இந்தி கற்க விரும்புவோர் தாமாக முன்வந்து இந்தி பிரசார சபாவின் மூலம் இந்தி கற்றுக் கொள்ளலாம். தக்‌ஷிண பாரத் இந்தி பிரசார சபா, இந்தி மொழி பிரசாரத்துக்காக 1918-இல் காந்தியால் உருவாக்கப்பட்டது. சென்னையை தலைமையிடமாக கொண்ட இந்தி பிரசார சபா நடத்தும் தேர்வுகளை எழுதி சான்றிதழ் பெறலாம்.

தாமாக முன் வந்து இந்தி கற்பவர்கள் பெரும்பாலும் மாணவர்களாக இருந்தாலும், மூத்த குடிமக்கள், ஐபிஎஸ் அதிகாரிகள், ஐடி ஊழியர்கள் போன்றவர்களும் இந்தி மொழியை கற்றுக் கொள்கின்றனர்.

இந்தி பிரசார சபா தரவுகளின் படி, தமிழ்நாட்டில் ஆண்டுதோறும் சுமார் மூன்று முதல் நான்கு லட்சம் பேர் இந்தி தேர்வு எழுதுகின்றனர். 2009-ஆம் ஆண்டு சென்னையிலிருந்து 27,600 மாணவர்களும் சென்னை தவிர மாநிலத்தின் பிற பகுதிகளிலிருந்து 1.5 லட்சம் மாணவர்களும் இந்தி தேர்வு எழுதினர். அடுத்த 15 ஆண்டுகளில் இந்த எண்ணிக்கை இரடிப்பாகியுள்ளது என்று தரவுகள் தெரிவிக்கின்றன.

2024-ம் ஆண்டு இந்தி தேர்வுகளை சென்னையிலிருந்து 1,39,311 பேரும், தமிழ்நாட்டின் பிற பகுதிகளிலிருந்து 2,11,354 பேரும் எழுதியுள்ளனர். இடையில் சில ஆண்டுகளில் இந்த எண்ணிக்கை அதிகரித்து, மீண்டும் குறைந்துள்ளது என்பது குறிப்பிடத்தக்கது.

2014-ம் ஆண்டு சென்னையில் 1.21 லட்சம் பேரும் தமிழ்நாட்டின் பிற பகுதிகளில் 3.71 லட்சம் பேரும் இந்த தேர்வுகளை எழுதினர். 2019-ம் ஆண்டு சென்னையில் 1.03 லட்சம் பேரும், தமிழ்நாட்டின் பிற பகுதிகளிலிருந்து 2.85 லட்சம் பேரும் எழுதினர். அடுத்த ஆண்டு இந்த எண்ணிக்கை மேலும் அதிகமானது. சென்னையில் 1.33 லட்சம் பேரும், தமிழ்நாட்டின் பிற பகுதிகளில் 3.52 லட்சம் பேரும் இந்தி தேர்வுகளை எழுதினர்.

2021-ம் ஆண்டு இந்த எண்ணிக்கை சற்று குறைந்தது. அடுத்து வந்த 2 ஆண்டுகளில் அது மேலும் அதிகரித்தது. 2021-ல் சென்னையில் 1.04 லட்சம் பேரும் மாநிலத்தின் பிற பகுதிகளில் 2.43 லட்சம் பேரும் இந்தி தேர்வு எழுதினர்.

சென்னை மண்டலத்தில் 2022-ம் ஆண்டு 1.14 லட்சம் பேர், 2023-ம் ஆண்டில் 1.25 லட்சம் பேர், 2024-ம் ஆண்டு 1.39 லட்சம் பேர் என இந்தி தேர்வு எழுதியவர்களின் எண்ணிக்கை தொடர்ந்து அதிகரித்து வந்துள்ளது.

சென்னை தவிர்த்த தமிழ்நாட்டின் பிற பகுதிகளிலிருந்து 2022-ம் ஆண்டு 2.59 லட்சம் பேரும் , அடுத்த ஆண்டு 2.88 லட்சம் பேரும் எழுதியிருந்தனர். 2024-ம் ஆண்டு இந்த எண்ணிக்கை 2.11 லட்சமாக குறைந்திருந்தது.