இந்நிலையில், அதன் அடுத்தகட்டமான போப் பிரான்சிஸின் இறுதி ஊர்வலம் இன்று உள்ளூர் நேரப்படி சுமார் 10.00 மணிக்கு (இந்திய நேரப்படி மதியம் 1.30) தொடங்கியது. இந்த ஊர்வலத்தில் பல ஆயிரக்கணக்கானோர் கலந்துகொள்வார்கள் என எதிர்பார்க்கப்படுகிறது. இறுதிச் சடங்கு இன்று நடக்கவுள்ளதால், அதிகாலை முதலே போப் உடலுக்கு அஞ்சலி செலுத்த பலரும் வருகை தந்த வண்ணம் உள்ளனர்.

ஆனால், போப் பிரான்சிஸ் உடலுக்கு அருகே சென்று அஞ்சலி செலுத்துவது, வெள்ளிக்கிழமை மாலையுடன் நிறைவடைந்தது. எனினும், கூடுமானவரை அருகிருந்து அவரின் உடலை காண விரும்பி பலரும் அங்கு வருகை தந்துள்ளனர்.

சமூகத்தில் பெரும் செல்வாக்கு கொண்டவர்கள் மட்டுமல்லாமல் விளிம்புநிலையில் உள்ள மக்களும் ஊர்வலத்தில் கலந்துகொள்ள வருகை தந்துள்ளனர். மேலும், சிறைவாசிகள் சிலரும் போப் பிரான்சிஸின் இறுதி ஊர்வலத்தைக் காண வந்துள்ளனர்.

“காலை 4.15 மணிக்கு இங்கு நாங்கள் வந்தோம்,” என நியூயார்க்கை சேர்ந்த கைட்லின் கூறுகிறார், இவர் தற்போது ரோமில் வசித்துவருகிறார்.

“போப்பின் பாரம்பரியம் மற்றும் அவர் செய்த அனைத்துக்காகவும் அவரை பெருமைப்படுத்துவதற்காக, வாழ்நாளில் ஒருமுறை மட்டுமே கிடைக்கக்கூடிய அனுபவம் இது” என அவர் கூறினார்.

அயர்லாந்தில் உள்ள வாட்டர்ஃபோர்டை சேர்ந்த கேத்தரீன், தான் “அனைத்துவித வானிலைகளுக்கும் தயாராக இருப்பதாக” தெரிவித்தார். படுக்கை விரிப்புகள், சன்க்ரீம், ரெயின்கோட் என பலவற்றையும் அவர் எடுத்து வந்திருந்தார்.

போப் பிரான்சிஸின் இறுதிச் சடங்கில் கலந்துகொள்வதற்காக உலகத் தலைவர்கள் பலரும் வந்தவண்ணம் உள்ளனர். முன்னதாக, இந்தியாவின் சார்பில் குடியரசு தலைவர் திரௌபதி முர்மு வெள்ளிக்கிழமை ரோம் சென்றடைந்தார், அவர் போப் பிரான்சிஸ் உடலுக்கு அஞ்சலி செலுத்தினார்.

அமெரிக்க அதிபர் டொனால்ட் டிரம்பும் அவருடைய மனைவி மெலனியா டிரம்பும் ரோமுக்கு வந்துள்ளனர். அமெரிக்க அதிபராக இரண்டாவது முறை பதவியேற்ற பின், அவர் மேற்கொள்ளும் இரண்டாவது வெளிநாட்டுப் பயணம் இதுவாகும். அதேபோன்று, அமெரிக்க முன்னாள் அதிபர் ஜோ பைடன், அவருடைய மனைவி ஜில் பைடனும் ரோமுக்கு வருகை தந்துள்ளனர்.