சமவெளிகளில் சாரைப்பாம்பு, கொம்பேறி மூக்கன், கண்டங்கண்டி நீர்க்கோழி, காளியாங்குட்டி போன்ற தண்ணீர்ப் பாம்புகள், எண்ணெய் பணியன், ஓலைப்பாம்பு, புழு பாம்பு, மண்ணுளிப் பாம்பு, சிவப்பு மண்ணுளிப்பாம்பு, மோதிர வளை, ஓடுகாலி பாம்பு, பச்சைப்பாம்பு போன்ற நஞ்சற்ற பாம்புகளே இந்த கோடை சீசனில் அதிகளவில் குடியிருப்புகளுக்குள் செல்வதற்கான வாய்ப்பு அதிகம் என்கிறார் அவர்.

”அதேபோல, மலைகள் மற்றும் மலையடிவாரப் பகுதிகளில் ராஜநாகம், குழி விரியன், மூங்கில் குழி விரியன், மேற்குத் தொடர்ச்சி மலைப்பகுதிகளில் மலபார் குழி விரியன் போன்ற பாம்புகள், கோடைக் காலங்களில், ஈரம் அதிகமுள்ள ஓடைகளில் அதிகமாகக் காணப்படும். தோட்டங்கள் குறிப்பாக தேயிலைத் தோட்டங்களில் கூனல் மூக்கு குழி விரியன் (Hump-nosed Pit Viper) என்ற பாம்பு அதிகமாக வரும். இந்த வகைப்பாம்பு, இரவு நேரங்களில்தான் மிகத் துடிப்போடு இருக்கும்.” என்கிறார் விஸ்வநாத்.

கோடை காலத்தில் குளிர்ச்சியைத் தேடி குடியிருப்புகளுக்கு பாம்புகள் படையெடுக்கும் என்பதை ஒப்புக் கொள்ளும் வனஉயிரினம் மற்றும் இயற்கை பாதுகாப்பு அறக்கட்டளை நிர்வாகி சிராஜ்தீன், இந்த காலகட்டத்தில் காடுகளில் உணவு குறைந்துவிடுவதாலும் எலி போன்ற உணவைத் தேடியும் குடியிருப்புகள் உள்ள பகுதிகளுக்கு பாம்புகள் அதிகமாக வரும் என்கிறார்.

”கோடை காலத்தில் குளிர்ச்சியுள்ள இடத்தையும், பருவமழை மற்றும் கடுங்குளிர் காலங்களில் கதகதப்பான இடங்களையும் தேடி பாம்புகள் வருவது வழக்கம்தான். மனிதர்களின் வாழ்விடங்களுக்கு பாம்புகள் வருகின்றன என்று இதைக் கூறுவதை விட, பாம்புகளின் வாழ்விடங்கள் சுருங்கி வருவதாலும் அவை உணவைத் தேடி வருவதையும் கருத்தில் கொள்ள வேண்டும்.” என்கிறார் சிராஜ்தீன்.

”பாம்புகளின் முக்கிய உணவு தவளையும் எலியும்தான். தவளைகள் அதிகமுள்ள குளம், குட்டை உள்ளிட்ட நீர்நிலைகள் பெருமளவில் அழிக்கப்பட்டுவிட்டன. அதனால் எலிகள்தான் பாம்புகளுக்கு பிரதான உணவாக மாறிவிட்டன. உணவுக்குப்பைகள் அதிகமாகப் போடப்படும் இடங்களில் எலிகள் நிறைய வருகின்றன. குடியிருப்புகளுக்குள் பாம்புகள் வருவதற்கு இதுவும் முக்கியக் காரணம்.” என்றும் அவர் மேலும் கூறுகிறார்.

குடியிருப்புகளுக்குள் பாம்புகள் ஊடுருவுவதைத் தடுப்பதற்கு, பொது மக்கள் கடைப்பிடிக்க வேண்டிய பல வழிமுறைகளையும் பாம்பு ஆராய்ச்சியாளர்கள் குறிப்பிடுகின்றனர். கோடை காலத்தில் மட்டுமின்றி, இந்த வழிமுறைகளை எல்லாக் காலங்களிலும் பின்பற்ற வேண்டுமென்பதை வலியுறுத்தும் இவர்கள், வீடுகளில் தவிர்க்க வேண்டிய சில செயல்பாடுகளையும் குறிப்பிடுகின்றனர்.

இதுபற்றி பிபிசி தமிழிடம் பேசிய பாம்பு ஆராய்ச்சியாளர் விஸ்வநாத், ”காற்று வேண்டுமென்பதற்காக கோடைகாலங்களில் தரையில் பலரும் படுப்பார்கள். அப்போது சுற்றிலும் கொசுவலை போன்ற பாதுகாப்பை ஏற்படுத்திக் கொள்வது அவசியம். சில பாம்புகள் கதவுகள் வழியாக வரும். சமையலறை பாத்திரம் கழுவும் தொட்டிகளில் உள்ள குழாய்கள் வழியாகவும் வந்துவிடும். அப்படி சில பாம்புகளைப் பிடித்துள்ளோம். அதற்கு மூடி போடுவது அவசியம்.” என்கிறார்.

”வீட்டுக்கு வெளியில் ஷூக்களை வைக்காமல், ஏதாவது ஆணிகள் போன்றவற்றில் தொங்கவிடுவது நல்லது. இல்லாவிட்டால் அதற்குள் சிறு பாம்புகள் சென்று ஒளிந்து கொள்ளும். உதறினாலும் வெளியில் வராது. குளிர் காலங்களில் கார்களுக்குள் சென்றுவிடும். தார்ச்சாலைகள் பகலில் வெப்பத்தை உறிஞ்சி, இரவில் வெளியில் விடும் என்பதால் ரோட்டின் மீதே பாம்புகள் படுத்திருக்கும். அதனால் இரவு நேரங்களில் இருளில் டார்ச் லைட் இல்லாமல் வெளியில் செல்வதைத் தவிர்க்க வேண்டும்.” என்றும் ஆலோசனை தருகிறார் விஸ்வநாத்.

கோடையில் சற்று வெப்பம் குறைவாகவும், குளிர்ச்சியாகவும் இருக்கும் கட்டட இடுக்குகள், செங்கற்கள் அடுக்கிய இடங்களில் பாம்புகள் தங்கிவிடும் என்பதால் அத்தகைய இடங்களில் கவனமாகச் செல்ல வேண்டுமென்கிறார் சிராஜூதீன். வீடுகளைச் சுற்றிலும் விறகுகள், அட்டைப்பெட்டிகள், தேவையற்ற சாமான்களைக் குவிப்பதைத் தவிர்ப்பதே நல்லது என்கிறார் அவர்.

ஆனால் கோடைகாலங்களில் பாம்புகள் அதிகமாக குடியிருப்புகளுக்கு வரும், மற்ற காலங்களில் வருவது குறைவு என்பது பொதுவான கருத்தே தவிர, அதற்கான ஆராய்ச்சித் தரவுகள் எதுவுமில்லை என்கிறார் சென்னை பாம்புப் பூங்கா நிர்வாகியும், ஊர்வன ஆராய்ச்சியாளருமான கணேசன்.

”எந்த பருவகாலமாக இருந்தாலும் குடியிருப்புகளை நோக்கி பாம்புகள் செல்வது இயல்பான ஒரு விஷயம்தான். பாம்புகள் வீட்டுக்குள் வந்து விட்டால், அவற்றை அடிக்கவோ, துரத்தவோ முயற்சி செய்யாமல், அருகிலுள்ள வனத்துறையினர் அல்லது தீயணைப்புத் துறையினருக்குத் தகவல் தெரிவிப்பதுதான் நல்லது. சுற்றுப்புறத்தை சுத்தமாக வைத்திருப்பது முக்கியம்.” என்கிறார் கணேசன்.

– இது, பிபிசிக்காக கலெக்டிவ் நியூஸ்ரூம் வெளியீடு