, பிபிசிக்காக கலெக்டிவ் நியூஸ்ரூம் வெளியீடு