இத்தகைய சூழலில், ரமலான் மாதத்தில் ஒரு இஸ்லாமியர் நோன்பு கடைபிடிக்காமல் இருப்பது தவறு என மக்கள் கூறத் தொடங்கினர்.

ரமலான் மாதத்தில் இதுபோன்ற செயல்களில் ஈடுபடுவது குற்றம் என்று அகில இந்திய முஸ்லிம் ஜமாத் தலைவர் மௌலானா ஷாஹாபுதீன் ரஸ்வி பரேல்வி கூறியிருந்தார்.

மறுபுறம் பிரபல பாடலாசிரியரும் எழுத்தாளருமான ஜாவேத் அக்தர் ஷமிக்கு ஆதரவாக முன்வந்து, “ஷமி, கிரிக்கெட் போட்டியின் போது மைதானத்தில் தண்ணீர் குடிப்பதில் பிரச்னை உள்ள அந்த முட்டாள்களைப் பற்றி கவலைப்பட வேண்டாம். எங்களைப் பெருமைப்படுத்தும் சிறந்த இந்திய அணியின் ஒரு முக்கிய அங்கமாக நீங்கள் இருக்கிறீர்கள். உங்களுக்கும் அணிக்கும் எனது வாழ்த்துக்கள்” என்றார்.

ஆனால் இந்த விவாதம் இத்துடன் மட்டும் நின்றுவிடவில்லை. அது இந்திய எல்லையைக் கடந்து பாகிஸ்தானையும் அடைந்தது.

பாகிஸ்தானின் சிட்டி-42 செய்தி சேனலின் தொகுப்பாளர், பாகிஸ்தான் முன்னாள் கேப்டன் இன்சமாம்-உல்-ஹக்கிடம் முகமது ஷமி ஆட்டத்தின்போது நோன்பு கடைப்பிடிக்காதது தொடர்பான கேள்வியைக் கேட்டார்.

“விளையாடும் போது நோன்பை கடைபிடிக்காதது பெரிய விஷயமல்ல. எனக்கு தோன்றுவது என்னவென்றால், அவர் பொதுவில் தண்ணீர் குடித்ததால்தான் அதிகமான எதிர்ப்பு ஏற்பட்டது. விளையாடும் போது நோன்பு கடைப்பிடிப்பது கடினம். எங்களுக்கும் இதில் சொந்த அனுபவம் உண்டு. நோன்பு நேரத்தில் போட்டி நடந்தால், தண்ணீர் இடைவேளையின் போது பாகிஸ்தான் அணி திரைக்குப் பின்னால் சென்றுவிடுவோம்” என்று கூறினார்.

தொடர்ந்து பேசிய இன்சமாம்-உல்-ஹக், “திரையின் மறைவில் தண்ணீர் குடித்துவிடுவோம். ஆனால் பிறரின் முன் மரியாதையை வெளிப்படுத்துவோம். நான் அவரிடம் சொல்ல விரும்புவது என்னவென்றால், தண்ணீர் குடிக்க வேண்டுமானால் திரையின் பின்னால் சென்று குடிக்க வேண்டும். எல்லாருக்கும் முன்னிலையில் குடிக்க வேண்டாம். நீங்கள் பயணத்தில் இருக்கிறீர்கள் என்றால், நோன்பை விடுவதற்கு அனுமதி இருக்கிறது” என்றும் கூறினார்.

மேலும் “விளையாடும்போது நோன்பு கடைபிடிப்பது மிகவும் கடினம். ஒருவரைத் திருப்திப்படுத்துவதற்காக நோன்பு கடைப்பிடிக்கவோ கைவிடவோ கூடாது. ஒரு வேகப்பந்து வீச்சாளர் மிகவும் கடினமாக உழைக்க வேண்டும். இப்படிப்பட்ட சூழ்நிலையில், போட்டிகளின் போது நோன்பு இருப்பது கடினமான பணி” என்று தெரிவித்தார்.

“நான் சொல்ல விரும்புவது எல்லாம் எல்லோர் முன்னிலையிலும் சாப்பிடவோ குடிக்கவோ கூடாது என்பதுதான். ஷமி திரைக்குப் பின்னால் தண்ணீர் குடித்திருந்தால் எந்த சர்ச்சையும் ஏற்பட்டிருக்காது” என்றார் இன்சமாம்.

முன்னதாக, 2023 ஒருநாள் உலகக் கோப்பையில் இலங்கைக்கு எதிரான போட்டியின் போது முகமது ஷமி தொடர்பாக ஒரு சர்ச்சை எழுந்தது.

இந்தப் போட்டியில் முகமது ஷமி ஐந்து விக்கெட்டுகளை வீழ்த்தினார். ஐந்தாவது விக்கெட்டை வீழ்த்திய பிறகு, ஷமி தரையில் அமர்ந்தார்.

அவர் அமர்ந்த விதம் அவர் தொழுகையின்போது வணங்குவதைப் போல் தோன்றியது. ஆனால் அதற்குப் பிறகு அவர் உடனே எழுந்துவிட்டார்.

இதைத் தொடர்ந்து, சர்ச்சையைத் தவிர்க்கவே ஷமி தன்னை தடுத்துக்கொண்டார் என்று மக்கள் கூறத் தொடங்கினர்.

ஆனால், பிப்ரவரி 2024 இல், ஒரு யூடியூப் சேனலுடன் பேசுகையில், “நான் தொழுகை செய்ய விரும்பினேன், ஆனால் அதைச் செய்யவில்லை என்று சிலர் கூறுகிறார்கள். சிலர் நாட்டை விட்டு வெளியேறும்படி கேட்டனர். அவர்களுடைய மனதில் என்ன ஆசை இருக்கிறதோ, அதையே அவர்கள் கூறினார்கள்” என்று முகமது ஷமி அந்த சர்ச்சை குறித்து கூறினார்.

தொடர்ந்து பேசிய அவர், “முதலில், நான் யாருக்கும் பயப்படவில்லை. நான் ஒரு இஸ்லாமியர். அதற்காக நான் பெருமைப்படுகிறேன். நான் ஒரு இந்தியன் என்பதில் பெருமை கொள்கிறேன். எனக்கு, நாடுதான் முதலில் முக்கியம், இது யாரையாவது தொந்தரவு செய்தால், எனக்கு கவலையில்லை. நான் தொழுகை செய்ய விரும்பினால், அப்படியே செய்திருப்பேன்”என்றும் தெரிவித்தார்.