திருநெல்வேலி மாவட்ட காவல் கண்காணிப்பாளர் சிலம்பரசன் சாமியாடிகள் மீது வழக்குப் பதிவு செய்ய சம்பந்தப்பட்ட காவலர்களுக்கு உத்தரவிட்டுள்ளார். இந்நிலையில் சாமியாடிகள் உட்பட ஐந்து பேர் மீது நான்கு பிரிவுகளில் வழக்குப் பதிவு செய்யப்பட்டுள்ளது.

2001-ம் ஆண்டு இதே போன்ற சம்பவத்தில் தென்காசி மாவட்டம் பாவூர்சத்திரம் காவல்துறையினர் சாமியாடிகள் சிலர் மீது வழக்குப் பதிவு செய்திருந்தனர். பாதி எரிந்த நிலையில் இருந்த மனித தலை ஒன்றை ஏந்திக்கொண்டும், கல்லூரணி சுடலைமாடசாமி கோயில் திருவிழாவின் போது மனித மாமிசத்தை உண்டதாகவும் அவர்கள் மீது வழக்குப் பதிவு செய்யப்பட்டது.

இறந்தவரின் உடல் பாகத்தை கையில் வைத்து சாமியாடிகள் ஆடும் வீடியோ பொதுவெளியில் பகிரப்பட்டுள்ள நிலையில், இந்த சடங்கு குறித்து கேள்விகள் எழுப்பப்படுகின்றன. இந்த சடங்கு ஆண்டாண்டு காலமாக தென் மாவட்டங்களில் சுடலை மாடன் சாமி கோயில்களில் கடைப்பிடிக்கும் ஒன்றாகும்.

சுடலை மாடன் சாமி என்பவர் திருநெல்வேலி, தூத்துக்குடி, தென்காசி, கன்னியாகுமரி மாவட்டங்களில் தேவர், நாடார், ஆதி திராவிடர், பழங்குடியினர் என பல்வேறு சமூகத்தினராலும் வணங்கப்படும் தெய்வமாகும். நூற்றுக்கணக்கான சுடலைமாடசாமி கோயில்கள் உள்ள நிலையில், ஒவ்வொரு ஊரிலும் சுடலை மாடனுக்கு ஒரு கதை உண்டு. அந்த கதைகளில் சில ஒற்றுமைகள் இருக்கும், சிற்சில வித்தியாசங்களும் உண்டு.

அதில் “சுடலை தலை இல்லாமல் பிறந்ததால் சிவன் ஒரு குயவரிடம் மகனுக்கு ஒரு தலையை செய்து கொடுக்குமாறு கூறியுள்ளார். சுடலை சிறு வயது முதலே விரும்பியது மனித மாமிசம். பூமிக்கு இறங்கி வந்து சுடுகாடுக்குச் சென்று, இறந்தவர்களின் உடல்களை சாப்பிட தொடங்கியுள்ளார். கழுத்தில் குடல்களை மாலையாக அணிந்து, கல்லீரல்களையும் எலும்புகளையும் சாப்பிட்டுள்ளார். பார்வதிக்கு இது தெரியவந்தவுடன் அவரை பூமிக்கு விரட்டியுள்ளார். கிளம்புவதற்கு முன், தனக்கு எட்டு நாள் விழா நடத்தி மக்கள் வணங்க வேண்டும், தனது சாம்பல் உடல்நலம் குன்றியவர்களை குணப்படுத்த வேண்டும், தீய ஆவிகளை விரட்டியடிக்கும் சக்தி தனக்கு வேண்டும் என்று வேண்டியுள்ளார். அவரது கோரிக்கைகள் ஏற்றுக் கொள்ளப்பட்டன. பூமியில் அவர் பகவதியம்மனின் காவல் தெய்வமானார், அதற்கு பதிலாக அவருக்கு மனித பலிகொடுக்க வேண்டும்” என்று எழுதியுள்ளார்.

இதே கதையை கூறும் திருநெல்வேலி மனோன்மணியம் சுந்தரனார் பல்கலைகழக ஓய்வு பெற்ற தமிழ் பேராசிரியர் ஞா.ஸ்டீபன் மற்றொரு கதையும் நம்பப்படுவதாகவும் கூறுகிறார். “சுடலை என்பது ‘சுடர்’ என்று பொருள் கொள்ளும் வகையில் தீப்பொறியிலிருந்து வந்தவர் சுடலைமாடன் என்று நம்பப்படுகிறது. அவர் மெக்காவில் உள்ள கொடி மரத்தின் மீது இறங்கிவந்ததாகவும், அங்கிருந்து நாங்குநேரி வந்ததாகவும் கதைப்பாடல் இருக்கிறது. நாங்குநேரியில் உள்ள ஒத்தைப்பனை சுடலைமாடன் கோயில் இந்த பகுதியில் மிகவும் பிரபலமானதாகும். வேறு சுடலைமாட கோயில்களில் நாங்குநேரியிலிருந்து அந்த கோயிலுக்கு சுடலை எப்படி வந்தார் என்பதையும் சேர்த்து பாடுவார்கள்” என்றார்.

தூத்துக்குடி கயத்தாறு சுடலைமாடன் குறித்த இரண்டு நாட்டுப்புற பாடல்கள், கமுதி சுடலைமாடசாமி கோயில் குறித்த வில்லுப்பாட்டு, எழுத்தாளர் ஜெயமோகனின் மாடன் மோட்சம் என்ற சிறுகதை, கன்னியாகுமரி அருள்மிகு சிவ சுடலைமாடன் சாமி கோயில் குறித்த ஸ்தல வரலாறு ஆகியவற்றை ஆராய்ந்து சி. மாதவா அனுசுயா எழுதிய ஆய்வுக் கட்டுரையில், சுடலை என்ற சொல் ‘சுடு’ என்பதிலிருந்து வருகிறது. சுடலை என்பது சுடுகாடுகளை குறிக்க பயன்படுத்தப்பட்டதாகவும், சுடலை மாடன் என்பது சுடுகாடுகளின் காவலன் என்று பொருள் கொண்டதாகவும் தெரிவிக்கப்படுகிறது.