4

மெய்யழகனாக திரையில் தோன்றி பார்வையாளர்களின் கண்களை பணிக்க வைத்த முன்னணி நட்சத்திர நடிகரான கார்த்தி நடிப்பில் தயாராகி இருக்கும் ‘வா வாத்தியார்’ எனும் புதிய படத்தின் கிளர்வோட்டம் வெளியிடப்பட்டிருக்கிறது.

இயக்குநர் நலன் குமாரசாமி இயக்கத்தில் உருவாகி இருக்கும் ‘வா வாத்தியார்’ எனும் படத்தில் கார்த்தி, சத்யராஜ், ராஜ்கிரண், கிருத்தி ஷெட்டி, ஆனந்த் ராஜ், ஷில்பா மஞ்சுநாத், கருணாகரன், ஜி. எம். சுந்தர், ரமேஷ் திலக், பி. எல். தேனப்பன், வித்யா  போர்கியா, நிவாஸ் ஆதித்தன், மதுர் மிட்டல் உள்ளிட்ட பலர் நடித்திருக்கிறார்கள்.

ஜோர்ஜ் வில்லியம்ஸ் ஒளிப்பதிவு செய்திருக்கும் இந்த திரைப்படத்திற்கு சந்தோஷ் நாராயணன் இசையமைத்திருக்கிறார்.‌

புரட்சித்தலைவர் எம்ஜிஆர் ரசிகர் ஒருவரின் வாழ்வியலை மையப்படுத்தி எக்சன் எண்டர்டெய்னராக தயாராகி இருக்கும் இந்த திரைப்படத்தை ஸ்டுடியோ கிரீன் நிறுவனம் சார்பில் தயாரிப்பாளர் கே. ஈ.  ஞானவேல் ராஜா தயாரித்திருக்கிறார்.

இப்படத்தின் அனைத்து பணிகளும் நிறைவடைந்து வெளியீட்டிற்காக காத்திருக்கும் நிலையில் இப்படத்தின் கிளர்வோட்டம் வெளியிடப்பட்டிருக்கிறது.

இதில் கார்த்தி காவல்துறை அதிகாரியின் சீருடை தோன்றுவது… நகைச்சுவை காட்சிகள்- எக்சன் காட்சிகள்- பாடல் காட்சிகள் -நடன காட்சிகள்- சென்டிமென்ட் காட்சிகள்- என அனைத்து கமர்சியல் அம்சங்களும் இடம் பிடித்திருப்பதால் ரசிகர்களை வெகுவாக கவர்ந்திருக்கிறது.

இதனால் ‘வா வாத்தியார்’ படத்தின் கிளர்வோட்டம் வெளியான குறுகிய கால அவகாசத்திற்குள் மூன்று மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.