மலேசியாவை சேர்ந்த சுயாதீன பாடகரான முகேன் ராவ் இந்த சீசனில் வெற்றியடைந்த பின்னர் சில திரைப்படங்களில் நடித்தார். முன்னதாக இவர் மலேசிய தொலைக்காட்சி தொடர்கள் சிலவற்றில் துணை கதாபாத்திரங்களில் நடித்துள்ளார்.

பிக் பாஸ் வெற்றிக்குப் பிறகு சூரியுடன் இணைந்து வேலன், வெற்றி உள்ளிட்ட படங்களிலும் ஹன்சிகாவின் மை3 எனும் இணையத் தொடரிலும் நடித்தார். ஜின் தி பெட் எனும் படத்திலும் நாயகனாக நடித்தார். இவை பெரிதாக ரசிகர்கள் மத்தியில் கவனம் ஈர்க்கவில்லை. நிறம் உள்ளிட்ட சில படங்களில் முகேன் ராவ் நடித்து வருகிறார். தவிர, பல சுயாதீன பாடல்களையும் பாடிவருகிறார்.

ஆரி பிக் பாஸ் நிகழ்ச்சிக்கு முன்பாகவே சில திரைப்படங்களில் நடித்து கவனம் பெற்றவர். ஆடும் கூத்து, ரெட்டச்சுழி, நெடுஞ்சாலை, மாலைப்பொழுதின் மயக்கத்திலே உள்ளிட்ட படங்களுக்காக அவர் அறியப்படுகிறார். பிக் பாஸ் வெற்றிக்குப் பிறகு நெஞ்சுக்கு நீதி படத்தில் உதயநிதியுடன் இணைந்து நடித்தார்.

மேலும், கோலிசோடா 3 உள்ளிட்ட படங்களிலும், ப்ரியாமணி நடித்த ‘குட் வைஃப்’ இணைய தொடரிலும் முக்கிய கதாபாத்திரங்களில் நடித்தார். தற்போது கலைஞர் தொலைக்காட்சியில் ஒளிபரப்பாகிவரும் வா தமிழா வா எனும் நிகழ்ச்சியை ஆரி அர்ஜுனன் தொகுத்து வழங்குகிறார்.

“ஆரம்பத்தில் தொலைக்காட்சி நிகழ்ச்சியை தொகுத்து வழங்குவதில் தயக்கம் இருந்தது. ஆனால், ஒரு நிகழ்ச்சியில் வெவ்வேறு பின்னணிகளை கொண்ட 50 பேருடன் உரையாடும் வாய்ப்பை அந்த நிகழ்ச்சி எனக்கு வழங்குகிறது. இத்தகைய நிகழ்ச்சியில் முன்னோடியான கோபிநாத் மீது எனக்கு மிகுந்த மரியாதை இருக்கிறது,” என டைம்ஸ் ஆஃப் இந்தியாவுக்கு ஆரி அளித்த பேட்டியொன்றில் கூறியிருந்தார்.

பகவான், அலேகா உள்ளிட்ட படங்களிலும் அவர் தற்போது நடித்து வருகிறார்.

விஜய் தொலைக்காட்சியிலேயே பல்வேறு நிகழ்ச்சிகளை தொகுத்து வழங்கியவர் ராஜு. இதில், ‘ராஜு வீட்ல பார்ட்டி’ எனும் நிகழ்ச்சி பிரபலமான நிகழ்ச்சியாகும். இதுதவிர, கனா காணும் காலங்கள், சரவணன் மீனாட்சி உள்ளிட்ட தொடர்களிலும் நடித்தார். மேலும் கவினின் நட்புனா என்னனு தெரியுமா படத்தில் நடித்தார். பிக் பாஸ் வெற்றிக்குப் பிறகு சிவகார்த்திகேயனின் டான் திரைப்படத்தில் நடித்தார்.

“பார்வையாளர்களுக்கு உண்மையிலேயே பிடித்திருந்தால் மட்டுமே பிக் பாஸ் போன்ற நிகழ்ச்சியில் வெற்றி பெறுவது சாத்தியம், அது எனக்கு நடந்திருப்பதில் மகிழ்ச்சி,” என வெற்றிக்குப் பின்னர் தி இந்து ஆங்கில நாளிதழுக்கு அளித்த பேட்டியில் கூறியிருந்தார்.

இந்தாண்டு ‘பன் பட்டர் ஜாம்’ படத்தில் நடித்தார், இது கலவையான விமர்சனங்களைப் பெற்றது. நடிகர் விஜய் இந்த படத்தை தன்னை அழைத்து பாராட்டியதாக சமூக ஊடகங்களில் பகிர்ந்திருந்தார் ராஜு. மேலும், விஜய் தொலைக்காட்சியில் ‘குக் வித் கோமாளி’ நிகழ்ச்சியிலும் போட்டியாளராக பங்கேற்று வெற்றி பெற்றார்.

மாயா, பிரிவோம் சந்திப்போம் சீசன் 2, தெய்வம் தந்த வீடு என பல தொடர்கள் மூலம் அறியப்பட்டவர் அசீம். ஆறாவது சீசனில் அவருடைய நடவடிக்கைகளுக்காக பல்வேறு எதிர்ப்புகளை பிக்பாஸ் வீட்டுக்குள் சந்தித்தவர்.

சமீபத்தில் தவெக தலைவர் விஜயின் கரூர் பரப்புரை கூட்ட நெரிசல் சம்பவத்தில் சிக்கி 41 பேர் உயிரிழந்த சம்பவத்தில் தவெகவுக்கு எதிராக கருத்துகளை தெரிவித்திருந்தார்.

வருத்தப்படாத வாலிபர் சங்கம் படத்தின் இயக்குநர் பொன்ராம் இயக்கத்தில் தான் நடிக்கவிருப்பதாகவும் அது தன் முதல் படமாக இருக்கும் எனவும், மே மாதம் டைம்ஸ் ஆஃப் இந்தியாவுக்கு அளித்த பேட்டியில் தெரிவித்திருந்தார். அது கிராமத்து பின்னணியிலான கதை என்று கூறிய அவர், மேலும் 2 படங்களிலும் நடித்துவருவதாக கூறியிருந்தார்.

விஜய் தொலைக்காட்சியில் ஒளிபரப்பான ராஜா ராணி சீசன் 2 தொடர் மூலம் அறியப்பட்டவர் அர்ச்சனா ரவிச்சந்திரன். 7வது சீசனில் வைல்ட் கார்டு போட்டியாளராக நுழைந்து டைட்டிலை வென்றார்.

அதன்பின், டிமாண்டி காலனி 2 திரைப்படத்தில் சிறிய கதாபாத்திரத்தில் நடித்தார். சமீபத்தில் சின்னத்திரை நடிகர் அருண் என்பவருடன் இவருக்கு திருமணம் நிச்சயிக்கப்பட்டது.

விஜய் தொலைக்காட்சியில் ஒளிபரப்பான தமிழ் பேச்சு எங்கள் மூச்சு எனும் பேச்சு போட்டியில் பங்கேற்ற முத்துக்குமரன், பட்டிமன்றங்கள் பலவற்றில் பங்கேற்றுள்ளார், நடுவராகவும் பங்கேற்றிருக்கிறார். தற்போது நிகழ்ச்சி தொகுப்பாளராக உள்ளார்.

பிபிசி தமிழிடம் பேசிய அவர், “பிக் பாஸ் வெற்றிக்குப் பிறகு நிறைய வெளிநாட்டு நிகழ்ச்சிக்கான வாய்ப்புகள் கிடைத்துள்ளன. மேலும் நிறைய பேரின் அறிமுகம் கிடைத்தது. சமீபத்தில் அமெரிக்காவிலும் சென்று பேசினேன்.”

“என்னைப் பற்றிய அறிமுகத்தை கொடுத்தது பிக்பாஸ் தான். பொருளாதார ரீதியாகவும் உயர்வு கிடைத்துள்ளது. என்னைப் போன்றவர்களை வரவேற்க வேண்டும், என் குரலுக்கு செவி மடுக்க வேண்டும் என்பது விருப்பமாக இருந்தது, அதை நிறைவேற்றியது அந்த நிகழ்ச்சிதான். பட வாய்ப்புகளும் வந்துள்ளன, ஆனால் அதிகாரபூர்வமாக அறிவிக்கப்படவில்லை” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு