மருத்துவம் படிக்கும் மாணவர்கள் அவர்கள் படிக்கும் நோய்களின் அறிகுறிகள் தங்களுக்கு இருப்பதாகவோ அல்லது அந்த நோய் ஏற்படும் அபாயம் தங்களுக்கு இருப்பதாகவோ எண்ணி அச்சத்திற்கு உள்ளாகும் நிலையே மெடிக்கல் ஸ்டூடண்ட் சிண்ட்ரோம் என்கிறது அமெரிக்காவின் தேசிய சுகாதார நிறுவனம்.

இது தொடர்பாக பிபிசி தமிழிடம் பேசிய மனநல மருத்துவர் பூர்ண சந்திரிகா, “பயிற்சி மருத்துவர்கள் இதுபோன்ற பிரச்னையைச் சந்திப்பது மிகவும் பொதுவானது. மருத்துவப் படிப்பின் முதல் ஆண்டில் மனித உடலின் கட்டமைப்பு, அதன் செயல்பாடுகள் மற்றும் உடலில் உள்ள வேதியியல் பரிமாற்றங்கள் ஆகியவற்றைப் பாடங்களாகவே படிப்பார்கள்.

அதில் நோயைப் பற்றியோ, அதன் அறிகுறிகளைப் பற்றியோ அவர்கள் படிக்க மாட்டார்கள். ஆனால், இரண்டாம் ஆண்டில் மனித உடலில் ஏற்படும் நோய்களைப் பற்றி விளக்கும் நோயியல் (pathology) என்ற பாடத்தைப் படிப்பார்கள். அப்போதுதான் அவர்களுக்குள் ஒரு பதற்றம் மற்றும் பயம் ஏற்படுகின்றது,” என்று விளக்கினார்.

மருத்துவ மாணவர்களுக்கு மருத்துவ வசதிகளை அணுகும் நடைமுறை எளிதாக இருப்பதால், உடல்நிலையில் சந்தேகம் இருக்கக் கூடிய மாணவர்கள் அதை அவர்களுக்குச் சாதகமாக பயன்படுத்திக் கொள்வதாகவும் குறிப்பிட்டார் மருத்துவர் பூர்ண சந்திரிகா.

“உதாரணமாக ரத்தப் பரிசோதனை, ஸ்கேன் போன்ற சோதனைகளை அவர்கள் செய்துகொள்ள நிறைய வாய்ப்புகள் உள்ளன. அதன் முடிவுகளைப் பார்த்து, தனக்கு எந்தப் பிரச்னையும் இல்லை எனத் தெரிந்த பின்னரே அவர்களின் மனம் அமைதியடையும்.”

“முதல் முறையாக இரண்டாம் ஆண்டில்தான் மருத்துவ மாணவர்கள் நோயாளிகளைப் பார்க்க ஆரம்பிப்பார்கள். இத்தகைய பல்வேறு மனநலம் சார்ந்த காரணிகளால், இது அனைத்து மருத்துவ மாணவர்களையும் பாதிக்கும் என்று குறிப்பிட்டுச் சொல்ல முடியாது. சில பேருக்கு அவ்வாறான பயம் ஏற்பட்டாலும் அதை எளிதில் கடந்துவிடுவர், சிலருக்கு அது கடினம்” என்கிறார் தமிழ்நாடு பயிற்சி மருத்துவர் சங்கத்தின் பொதுச் செயலாளர், மருத்துவர் கீர்த்தி வர்மன்.