அது தான், உண்மையான திருமணங்களைப் போலவே கொண்டாடப்படும் போலி திருமணங்களின் சூழல்.

உண்மையான திருமணம் நடக்காமல், திருமணக் கொண்டாட்டத்தை மட்டும் அனுபவிக்க, மக்கள் ஒன்றாகக் கூடும் ஒரு புதிய போக்கு, தற்போது இந்திய நகரங்களில் வளர்ந்து வருகிறது.

ஹோட்டல்கள், கேளிக்கை விடுதிகள் மற்றும் நிறுவனங்களால் ஏற்பாடு செய்யப்படும் இந்த நிகழ்வுகளுக்கு டிக்கெட் விற்கப்படுகிறது.

முழுமையாக கொண்டாட்டத்துக்காகவே வடிவமைக்கப்படும் இந்த நிகழ்வுகள், சடங்குகள், பொறுப்புகள், மன அழுத்தம் எதுவும் இல்லாமல், ஒரு திருமணக் கொண்டாட்டத்தின் முழு அனுபவத்தையும் வழங்குவோம் என உறுதி அளிக்கின்றன.

சுருக்கமாகச் சொன்னால், உண்மையான திருமண விழாக்களைப் போலவே கொண்டாடப்படும் விருந்து நிகழ்ச்சி தான், இந்தப் ‘போலி திருமண விழாக்கள்’.

கடந்த சில வாரங்களில், டெல்லி, மும்பை, பெங்களூரு போன்ற நகரங்களில் இத்தகைய போலி திருமணங்கள் பிரபலமடைந்து வருகின்றன.

பொதுவாக இளைஞர்கள் தான் இதில் கலந்து கொள்கிறார்கள். நண்பர்களுடன் இரவு நேரத்தை மகிழ்ச்சியாக அனுபவிக்கவும் , விருந்தினர்களால் ஏற்படும் அழுத்தம் இல்லாமல் ஒரு பாரம்பரிய இந்திய திருமண முறை மற்றும் கொண்டாட்டத்தில் ஈடுபடவும் அவர்கள் விரும்புகிறார்கள்.

கடந்த வாரம், டெல்லியில் நடந்த ஒரு போலி சங்கீத் நிகழ்ச்சியில் நாங்கள் கலந்து கொண்டோம். சங்கீத் என்பது திருமணத்திற்கு சில நாட்கள் முன்பு நடக்கும் இசையும், நடனக் கொண்டாட்டங்களும் நிறைந்த இரவு.

ஒரு அழகான கேளிக்கை விடுதியில் நடந்த அந்த நிகழ்வில், பெண்கள் பளபளப்பான புடவைகள் மற்றும் லெஹங்காக்கள் அணிந்திருந்தனர்,

ஆண்கள் அழகாக தையல் வேலைப்பாடுகள் செய்யப்பட்ட குர்தாக்கள் மற்றும் சட்டைகளில் வந்திருந்தனர்.

ஒரு பாரம்பரிய இசைக்கலைஞர், இளைஞர் கூட்டத்தை நடன தளத்திற்கு அழைத்துச் சென்றார். டக்கீலா நிரப்பப்பட்ட பானி பூரியை (வட இந்திய தெருக்களில் பிரபலமான சிற்றுண்டி) விருந்தினர்களின் கைகளில் காண முடிந்தது.

இதுபோன்ற நிகழ்வில் முதல் முறையாக கலந்து கொண்ட ஷிவாங்கி சரீன், இந்த அனுபவம் “அற்புதமாக” இருந்தது என்கிறார்.

“குடும்பங்களால் நடத்தப்படும் திருமணங்களில், என்ன உடை அணிய வேண்டும், உறவினர்கள் என்ன நினைப்பார்கள் போன்ற அழுத்தங்கள் இருக்கும். ஆனால் இங்கே, முழுக்க முழுக்க மகிழ்ச்சியாக இருந்தது. குறிப்பாக, எங்களால் நண்பர்களுடன் சேர்ந்து கொண்டாட முடிந்தது. இதற்காக முந்தைய நாளே ஆடைகளைத் தேர்ந்தெடுத்து, ஒன்றாக தயாரானோம்”என்று பகிர்ந்து கொள்கிறார் ஷிவாங்கி.

இந்தக் கொண்டாட்டத்தில் கலந்து கொள்வதற்கான டிக்கெட் கட்டணம் பொதுவாக 1,500 ரூபாய் (17 டாலர்; 13யூரோ) முதல் தொடங்கி, இடம் மற்றும் வசதிகளைப் பொறுத்து 15,000 ரூபாய் அல்லது அதற்கு மேல் செல்கிறது. ஷிவாங்கியும் அவரது நண்பர்களும் ஒரு ஜோடிக்கு 10,000 ரூபாய் செலுத்தியுள்ளனர்.

“இதை மாதத்திற்கு ஒரு முறை செலவிடுவதில் எனக்கு எந்த பிரச்னையும் இல்லை. அந்த அனுபவம் முழுக்க முழுக்க அருமையானது” என்கிறார் ஷிவாங்கி.

‘விருந்தோம்பல் துறையில் புதுமை தான் முக்கியம்’ என்று இந்த நிகழ்வை நடத்திய உணவக உரிமையாளர் ஷரத் மதன் கூறுகிறார்.

“நமது வாடிக்கையாளர்களுக்காக நாம் தொடர்ந்து ஏதாவது புதிதாகச் செய்ய வேண்டும்,” என்று ஷரத் குறிப்பிடுகிறார் .

இந்த நிகழ்வை திட்டமிடவும், ஏற்பாடு செய்யவும் சுமார் 10 லட்சம் ரூபாய் செலவானதாகக் கூறுகிறார் மதன்.

டிக்கெட் விற்பனையின் மூலம் அதைவிட இரட்டிப்பு வருமானம் கிடைக்கும் என அந்தக் குழு எதிர்பார்த்தது. ஆனால் இது வெறும் லாபத்தைப் பற்றியது மட்டுமல்ல என்கிறார் மதன்.

மேலும், “இது மக்களுடன் தொடர்பு கொள்வதைப் பற்றியது. அதிக லாபம் கிடைக்காவிட்டாலும், எங்கள் வாடிக்கையாளர்கள் புதிய அனுபவங்களைப் பெற விரும்புவதால், நான் இதைத் தொடர்ந்து செய்வேன்,” என்றும் அவர் கூறினார்.

கடந்த மாதம் பெங்களூரில் 2,000 பேர் கலந்து கொண்ட போலி திருமண விருந்தை நடத்திய 8Club நிகழ்வுகளின் இணை நிறுவனர் கௌஷல் சனானி, போலி திருமணங்களுக்கான உத்வேகம் வெளிநாட்டில் வசிக்கும் இளம் இந்தியர்களிடமிருந்து வந்ததாகக் கூறுகிறார்.

“இங்கிருந்து புலம்பெயர்ந்த மக்கள் ஒன்றுகூடி பாலிவுட் இசைக்கு நடனமாடுவார்கள், பாரம்பரிய உடைகளை உடுத்தி கொண்டாடுவார்கள். நாங்களும் இந்த யோசனையைத் தான் பின்பற்றினோம்” என்று அவர் பகிர்ந்துகொள்கிறார்.

பெங்களூருவில் உள்ள ஐந்து நட்சத்திர ஹோட்டலில் நடந்த நிகழ்வுக்கு கிடைத்த வரவேற்பு “மிகச் சிறப்பாக இருந்தது” என்றும் அவர் கூறுகிறார்.

அது அவர்களை டெல்லியில் இதேபோன்ற நிகழ்வை திட்டமிட ஊக்குவித்தது. அதற்கான டிக்கெட்டுகளும் முழுமையாக விற்றுவிட்டன.

அதனைத் தொடர்ந்து, ஜெய்ப்பூர், கொல்கத்தா, லக்னோ போன்ற நகரங்களில் உள்ள நிகழ்வு ஏற்பாட்டாளர்கள் இதுகுறித்து அவரிடம் விசாரிக்கத் தொடங்கியுள்ளனர்.

“இப்போது, ஆர்வமுள்ளவர்களுக்கு எங்கள் நிலையான செயல் முறையை (SOP) வழங்குகிறோம். இது அந்த நிகழ்வை எவ்வாறு உருவாக்குவது, லாபம் ஈட்டுவது எப்படி என்பதற்கான வழிகாட்டி,” என்று அவர் கூறுகிறார்.

ஆனால், எல்லா போலி திருமண விழாக்களும் ஒரே மாதிரியான நடைமுறையைப் பின்பற்றுவதில்லை.

அனுபவங்களை மையமாகக் கொண்ட ஸ்டார்ட்-அப் நிறுவனமான தேர்ட் பிளேஸ் (Third Place), பெங்களூருவில் சமீபத்தில் ஒரு சங்கீத் நிகழ்ச்சியை நடத்தியது. மது இல்லாமல், வெறும் கொண்டாட்டமாக மட்டும் இந்த சங்கீத் அமைந்தது.

“நிகழ்வில் பங்கேற்றவர்களை மணமகன் மற்றும் மணமகள் அணிகளாகப் பிரித்தோம். சரேட்ஸ் (charades) போன்ற விளையாட்டுகளை ஏற்பாடு செய்தோம்” என்று தலைமை நிர்வாக அதிகாரி அனுராக் பாண்டே கூறுகிறார்.

மேளதாளங்கள், விருந்தினர்களுக்கான பிரமாண்ட வரவேற்பு, ஜோதிடத்தின் அடிப்படையிலான விளையாட்டுகள் போன்ற அனைத்தும் நிகழ்ச்சியில் இடம்பெற்றன. ஆனால் மதுபானங்கள் வேண்டுமென்றே தவிர்க்கப்பட்டன.

“சில நேரங்களில் மது அருந்துவது உண்மையான அனுபவத்தை மங்கச் செய்கிறது,” என்று கூறும் பாண்டே, “ஒரு கேளிக்கை விடுதி போன்றோ, வழக்கமான நிகழ்வைப் போன்றோ இல்லாமல், இந்தியத் திருமணங்களின் உணர்வை வெளிப்படுத்தும் ஒரு தனித்துவமான அனுபவத்தை உருவாக்க விரும்பினோம்”என்று பகிர்ந்து கொள்கிறார்.