சில விமர்சகர்கள் மெலனியா அமெரிக்காவின் முதல் பெண்மணியாக அவரது பாத்திரத்தை அவர் உண்மையிலேயே அனுபவித்தாரா என்று கேள்வி எழுப்பினர்.

அவரது வாழ்க்கை வரலாற்றை எழுதிய முன்னாள் சி.என்.என் நிருபர் கேட் பென்னட், மெலனியா முதல் பெண்மணியாக இருக்க ஆரம்பக் கட்டத்தில் தயக்கம் காட்டிய போதிலும், அவர் உண்மையில் அந்தப் பாத்திரத்தை ரசித்ததாக நம்புகிறார்.

“முதல் பெண்ணாக இருப்பதையும் வெள்ளை மாளிகையின் வசதிகளையும் அவர் விரும்பினார்,” என்று பீப்பிள் பத்திரிகைக்கு பென்னட் 2021-இல் அளித்த பேட்டியில் கூறினார்.

“அவர் உண்மையில் அதை மிகவும் ரசிக்கிறார் என்று நினைக்கிறேன்,” என்று கூறினார்.

மெலனியா டிரம்ப் தனது நினைவுக் குறிப்பில், “முதல் பெண்மணியாக இந்த அதிகாரத்தை நன்மைக்காகப் பயன்படுத்துவதற்கான வலுவான கடமை உணர்வு எனக்கு உள்ளது,” என்று எழுதியிருக்கிறார்.

1999-ஆம் ஆண்டு ஒரு நேர்காணலில் அவர் தனது அப்போதைய காதலன் டிரம்ப் அதிபர் பதவிக்குப் போட்டியிட்டால், முன்னாள் முதல் பெண்மணிகளான ஜாக்குலின் கென்னடி மற்றும் பெட்டி ஃபோர்டு ஆகியோரை முன்மாதிரியாகப் பார்ப்பேன் என்றும், அவர்களை ‘மிகவும் மரபுமிக்கவர்கள்’ என்று கருதுவதாகவும் கூறினார்.

தடகள வீராங்கனையான திருமதி. ஃபோர்டு முதல் பெண்மணியாக இருந்த போது, பெண்களின் உரிமைகள் மற்றும் கருக்கலைப்பு உரிமைகளுக்காகப் போராடினார், ​​ஃபேஷன் உலகில் செல்வாக்கு மிக்க திருமதி. கென்னடி வெள்ளை மாளிகையைப் பராமரிப்பதில் உறுதியாக இருந்தார்.

டிரம்ப்பின் முந்தைய பதவிக் காலத்தில், வாஷிங்டனுக்குச் சென்ற பிறகு, மெலனியா டிரம்ப் முதல் பெண்மணியின் பொறுப்புகளை ஏற்கத் துவங்கினார். அதாவது, மதிய உணவு விருந்துகள் மற்றும் வருகைதரும் உலகத் தலைவர்களுக்கு அரசு விருந்துகளை வழங்குதல் ஆகிய பொறுப்புகளை ஏற்று கொண்டார்.

அவர் வெள்ளை மாளிகையின் அழகியல் மீது கவனம் செலுத்தினார். விரிவான புதுப்பித்தல் பணிகளை மேற்கொண்டார். கிறிஸ்துமஸ் அலங்காரங்களை உருவாக்கினார்.

பல சந்தர்ப்பத்தில் அவரது ஆடை ஊடக கவனத்தையும் சர்ச்சையையும் ஈர்த்தது. குறிப்பாக அவர் 2018-இல் குடியேறியக் குழந்தைகள் தடுப்பு மையத்திற்குச் சென்ற போது, “ஐ ரியலி டோன்ட் கேர், டூ யூ?” என்று எழுதப்பட்ட ஜாக்கெட்டை அணிந்திருந்தார்.

“தன்னை விமர்சித்த இடதுசாரி ஊடகங்களுக்கும் விமர்சித்தவர்களுக்கும் இந்த ஜாக்கெட் ஒரு பதில்,” என்று அவர் கூறினார்.

மெலனியாவின் முன்னாள் நண்பரும் மூத்த ஆலோசகரான ஒருவர் அவரின் தனிப்பட்ட உரையாடலை ரகசியமாகப் பதிவு செய்தததால் மெலனியா மீண்டும் சர்ச்சையில் சிக்கினார். அந்த உரையாடலில், ‘குடியேறிய குழந்தைகளை அவர்களது குடும்பங்களில் இருந்து பிரிக்கும் தனது கணவரின் கொள்கைகளுக்காக அவர் விமர்சிக்கப்படுவது தனக்கு விரக்தியை ஏற்படுத்துவதாகக்’ கூறி இருந்தார்.

இந்தக் கொள்கையைப் பற்றித் தனக்கு எதுவும் தெரியாது என்றும், அதை ஆதரிக்கவில்லை என்று டிரம்பிடம் தனிப்பட்ட முறையில் கூறியதாகவும் அவர் பின்னர் தெரிவித்தார். இறுதியில், சர்ச்சைகளுக்கு மத்தியில் ஜூன் 2018-இல் இந்தக் கொள்கை அதிபரால் ரத்து செய்யப்பட்டது.