“பிகாரில் மிக உயர்ந்த பதவியில் இருப்பவர் வெளிப்படையாகவே இதுபோன்ற நடத்தையில் ஈடுபடுகிறார். மாநிலத்தில் பெண்கள் எவ்வளவு பாதுகாப்பாக இருப்பார்கள் என்று கற்பனை செய்து பாருங்கள். இந்த இழிவான செயலுக்காக நிதிஷ் குமார் உடனடியாக ராஜினாமா செய்ய வேண்டும். இந்த அநாகரிக செயல் மன்னிக்க முடியாதது” என்று காங்கிரஸ் எழுதியது.

பிகாரின் முக்கிய எதிர்க்கட்சியான ராஷ்டிரிய ஜனதா தளம், “நிதிஷ் ஜி-க்கு என்ன நேர்ந்தது? அவரது மனநிலை பரிதாபகரமான நிலையை எட்டியுள்ளது…” என்று எழுதியது.

ஐக்கிய ஜனதா தளம் கட்சியின் செய்தித் தொடர்பாளர் நீரஜ் குமார், இந்தியன் எக்ஸ்பிரஸ் ஆங்கில நாளிதழிடம் பேசுகையில், எந்தவொரு குறிப்பிட்ட வீடியோ காட்சியையும் எதிர்க்கட்சிகள் தேவையில்லாமல் முன்னிலைப்படுத்தக் கூடாது என்று கூறினார்.

“பிகாரில் பெண்கள் மற்றும் சிறுபான்மையினரின் நலனுக்காக நிதிஷ்குமார் நிறைய செய்துள்ளார்” என்று நீரஜ் குமார் கூறினார்.

இந்த விவகாரம் குறித்து பேவ்பந்து மதகுரு காரி இஷாக் கோரா, பிடிஐ செய்தி நிறுவனத்திடம் பேசுகையில், “இது எனக்கு மட்டுமல்ல ஒட்டுமொத்த தேச மக்களுக்கும் ஆத்திரத்தை ஏற்படுத்தியிருக்கும். ஒரு நிகழ்ச்சியில் ஒரு பெண்ணின் முகத்திரையை நிதீஷ் குமார் கழற்றியிருப்பது தெரிகிறது. ஒருபுறம் பெண்களின் மரியாதையைப் பற்றிப் பேசுகிறீர்கள், மறுபுறம் ஒரு பெண்ணை இழிவுபடுத்துவது போல் தெரிகிறது. இந்த விவகாரத்தில் ஒட்டுமொத்த நாட்டு பெண்களிடமும் நிதிஷ்குமார் மன்னிப்பு கேட்க வேண்டும்” என்றார்.

பாகிஸ்தானைச் சேர்ந்தவர்களும் சமூக வலைதளங்களில் இந்த வீடியோ பற்றி கருத்துப் பதிவிட்டு வருகின்றனர். நிதிஷ் குமாரின் வீடியோவைப் பகிர்ந்த பாகிஸ்தான் அரசியல் ஆய்வாளர் அம்மார் மசூத், “இந்தியாவில் முஸ்லிம்கள் மோசமாக நடத்தப்படுகிறார்கள் என்பதற்கு இது ஒரு சோகமான உதாரணம். பிகார் முதல்வர் நிதிஷ்குமார் ஒரு முஸ்லிம் பெண் மருத்துவரிடம் பணி நியமனக் கடிதத்தை வழங்கும்போது அவரது ஹிஜாபை வலுக்கட்டாயமாக கழற்றியிருக்கிறார்” என்று கூறினார்.

பாகிஸ்தான் பத்திரிகையாளர் மொயீத் பிர்சாதா எக்ஸ் தளத்தில், “இது ஆணாதிக்கத்திற்கும் நவீனத்துவத்திற்கும் இடையிலான கலாசார மோதலை பல நிலைகளில் காட்டுகிறது?” என்று எழுதியிருக்கிறார்.

சமீபத்திய ஆண்டுகளில், பொதுக் கூட்டங்களிலும், சட்டப் பேரவையிலும் நிதிஷ் குமாரின் நடத்தை பல கேள்விகளை எழுப்பியிருக்கிறது.

-இது, பிபிசிக்காக கலெக்டிவ் நியூஸ்ரூம் வெளியீடு