மாநில அரசின் கல்விக் கொள்கை தொடர்பாக பிபிசி தமிழிடம் பேசிய கல்வியாளர் பிரின்ஸ் கஜேந்திரபாபு, “மும்மொழிக் கொள்கையை தேசிய கல்விக் கொள்கை வலியுறுத்துகிறது. ஆனால், தமிழ், ஆங்கிலம் என இரு மொழியை தனது கொள்கையாக மாநில அரசு கூறியுள்ளது” என்கிறார்.

“பிற மாநிலத்தைச் சார்ந்த மக்கள் வெவ்வேறு தாய் மொழியைக் கொண்டிருந்தால், அவரவர் தாய் மொழியை கற்க தேவையான வாய்ப்புகள், வசதிகள் செய்துத் தரப்படும் என மாநில அரசு கூறியுள்ளது ஏற்புடையது” என அவர் தெரிவித்தார்.

“தேசியக் கல்விக் கொள்கையில் பள்ளி பொதுத்தேர்வில் பெறும் மதிப்பெண்ணை நீட் தேர்வு போல உயர்கல்வியில் கணக்கில் எடுத்துக் கொள்வதில்லை. மாநில அரசின் கல்விக் கொள்கையில், உயர்கல்வி தொடர்வதற்கு நுழைவுத் தேர்வு இருக்காது என்ற அறிவிப்பு இல்லாதது ஏமாற்றம் தருகிறது” என்கிறார், பிரின்ஸ் கஜேந்திரபாபு.

பொதுத் தேர்வுகளை மாற்றியமைப்பது தொடர்பாக மாநில அரசின் கல்விக் கொள்கையில் கூறப்பட்டுள்ளது. இதற்கு கல்வியாளர்கள் மத்தியில் எதிர்ப்பு கிளம்பியுள்ளது.

10 மற்றும் 12ஆம் வகுப்புகளுக்கு மட்டும் பொதுத்தேர்வுகளை தொடர்ந்து நடத்த உள்ளதாக மாநில அரசு கூறியுள்ளது. தற்போது நடைமுறையில் 11 ஆம் வகுப்புக்கு பொதுத்தேர்வு நடத்தப்பட்டு வரும் நிலையில், “அதை ரத்து செய்வதாக அறிவித்திருப்பது தவறான முடிவு” எனக் கூறுகிறார், விழுப்புரம் தொகுதி நாடாளுமன்ற உறுப்பினர் ரவிக்குமார்.

2006-2011 தி.மு.க ஆட்சியில், பிளஸ் 1 படிப்புக்கு பொதுத்தேர்வு அவசியம் என்பதை வலியுறுத்தி ‘மக்கள் கல்வி இயக்கம்’ அமைப்பினர் போராட்டம் நடத்தினர்.

“தனியார் பள்ளிகளில் பிளஸ் 1 பாடத்தை நடத்தாமல் பிளஸ் 2 பாடத்தை மட்டும் நடத்தி மாணவர்களை அதிக மதிப்பெண் பெற வைத்தனர். இதனால் தொழிற்கல்வியில் அதிகளவில் தனியார் பள்ளி மாணவர்கள் சேர்ந்தனர்” எனக் கூறுகிறார் ரவிக்குமார் எம்.பி.

“அரசுப் பள்ளிகளும் இதேபோன்ற முறையைக் கடைபிடித்ததால் உயர்கல்வியின் தரம் பாதிக்கப்பட்டது. காரணம், பிளஸ் 1 படிப்பை முறையாக படிக்க வைப்பதில்லை. இதைப் போக்கும் வகையில் பிளஸ் 1 பொதுத்தேர்வு முறை கொண்டு வரப்பட்டது” எனவும் அவர் குறிப்பிட்டார்.

“பிளஸ் 1 பொதுத்தேர்வு ரத்து செய்யப்பட்டால், மேல்நிலைக் கல்வி மட்டுமின்றி உயர்கல்வியின் தரத்தையும் தொழிற்கல்வியின் தரத்தையும் கெடுத்துவிடும்” எனக் கூறும் ரவிக்குமார், “இந்த முடிவை முதலமைச்சர் மறுபரிசீலனை செய்ய வேண்டும்” என்கிறார்.

இதற்கு மாநில கல்விக் கொள்கையில் விளக்கம் அளிக்கப்பட்டுள்ளது. ‘திறன் மேம்பாடு மற்றும் கல்விசார் ஆயத்தநிலை ஆகியவற்றில் கவனம் செலுத்தும் வகையில் மாணவர்களை மாற்றத்துக்கு உள்ளாக்கும் ஆண்டாக பிளஸ் 1 வகுப்பை கருத்தில் கொள்ளவேண்டும்’ எனக் கூறுகிறது.

இந்த அணுகுமுறை தேர்வு சார்ந்த மன இறுக்கத்தைக் குறைக்க உதவுவதோடு 12 ஆம் வகுப்பு பொதுத்தேர்வுக்கு சிறப்பாகத் தயாராவதை உறுதி செய்து சமநிலையான மதிப்பீட்டு அமைப்பினை மேம்படுத்தும் எனவும் அதில் தெரிவிக்கப்பட்டுள்ளது.

பொதுப்பள்ளிக்கான மாநில அமைப்பின் பொதுச்செயலாளர் பிரின்ஸ் கஜேந்திர பாபு கூறுகையில், “பிளஸ் 2 படிப்பின்போது மட்டுமே தேர்வு இருக்கும் என்பது உளவியலை உணர்ந்து எடுக்கப்பட்டுள்ள நியாயமான நடவடிக்கை” என்கிறார்.

அதேநேரம், கருணாநிதி கொண்டு வந்த சமச்சீர் கல்விக் கொள்கைக்கு எதிராக மாதிரிப் பள்ளிகள் (Model Schools) மற்றும் தகைசால் (VETRI) பள்ளிகள் குறித்த அறிவிப்புகள் இடம்பெற்றிருப்பது கவலையளிப்பதாக பிரின்ஸ் கஜேந்திரபாபு கூறுகிறார்.

“பள்ளிகள், மாதிரிப் பள்ளிகள், தகைசால் பள்ளிகள் என்ற அடிப்படையில் பள்ளிக் கல்விக் கட்டமைப்பில் உள்ள பாகுபாடு, சமமான கற்றல் வாய்ப்பை அனைவருக்கும் உறுதி செய்யவில்லை. இத்தகைய கட்டமைப்பு சமத்துவத்துக்கும் சமூகநீதிக்கும் எதிரானது” என்கிறார் அவர்.

தேசிய கல்விக் கொள்கையை நிராகரிப்பதற்கான காரணங்கள், மாநில கல்விக் கொள்கையிலும் நியாயப்படுத்தப்பட்டுள்ளதாகவும் சமச்சீர்க் கல்விக் கோட்பாட்டின் அடிப்படையில் மாநிலப் பள்ளிக் கல்விக் கொள்கை அமையவில்லை எனவும் அவர் விமர்சித்தார்.

“பள்ளி இடைநிற்றலைக் குறைப்பதற்கு உயர்கல்வி நிறுவனங்களை எந்தளவுக்கு அதிகரிக்கப் போகிறார்கள் என்பது முக்கியம்” எனக் கூறும் ரவிக்குமார் எம்.பி, “தேசிய கல்விக் கொள்கையில் இருந்து எவ்வாறு மாறுபடுகிறோம் என்பதை மாநில அரசு கூறவில்லை. அதை தெளிவுபடுத்த வேண்டும்” என்கிறார்.

கல்வியாளர்களின் விமர்சனம் தொடர்பாக பள்ளிக்கல்வித் துறை இயக்குநர் கண்ணப்பனிடம் விளக்கம் பெறுவதற்கு பிபிசி தமிழ் முயன்றது. அதற்கான முயற்சிகள் எதுவும் பலன் அளிக்கவில்லை.

மாநில கல்விக் கொள்கை தொடர்பாக செய்தியாளர்களிடம் விளக்கம் அளித்த பள்ளிக்கல்வித் துறை அமைச்சர் அன்பில் மகேஷ் பொய்யாமொழி, “எதிர்காலத்துக்குத் தேவையான வகையில் இதை அடிப்படையாக வைத்து பல்வேறு திட்டங்களைக் கொண்டு வந்துள்ளோம். மாணவர்கள் சிந்தித்துப் புரிந்து கொள்ளும் வகையிலான கல்வியை கொண்டு வருகிறோம்” எனக் கூறினார்.

“பயம் சார்ந்து தேர்வு இருக்கக் கூடாது. புரிதல் தன்மையுடன் தேர்வை எதிர்நோக்குவது குறித்து கல்விக் கொள்கையில் கூறப்பட்டுள்ளது” எனக் கூறியுள்ள அமைச்சர் அன்பில் மகேஷ், மாதிரி பள்ளிகள் குறித்தும் விவரித்தார்.

“மாவட்டத்துக்கு ஒரு மாதிரி பள்ளியை கொண்டு வருவது மட்டுமல்லாமல் ஒன்றியத்துக்கு ஒரு பள்ளி எனக் கொண்டு வரத் திட்டமிட்டுள்ளோம்” என்கிறார்.

ஒன்பதாம் வகுப்பில் இருந்தே மாணவர்களைத் தயார்படுத்தும் வகையில் மாநில கல்விக் கொள்கை கொண்டு வரப்பட்டுள்ளதாகவும் அனைவரும் பயன்பெறும் வகையில் தொழில்நுட்பம் சார்ந்து இதனைச் செயல்படுத்த உள்ளதாகவும் அவர் தெரிவித்தார்.

– இது, பிபிசிக்காக கலெக்டிவ் நியூஸ்ரூம் வெளியீடு