கடந்த சில ஆண்டுகளாக ரயில் ஓட்டுநர்கள் (லோகோ பைலட்) முறையாக நியமிக்கப்படாததால் 20,000 ரயில் ஓட்டுநர்களுக்கான பணியிடங்கள் காலியாக உள்ளது. இந்தப் பற்றாகுறையால் பணியில் உள்ள ஓட்டுநர்களுக்கு பணிச்சுமை அதிகரித்து கடும் மன அழுத்தத்துடன் வேலை செய்து வருவதாகக் கூறுகிறார் அகில இந்திய லோகோ தொழிலாளர்கள் சங்கத்தின் இணை பொதுச் செயலாளர் பார்த்தசாரதி.

இது குறித்து பிபிசி தமிழிடம் பேசிய அவர், “இந்திய ரயில்வே துறையில் 2018ஆம் ஆண்டில் இருந்து முறையாக ரயில் ஓட்டுநர்களை நியமிக்காததால் பல ஆயிரம் ரயில் ஓட்டுநர் (லோகோ பைலட்) பணியிடங்கள் காலியாக உள்ளன. இதனால் தற்போதுள்ள ரயில் ஓட்டுநர்கள் 14 மணிநேரம் தொடர்ந்து வேலை செய்வதற்கு நிர்பந்திக்கப்படுகிறோம்.

ரயில் ஓட்டுநர்களுக்கான காலிப் பணியிடங்களை நிரப்புவதற்காக கடந்த ஆண்டு ஜனவரி மாதம் இந்திய ரயில்வே துறை சார்பில் 5 ஆயிரம் பேரை நியமிப்பதாக அறிவிப்பு வெளியானது. 14 ஆயிரம் காலிப் பணியிடங்கள் உள்ள நிலையில் 5 ஆயிரம் பேருக்கு மட்டும் அறிவிப்பு வெளியானதையடுத்து ஓட்டுநர்கள் அனைவரும் ஆர்ப்பாட்டம் நடத்தியதால் அந்த அறிவிப்பு ரத்து செய்யப்பட்டது. பின்னர் ஜூலை 4ஆம் தேதி 15 ஆயிரம் பேருக்கு அறிவிப்பு வெளியானது. ஆனால் அதற்கான தேர்வு ஏதும் நடத்தப்படவில்லை,” என்றார்.

மேலும், ரயில் ஓட்டுநர்கள் பற்றாக்குறையால் வாராந்திர சிறப்பு ரயில்கள் மற்றும் விழாக்கால சிறப்பு ரயில்களை இயக்குவதில் சிக்கல் ஏற்படுவதாகக் கூறுகிறார் அவர். அதையும் மீறி ரயில்கள் இயக்கப்படும்போது தற்போது பணிபுரியும் ஓட்டுநர்கள் சுமார் நான்கு இரவுகள் தொடர்ந்து பணியாற்ற வேண்டிய நிர்ப்பந்தத்திற்கு தள்ளப்படுவதாகவும் அவர் குற்றம் சாட்டுகிறார்.

“சமீபத்தில் ரயில்வே வாரியம் நடத்திய ஆய்வில் 92 சம்பவங்களின் அடிப்படையில் ரயில் ஓட்டுநர்கள் நான்கு இரவுகள் தொடர்ந்து வேலை செய்தது தெரிய வந்துள்ளது. தொடர் இரவு பணியால் விபத்து ஏற்படும் சூழல் உள்ளது, மனிதத் தவறுகள் ஏற்பட அதிக வாய்ப்பு உள்ளது. எனவே இரவுநேர தொடர் பணிகளைக் கொடுக்க வேண்டாம் என ரயில்வே அமைச்சகத்திற்கு ரயில் வாரியம் கடிதம் எழுதியது.

ஆனால் இதுவரை அது தொடர்பாக எந்த நடவடிக்கையும் எடுத்ததாகத் தெரியவில்லை. தொடர்ந்து 36 மணிநேரம் பணி செய்வதைக் கண்டித்து இந்தியா முழுவதும் பணியில் உள்ள ரயில் ஓட்டுநர்கள் மற்றும் பணியில் இல்லாமல் ஓய்விலுள்ள ரயில் ஓட்டுநர்கள் அனைவரும் ஒன்றிணைந்து 36 மணிநேரம் தொடர்ந்து உண்ணாவிரத போராட்டம் நடத்த முடிவு செய்துள்ளோம்,” என்றார் பார்த்தசாரதி.

மேலும், “நாடாளுமன்றத்தில் ரயில் ஓட்டுநர்கள் பற்றாக்குறை தொடர்பாகக் கேள்வி எழுப்பினால் உரிய பதில் அளிப்பதில்லை. ஒருவேளை நிதிச் சுமையைக் குறைப்பதற்காக ரயில் ஓட்டுநர்களை நியமனம் செய்யாமல் ரயில்வே துறை இருக்கிறதா என்ற சந்தேகம் எழுகிறது. விடுமுறை அளிக்காமல் தொடர்ந்து பணி செய்வதால் ரயில் ஓட்டுநர்களுக்கு வாராந்திர விடுமுறை கிடைப்பதில்லை. அவசரத் தேவைக்கும் விடுப்பு எடுக்க முடியவில்லை,” என்று குற்றம் சாட்டுகிறார் அவர்.

ரயில் ஓட்டுநர்கள் தொடர்ந்து பணி செய்வது தொடர்பாக டிவிஷனல் லேபர் கமிஷனிடம் புகார் கொடுத்துள்ளனர். இது தொடர்பாக கர்நாடக உயர்நீதிமன்றத்தில் வழக்கு தொடரப்பட்டது. அதில் ரயில் ஓட்டுநர்களுக்கு உரிய விடுப்பு அளிக்க வேண்டும் என நீதிமன்றம் உத்தரவிட்டதாகவும், ஆனால் இதுவரை அந்தத் தீர்ப்பு நடைமுறைக்கு கொண்டுவரப்படவில்லை எனவும் குறிப்பிடுகிறார் பார்த்தசாரதி.

கடந்த ஜூன் 1ஆம் தேதி 46 மணிநேரம் தொடர்ந்து வேலை செய்ய முடியாது என ஆர்ப்பாட்டத்தில் ஈடுபட்ட ஊழியர்கள் மீது ரயில்வே துறை நடவடிக்கை எடுத்ததாகவும், இது தொடர்பாக இரண்டு கமிட்டிகள் அமைக்கப்பட்டு விரைவில் தீர்வு காணப்படும் என மத்திய ரயில்வே அமைச்சர் அறிவித்திருந்த நிலையில் தற்போது வரை அந்த கமிட்டி பயனற்று உள்ளதாகவும் அவர் தெரிவித்தார்.

அதோடு, “ரயில் ஓட்டுநர்கள் மிகுந்த மன உளைச்சலுடன் ஓய்வில்லாமல் பயணிக்கிறோம். தூக்கமின்மை மற்றும் உடல்நலம் பாதிப்பால் மனிதத் தவறுகள் ஏற்பட்டு விபத்து ஏற்படும் அபாயம் உள்ளது. எனவே ரயில் ஓட்டுநர்கள் பற்றாக்குறையை உடனடியாகச் சரி செய்ய அரசு முன்வர வேண்டும்” எனவும் பார்த்தசாரதி கோரிக்கை வைத்துள்ளார்.