இந்த வழக்கை விசாரித்த நீதிபதி பரத சக்கரவர்த்தி, கடந்த பிப்ரவரி 25 ஆம் தேதியன்று தீர்ப்பளித்தார். தீர்ப்பின் தொடக்கத்தில், ‘சாதிகள் இல்லையடி பாப்பா’ என்ற பாரதியாரின் கவிதை வரிகளை அவர் மேற்கோள் காட்டியிருந்தார்.

கோவில் பொதுவானது என்பதால் அனைத்து பக்தர்களாலும் அதை வழிபடவும் நிர்வகிக்கவும் முடியும் எனக் கூறியுள்ள நீதிபதி பரத சக்கவர்த்தி, “சாதி என்பது ஒரு மதப் பிரிவு அல்ல” என தெரிவித்தார்.

“சமூகத்தில் அமைதியின்மையை உருவாக்குவதற்கு கோவில்களை பயன்படுத்திக் கொள்கின்றனர். பெரும்பாலான பொதுக் கோவில்கள், குறிப்பிட்ட சாதியினரின் கோவில்களாக முத்திரை குத்தப்பட்டுள்ளன” எனவும் தீர்ப்பில் நீதிபதி குறிப்பிட்டுள்ளார்.

“இந்திய அரசியலமைப்பின் சட்டப் பிரிவு 25, 26 ஆகியவவை மத உரிமைகள் மற்றும் மத நடைமுறைகளை மட்டுமே பாதுகாக்கின்றன. அப்படிப் பார்த்தால் எந்த சாதியினரும் கோவிலுக்கு உரிமை கோர முடியாது” எனவும் தீர்ப்பில் கூறப்பட்டுள்ளது.

சாதியின் அடிப்படையில் கோவிலை நிர்வகிப்பது மத நடைமுறை அல்ல. சாதி ஒருபோதும் மதப்பிரிவாக இருக்க முடியாது என்பதை உச்ச நீதிமன்றமும் தெளிவுபடுத்தியுள்ளதாகவும் நீதிபதி தெரிவித்துள்ளார்.

அரசியலமைப்புச் சட்டத்தின் குறிக்கோளாக சாதியற்ற சமூகம் உள்ளதாகக் கூறியுள்ள நீதிபதி, “சாதியை நிலைநிறுத்தும் எந்த ஒன்றையும் நீதிமன்றம் கருத்தில் எடுத்துக் கொள்ளாது என்பதை உச்ச நீதிமன்றமும் தெளிவுபடுத்தியுள்ளது” எனக் கூறி மனுவை தள்ளுபடி செய்தார்.