மாநாட்டில், ‘சாதிவாரி கணக்கெடுப்பு நடத்த வேண்டும்’, ‘வன்னியர் உள்இடஒதுக்கீட்டை அமல்படுத்த வேண்டும்’, ‘பட்டியல் பிரிவு மக்களுக்கு மேலும் 2 சதவீத இடஒதுக்கீட்டை வழங்க வேண்டும்’ என்பன உள்பட 14 தீர்மானங்கள் நிறைவேற்றப்பட்டன.

மேடையில் பேசிய ராமதாஸ், ” வன்னியர்களுக்கு 10.5 சதவீத இடஒதுக்கீட்டை வழங்கக் கோரி போராட்டம் அறிவிக்கப்படும். அது இதுவரை நடந்திராத போராட்டமாக இருக்கும். அந்தப் போராட்டத்துக்காக எவ்வளவு பெரிய தியாகத்தையும் செய்வதற்கு தயாராக இருக்கிறோம்” எனக் கூறினார்.

தொடர்ந்து பேசிய அவர், “நாமும் ஒருநாள் தமிழ்நாட்டை ஆள வேண்டும் என்ற எண்ணம் இருந்தால் என் பேச்சைக் கேளுங்கள். நான் ஆளப் போவதில்லை. எனக்கு அந்த ஆசையும்  இல்லை. ஆசை இருந்திருந்தால் ஆளுநராக இருந்திருப்பேன்; பலமுறை அமைச்சராக இருந்திருப்பேன்;  தமிழ்நாட்டையும் ஆண்டிருப்பேன். ஆனால், மக்களுக்காக வாழ்கிறேன்” என்றார்.

தமிழ்நாடு முதல்வர் ஸ்டாலினிடம், வன்னியர் சமூக மக்களுக்கு 10.5 சதவீத இடஒதுக்கீட்டைக் கொடுங்கள் எனக் கேட்டு தான் வாதாடியிருப்பதாகக் கூறிய ராமதாஸ், “நமக்குத் தேவை உங்களின் ஒரு ஓட்டு தான். இவ்வளவு நாள் என் பேச்சைக் கேட்டீர்கள். இடையில் மறந்துவிட்டீர்கள்” எனப் பேசினார்.

தொடர்ந்து, “முன்பு யானை சின்னத்தில் தனியாக நின்று நான்கு தொகுதிகளில் வெற்றி பெற்றோம். இன்று கூட்டணியில் சேர்ந்து 5 தொகுதிகளில் வெற்றி பெற்றுள்ளோம். இதைப் பார்த்து நமக்கு கோபம் வரவில்லையா?” எனக் கூட்டத்தைப் பார்த்து கேள்வி எழுப்பினார்.

கூட்டணி தொடர்பாக பேசிய ராமதாஸ், “சிலர் எங்கே கூட்டணி என்று கேட்கிறார்கள். அதை நான் பார்த்துக் கொள்கிறேன். கூட்டணியை முடிவு செய்வேன். அதைப் பற்றி நீ ஒன்றும் கவலைப்பட வேண்டாம். சீட் வேண்டும்,  எம்.எல்.ஏ வேண்டும் என்றால் உழைக்கலாம்” எனக் கூறினார்.

தொடர்ந்து, “அந்தக் கூட்டணி…இந்தக் கூட்டணி.. கட்சிக்குள்ளேயே கூட்டணி.. கட்சிக்குள்ளேயே கூட்டு. இதெல்லாம் நடக்காது. உன்னை திருத்திக் கொள். இந்தக் கட்சியில் நீ பொறுப்பில் இருக்கவே முடியாது. அது யாராக இருந்தாலும் சொல்கிறேன்” எனக் கூறினார். இதைக் கேட்டு அன்புமணி சிரித்தபடியே அமர்ந்திருந்தார்.

“இன்னும் 2 மாதம் கடந்தால் எனக்கு 87 வயது. வயதாகிவிட்டது எனக் கூறி ஏமாற்றப் பார்க்காதீர்கள். இந்தக் கட்சி ஒரு தனி மனிதனின் சொத்து அல்ல” எனவும் ராமதாஸ் தெரிவித்தார்.

மாநாடு தொடர்பாக திங்கள்கிழமை (மே 12) அறிக்கை ஒன்றை வெளியிட்ட பாட்டாளி மக்கள் கட்சியின் செயல் தலைவர் அன்புமணி, தமிழ்நாடு அரசியல் களத்தில் இந்த மாநாடு மிகப் பெரிய மாற்றத்தை ஏற்படுத்தியுள்ளதாக குறிப்பிட்டார்.

மக்களின் உணர்வுகளைப் புரிந்து கொண்டு சாதிவாரி கணக்கெடுப்பை நடத்துவதற்கு அரசு உத்தரவிட வேண்டும் எனவும் மற்ற அனைத்து சமுதாயங்களுக்கும் கல்வி மற்றும் வேலைவாய்ப்பில் மக்கள் தொகைக்கு இணையான இடஒதுக்கீட்டை வழங்க வேண்டும் எனவும் கூறியுள்ளார்.

அறிக்கையில் தன்னை பா.ம.க-வின் தலைவர் என அன்புமணி குறிப்பிட்டுள்ளார். கடந்த ஏப்ரல் 10 ஆம் தேதியன்று தலைவர் பதவியில் இருந்து அன்புமணியை நீக்கி, அவரை செயல் தலைவராக மருத்துவர் ராமதாஸ் அறிவித்தார். கட்சியின் மாநாடு நெருங்கிக் கொண்டிருந்த நேரத்தில் ராமதாஸின் இந்த அறிவிப்பு, அரசியல் களத்தில் பேசுபொருளாக மாறியது.

“மாநாட்டின் மேடையில் 87 வயதிலும் தான் வலிமையுடன் இருப்பதாக ராமதாஸ் பேசினார். அவ்வாறு கூறிவிட்டு மகனுடன் சண்டையிட்டுக் கொண்டிருக்கிறார். தேர்தல் நெருங்கும் நேரத்தில் இது அவசியமற்ற ஒன்று” எனக் கூறுகிறார், மூத்த பத்திரிகையாளர் குபேந்திரன்.

பிபிசி தமிழிடம் பேசிய அவர், “இருவரும் சமசரம் ஆகவில்லை. 12 ஆண்டுகளுக்குப் பிறகு எந்தவித பிரச்னையும் இல்லாமல் மாநாடு நடத்தப்பட்டுள்ளது. இதற்காக அன்புமணிக்கு அவர் பாராட்டு தெரிவித்திருக்கலாம்” என்கிறார்.

“ராமதாஸால் வரும் காலங்களில் நன்றாக பணியாற்ற முடியாது. அரசியல் வேண்டும் என முடிவெடுத்து அன்புமணி செயல்படுகிறார். இதில் மற்றவர்கள் யாரும் பலியாக வாய்ப்பில்லை. குடும்பத்துக்குள் கூட ஒற்றுமையாக இல்லை என்று தான் மக்கள் நினைப்பார்கள்” எனக் கூறுகிறார், மூத்த பத்திரிகையாளர் ஷ்யாம்.

“கட்சிக்குள் கூட்டணி, கூட்டணிக்குள் கூட்டணி எனப் பேசுகிறார் என்றால் யாரை ராமதாஸ் மிரட்டுகிறார் என்பது தெரியும்” எனக் கூறுகிறார்,  குபேந்திரன்.