தனது குடும்பத்திற்கான விசாவுக்கு நிதியுதவி வழங்கிய பிராட்ஃபோர்டில் உள்ள தனியார் பராமரிப்புக் கூடமான அல்சிட்டா கேர் நிறுவனத்திற்கு அவர் பணம் செலுத்தியதற்கான ஆதாரங்களை பிபிசி பார்வையிட்டது.

கேரளாவில் உள்ள தனது நகரத்தில், ஒரு உள்ளூர் ஏஜென்டின் வழிகாட்டுதலின் பேரில், அந்த நிறுவனத்துக்கு ஜார்ஜ் பணம் செலுத்தியுள்ளார்.

மாற்றுத்திறன் கொண்ட தங்கள் குழந்தைக்குச் சிறந்த வாழ்க்கை கிடைக்கும் என்ற வாக்குறுதியே, அந்தத் தம்பதியைத் தங்கள் சேமிப்பைப் பயன்படுத்தி, அத்தகைய ஒரு சவாலான முடிவை எடுக்கத் தூண்டியது.

ஆனால், அவர்கள் பிரிட்டனுக்கு சென்றபோது அங்கு வேலை கிடைக்கவில்லை.

“நாங்கள் அந்தப் பராமரிப்பு இல்லத்தைத் தொடர்புகொள்ளத் தொடர்ந்து அழைத்துக் கொண்டே இருந்தோம். ஆனால் அவர்கள் எப்போதும் ஏதோவொரு காரணம் கூறித் தவிர்த்து வந்தனர். நான் மிகவும் கெஞ்சிய பிறகு, எங்களை ஊதியமில்லாத சில பயிற்சிகளில் கலந்து கொள்ளும்படி வற்புறுத்தினார்கள்.

அதன் பிறகு, என் மனைவிக்கு வெறும் மூன்று நாட்கள்தான் வேலை வழங்கினர். எங்களால் அங்கு தொடர்ந்து வாழ இயலவில்லை; சில மாதங்களில் இந்தியா திரும்பிவிட்டோம்,” என்று ஜார்ஜ் கூறினார்.

அந்த நிறுவனம் ஏமாற்றிவிட்டதாக ஜார்ஜ் நம்புகிறார். இந்தக் கடுமையான அனுபவம், நிதிரீதியாக அவரைக் குறைந்தபட்சம் பத்து ஆண்டுகள் பின்னோக்கித் தள்ளிவிட்டதாகவும் அவர் கூறுகிறார்.

கேரளாவில் இருந்து பிரிட்டனுக்கு வேலை தேடிச் சென்ற நூற்றுக்கணக்கானோர், ஆள் சேர்ப்பு முகவர்கள், பராமரிப்பு இல்லங்கள் மற்றும் இடைத்தரகர்களால் சுரண்டப்பட்டுள்ளனர். அவர்களுள் ஜார்ஜின் குடும்பமும் ஒன்று.

தற்போது நீதியோ, தங்களது பணமோ கிடைக்கும் என்ற நம்பிக்கையை அவர்களுள் பெரும்பாலானோர் கைவிட்டுவிட்டனர்.

பிராட்ஃபோர்டில் அமைந்துள்ள பராமரிப்பு நிறுவனமான அல்சிட்டா கேர், பிபிசி எழுப்பிய கேள்விகளுக்கு இதுவரை எந்தப் பதிலும் வழங்கவில்லை.

வெளிநாட்டு பராமரிப்புப் பணியாளர்களுக்காக விசா நிதியுதவி வழங்க பராமரிப்பு இல்லங்களுக்கு அனுமதியளிக்கும் அல்சிட்டா கேர் நிறுவனத்தின் “ஸ்பான்சர்ஷிப் உரிமம்” கடந்த ஆண்டு பிரிட்டனின் உள்துறை அமைச்சகத்தால் ரத்து செய்யப்பட்டது.

ஆனால், இவர்களைப் போலவே மேலும் மூன்று செவிலியர்களும் தாங்கள் ஏமாற்றப்பட்டதாகக் கூறுகின்றனர். கேரளாவில் இருந்து முற்றிலுமாக பிரிட்டனுக்கு இடம்பெயர முயன்ற அவர்கள், தங்களுக்கு வாக்குறுதி அளிக்கப்பட்ட வேலைகள் எதுவும் கிடைக்கவில்லை என்று எங்களிடம் தெரிவித்தனர். அவர்கள் இதற்காக அல்சிட்டா கேர் நிறுவனத்திற்கு ஆயிரக்கணக்கான பவுண்டுகளை அனுப்பியதாகவும் கூறினர்.

அவர்களில் ஒருவர் இன்னும் பிரிட்டனில் தங்கியுள்ளார். கடந்த சில மாதங்களாக தன்னார்வத் தொண்டு செய்யும் கடைகளில் இருந்து கிடைக்கும் “ரொட்டி மற்றும் பால்” மூலம் உயிர் வாழ்ந்து வருவதாகவும், தனது நிலைமை மிக மோசமாக உள்ளதாகவும் கூறுகிறார்.