மனிதநேயத்திற்கு எதிரான குற்றங்கள், பண மோசடி மற்றும் ஊழல் குற்றச்சாட்டுகளை எதிர்கொள்ள அவரை ஒப்படைக்குமாறு முன்வைக்கப்பட்ட வங்கதேசத்தின் கோரிக்கைகளுக்கு இந்தியா பதிலளிக்கவில்லை.

ஹசீனாவோ, தன் மீதான குற்றச்சாட்டுகளை மறுத்துள்ளார்.

வங்கதேசத்துக்கும் பாகிஸ்தானுக்கும் இடையிலான உறவுகளை மீட்டெடுப்பது ஒரு மூலோபாய நடவடிக்கை என்று சில வல்லுநர்கள் கருதுகின்றனர்.

“பாகிஸ்தானும் வங்கதேசமும் தற்போது தந்திரமான உறவைக் கொண்டுள்ளன. ஒன்றாக இணைந்து, இந்தியாவின் மேலாதிக்கத்திற்கு எதிராக ஒரு சிக்கலை உருவாக்க விரும்புகின்றன,” என்கிறார் லண்டனில் உள்ள கிங்ஸ் கல்லூரியில் மூத்த உறுப்பினரான பாகிஸ்தான் கல்வியாளர் ஆயிஷா சித்திகா.

அதேபோல், இரு நாட்டு உறவுகளில் நேரடி வர்த்தகத்தைத் தொடங்குவதைத் தவிர வேறு பிற முன்னேற்றங்களும் உள்ளன.

வங்கதேச இடைக்கால அரசாங்கத்தின் தலைவரான முஹம்மது யூனுஸ், பாகிஸ்தான் பிரதமர் ஷெபாஸ் ஷெரீப்பை சமீபத்திய மாதங்களில் பலமுறை வெவ்வேறு மன்றங்களில் சந்தித்துள்ளார்.

கூடுதலாக ராணுவ உறவும் வளர்ந்து வருகிறது.

ஜனவரி மாதம், உயர்மட்ட வங்கதேச ராணுவக் குழு ஒன்று பாகிஸ்தானுக்கு ஒரு அரிதான பயணத்தை மேற்கொண்டது.

அப்போது செல்வாக்கு மிக்க ராணுவத் தளபதி ஜெனரல் அசிம் முனீருடன் அக்குழு பேச்சுவார்த்தை நடத்தியது.

பின்னர் பிப்ரவரி மாதம் கராச்சி கடற்கரையில் பாகிஸ்தான் ஏற்பாடு செய்த பன்னாட்டு கடற்படை பயிற்சியில் வங்கதேச கடற்படையும் பங்கேற்றது.

2003 மற்றும் 2006 க்கு இடையில் வங்கதேசத்திற்கான இந்தியத் தூதராக இருந்த வீணா சிக்ரி, வங்கதேசத்துக்கும் பாகிஸ்தானுக்கும் இடையே வளர்ந்து வரும் நெருக்கத்தை, “ஏற்கனவே நிகழ்ந்தது போன்ற” தருணம் என்று விவரிக்கிறார்.

அவர் வங்கதேசத்தில் பணிபுரிந்த காலத்தில், “இந்திய கிளர்ச்சியாளர்கள் ஐஎஸ்ஐ [பாகிஸ்தானின் உளவுத்துறை நிறுவனம்] மற்றும் வங்கதேச ராணுவத்தின் ஒரு பிரிவின் ஆதரவுடன் வங்கதேசத்திற்குள் பயிற்சி பெறுகிறார்கள்” என்று இந்தியா மீண்டும் மீண்டும் குற்றம்சாட்டியது, என்று நினைவுகூர்ந்தார்.

“நாங்கள் வங்கதேச அதிகாரிகளுக்கு அதற்கான ஆதாரங்களை வழங்கினோம்,” என்றும் வீணா சிக்ரி தெரிவித்தார்.

பாகிஸ்தான் மற்றும் வங்கதேசத்தில் உள்ள அதிகாரிகள் இந்த குற்றச்சாட்டுகளை அப்போது மறுத்தனர்.

இந்தியாவின் வடகிழக்கு மாநிலங்களைச் சேர்ந்த ஆயுதமேந்திய கிளர்ச்சிக் குழுக்கள் முன்பு வங்கதேசத்திலிருந்து இந்திய எல்லைக்குள் நுழைந்துவிட முடிந்தது.

ஆனால், ஹசீனாவின் அவாமி லீக் 2009 இல் ஆட்சிக்கு வந்த பிறகு, அவரது அரசாங்கம் இந்தக் குழுக்களை ஒடுக்கியது மற்றும் அவர்களின் தளங்களைத் தகர்த்தது.

எனவே வங்கதேசத்திற்கும் பாகிஸ்தானுக்கும் இடையிலான ராணுவ உறவுகளின் மறுமலர்ச்சி “இந்தியாவின் முக்கிய பாதுகாப்பு கவலை” என்கிறார் சிக்ரி.

“இது ராணுவ உறவு மட்டுமல்ல. வங்கதேச சுதந்திரப் போரின் போது பாகிஸ்தானை ஆதரித்த ஜமாத்-இ-இஸ்லாமி போன்ற பங்களாதேஷ் இஸ்லாமியக் கட்சிகளுடனும் பாகிஸ்தானுடன் உறவுகளை புதுப்பிக்கின்றன,” என்று அவர் மேலும் கூறுகிறார்.