ஃபோன்பே அறிமுகப்படுத்தியுள்ள காப்பீடு மூலம், மருத்துவமனை செலவுகள், சிகிச்சை வசதிகள் ஆகியவற்றுக்கான நிதியைப் பெறலாம். அதேபோன்று, இறப்பு நேரிட்டால் அதற்கான காப்பீட்டுத் தொகையையும் பெறலாம்.

“ஒன்பது ரூபாய்க்கு இத்தகைய சிறப்பான பலன்களை வழங்குகின்றனர். ஆனால், நம்முடைய பாதுகாப்புக்கு இத்தகைய குறுகிய கால காப்பீடுகள் சிறப்பானவை எனச் சொல்ல முடியாது,” என்கிறார், காப்பீடு ஆலோசகராக இருக்கும் ஹெச்.சதீஷ் குமார்.

“மருத்துவக் காப்பீடு, டெர்ம் இன்சூரன்ஸ் ஆகியவை குறித்து பெரும்பாலானோருக்குத் தெரியும். ஆனால், குறுகிய கால காப்பீடுகள் குறித்து வெகு சிலர் மட்டுமே அறிவர். ஒவ்வொரு காப்பீடு குறித்து நன்றாக அறிந்துகொண்ட பின்னரே அதை எடுக்க வேண்டும்,” என்கிறார் சதீஷ்.

ஒரு வாரம் அல்லது ஓர் ஆண்டுக்கும் குறைவான கால அளவில் எடுக்கப்படும் காப்பீடுகள், ‘குறுகிய கால காப்பீடுகள்’ என்று அழைக்கப்படுகின்றன. இவை தற்காலிக காப்பீடுகள் என்றும் அறியப்படுகின்றன.

பொதுவாக, மருத்துவக் காப்பீடுகள் ஓராண்டு காலத்திற்கு எடுக்கப்படும். ஃபோன் பே போன்ற சில நிறுவனங்கள் 3 முதல் 6 மாத காலத்திற்குக் காப்பீடு வழங்குகின்றன. அதன் பிரீமியம் தொகை குறைவாக இருக்கும் என்பதால் சிலர் அவற்றை எடுக்க விரும்புகின்றனர்.

மேலும், ஒரு காப்பீட்டில் இருந்து மற்றொரு காப்பீட்டிற்கு மாறுவதற்காக, இத்தகைய குறுகிய கால காப்பீடுகளை நாடுகின்றனர்.