மேலும், “இது தேர்தலுக்கான கூட்டணி மட்டும் இல்லை. சமூக நீதி, மதச்சார்பின்மை போன்ற விழுமியங்களைப் பாதுகாக்கும் நோக்கிலான கூட்டணி இது. அதன் அடிப்படையிலேயே பயணிப்போம். இடையே வரும் தேர்தல்களை இணைந்து சந்திப்போம்” என்றார்.

“இந்துத்துவா, பாசிச சக்திகளுக்கு என்றுமே தமிழ்நாட்டில் இடமில்லை என்பதை உணர்த்தும் வகையில் இந்தக் கூட்டணி உருவாக்கப்பட்டுள்ளது. அதை பெயரிலேயே வெளிப்படுத்தியுள்ளோம்” என்று செய்தியாளர்களிடம் பேசினார் மதி​முக பொதுச் செய​லா​ளர் வைகோ.

“மாவட்ட அளவில் கூட்டணிக் கட்சிகள் ஒன்றிணைந்து செயல்படுவோம். இதற்கான கூட்டங்கள் மாவட்டந்தோறும் நடைபெறும். வரப்போகும் தேர்தல்களில் இந்தக் கூட்டணியின் வேட்பாளர்கள் வெற்றி பெற அனைவரும் பாடுபடுவோம். குறிப்பாக, இரு தொகுதிகளுக்கான இடைத்தேர்தலில் முதலமைச்சர் விஜய் தலைமையில் கூட்டணித் தலைவர்கள் பங்குபெறும் பிரசாரக் கூட்டங்கள் நடைபெறும்” என்றும் அவர் கூறினார்.

“தமிழகம் மற்றும் புதுச்சேரியில் இந்தக் கூட்டணியில் வெற்றிகரமாகச் செயல்படும், தேர்தல்களில் வெற்றிவாகை சூடும் என்ற நம்பிக்கையில் இந்தக் கூட்டம் நடைபெற்றது” என்றார் வைகோ.

இந்தக் கூட்டணியில் இடம்பெற்றுள்ள இந்திய யூனியன் முஸ்லிம் லீக் கட்சியின் தேசிய தலைவர் காதர் மொய்தீன் செய்தியாளர்களிடம் பேசுகையில், “தமிழக வரலாற்றில் இப்போது புதிய வரலாறு பிறந்திருக்கிறது. தமிழக வரலாற்றில் இதுவரை கூட்டணி அமைச்சரவை உருவாக்கப்பட்டது இல்லை. முதல் முறையாக தமிழக வெற்றிக் கழகத்தின் தலைவர், முதல்வர் ஜோசப் விஜய் தலைமையில் கூட்டணி அமைச்சரவை உருவாக்கப்பட்டுள்ளது” என்றார்.

மேலும், “இந்த வரலாறு இப்போது போல் என்றும் தொடரும். அப்படித் தொடர்ந்து வரக் கூடிய காலங்களில் எல்லாம் உள்ளாட்சித் தேர்தல் என்றாலும், இடைத்தேர்தல்கள் என்றாலும், சட்டமன்றத் தேர்தல் என்றாலும், நாடாளுமன்றத் தேர்தல் என்றாலும், இந்தக் கூட்டணியில் உள்ள அனைத்து சகோதர அமைப்புகளும் ஒன்று சேர்ந்து தமிழக வெற்றிக் கழகத்தின் தலைமையில் செயல்பட்டு, வெற்றி மேல் வெற்றியை ஈட்டித் தருவது என்று முடிவெடுக்கப்பட்டுள்ளது” என்று தெரிவித்தார்.

– இது, பிபிசிக்காக கலெக்டிவ் நியூஸ்ரூம் வெளியீடு