சிறுமி ஒருவர் பாலியல் வன்கொடுமை செய்யபட்ட வழக்கில் அலகாபாத் உயர் நீதிமண்டத்தின் கருத்து மனிதத்தன்மை அற்றது என உச்ச நீதிமன்றம் கடும் கண்டனம் தெரிவித்துள்ளது என, தினத்தந்தி செய்தி வெளியிட்டுள்ளது.

“உத்தரப் பிரதேச மாநிலத்தில், கடந்த 2021 ஆம் ஆண்டு, 14 வயது சிறுமி ஒருவர், அவரது கிராமத்தைச் சேர்ந்த 3 நபர்களால் பாலியல் வன்கொடுமைக்கு ஆளானார். இது தொடர்பாக, அவர்கள் மூவர் மீதும் போக்சோ சட்டத்தின் கீழ் வழக்கு தொடரப்பட்டது.

இது தொடர்பாக குற்றம் சாட்டப்பட்டவர்களுக்கு சிறப்பு நீதிமன்றத்தின் நீதிபதி சம்மன் அனுப்பினார். இந்த சம்மனுக்கு எதிராக அவர்கள் உயர் நீதிமன்றத்தில் மேல்முறையீடு செய்தனர்”, என அந்த செய்தியில் குறிப்பிடப்பட்டுள்ளது.

“இந்த மனுவை விசாரித்த நீதிபதி ராம் மனோகர் நாராயண் மிஸ்ரா, கடந்த மார்ச் 17 ஆம் தேதி அன்று, ‘வெறுமனே பெண்ணின் மார்பை பிடிப்பதும், கால்சட்டையின் நாடாவை இழுப்பதும் பாலியல் வன்கொடுமை ஆகாது’ என தீர்ப்பில் தெரிவித்தார். நீதிபதியின் இந்த தீர்ப்பு நாடு முழுவதும் விவாதங்களை எழுப்பியது”, என்கிறது அச்செய்தி.

“அலகாபாத் உயர் நீதிமன்றத்தின் இந்த கருத்தை உச்ச நீதிமன்றம் தானாக முன்வந்து விசாரித்தது. நீதிபதிகள் கவாய் மற்றும் அகஸ்டின் ஜார்ஜ் மாசி அமர்வு நேற்று இந்த விவகாரத்தை விசாரித்து, அலகாபாத் உயர் நீதிமன்றத்துக்கு கடும் கண்டனம் தெரிவித்தது.

இந்த விவகாரம் மிகவும் தீவிரமானது எனக்கூறிய நீதிபதிகள், உயர் நீதிமன்றத்தின் தீர்ப்புக்கு தடை விதித்து உத்தரவிட்டனர். ‘இந்த தீர்ப்பு மிகவும் மனிதத் தன்மையற்றதாகவும், நீதிபதியின் முழுமையான உணர்வின்மையை காட்டுவதாகவும் இருக்கிறது’ என்றும் உச்ச நீதிமன்றம் கூறியதாக”, தினத்தந்தியின் செய்தி கூறுகிறது.

“இந்த விவகாரத்தில் அலகாபாத் உயர் நீதிமன்ற தலைமை நீதிபதியை விசாரித்து நடவடிக்கை எடுக்க வேண்டும் என்று தெரிவித்த உச்ச நீதிமன்றம், இது தொடர்பாக மத்திய அரசு மற்றும் உத்தரப் பிரதேச அரசுகளுக்கு நோட்டீஸ் அனுப்பவும் உத்தரவிட்டது என்கிறது அந்த செய்தி.

சென்னை மாநகர போக்குவரத்துக் கழகம், ஏர்டெல் நிறுவனத்துடன் இணைந்து உருவாக்ககியுள்ள புதிய சிங்கார சென்னை பயண அட்டையை தமிழ்நாடு மாநில போக்குவரத்துத் துறை அமைச்சர் சா. சி. சிவசங்கர் அறிமுகம் செய்து வைத்தார் என்று தினமணி செய்தி வெளியிட்டுள்ளது.

“சென்னையில் போக்குவரத்தை ஊக்குவிக்கும் வகையில், பாரத ஸ்டேட் வங்கியுடன் இணைந்து சிங்கார சென்னை ஸ்மார்ட் அட்டை மூலம் மெட்ரோ ரயில், மாநகர பேருந்து உள்ளிட்டவற்றில் பயணிக்கும் திட்டம் நடைமுறையில் இருந்து வருகிறது. இந்நிலையில், அனைத்துப் பயணிகளும் சிங்கார சென்னை ஸ்மார்ட் அட்டையை எளிதாக பெற்று பயன்படுத்தும் வகையிலும், மேலும் இந்த திட்டத்தை விரிவுபடுத்தும் வகையிலும், ஏர்டெல் பேமென்ட்ஸ் வங்கியுடன் இணைந்து, சிங்கார சென்னை பயண அட்டை திட்டத்தை மாநகர போக்குவரத்துக்கழகம் தொடங்கியுள்ளது”, என்று அந்த செய்தியில் குறிப்பிடப்பட்டுள்ளது.

மேலும், “இந்த திட்டத்தை போக்குவரத்துத் துறை அமைச்சர் சா. சி. சிவசங்கர் நேற்று (மார்ச் 26) அறிமுகம் செய்து வைத்தார். சென்னையின் முக்கிய பேருந்து நிலையங்கள் மற்றும் பயணிகள் பயன்பாடு அதிகமுள்ள பேருந்து நிறுத்தங்களிலும், ஏர்டெல் பேமென்ட்ஸ் வங்கி இந்த புதிய சிங்கார சென்னை பயண அட்டையை வழங்கும்.

இதை 100 ரூபாய் கொடுத்து பெற்றுக்கொள்ளலாம், இதில் 50 ரூபாய்க்கு பயணம் செய்யலாம். இந்த அட்டையை இணையவழி சேவை, கைப்பேசி செயலி மற்றும் அங்கீகரிக்கப்பட்ட ஏர்டெல் பேமென்ட்ஸ் வங்கியின் விற்பனை மையங்கள் மூலமும் எளிதாக ரீசார்ஜ் செய்துகொள்ள முடியும்”, என்றும் தெரிவிக்கப்பட்டுள்ளது.

“தற்போது அறிமுகப்படுத்தப்பட்டுள்ள சிங்கார சென்னை பயண அட்டையில் ஏற்கெனவே 20 பயண நடைகளுக்கு ஒருமுறை அப்டேட் செய்யும் முறை மாற்றப்பட்டது, எண்ணிக்கையற்ற பயண நடைகள் மேற்கொள்ள ஏதுவாக இது வடிவமைக்கப்பட்டுள்ளது. மேலும் ரீசார்ஜ் செய்தபின் இந்த அட்டையை புதுப்பிக்க என, எஃப்.சி தொழில்நுட்பம் கொண்ட கைபேசிகள் மூலம் தாமாகவே ஏர்டெல் தேங்க்ஸ் செயலி மூலம் புதுப்பிக்கவும் வழிவகை செய்யப்பட்டுள்ளது”, என்கிறது அந்த தினமணி செய்தி.