மோந்தா புயல் எதிரொலியாக சென்னை, திருவள்ளூர் மற்றும் ராணிப்பேட்டை ஆகிய மாவட்டங்களில் பள்ளிகளுக்கு மட்டும் இன்று (28/10/2025) விடுமுறை அறிவிக்கப்பட்டுள்ளது.

மோன்தா புயல் எதிரொலியாக சென்னை, எண்ணூர் மற்றும் காட்டுப்பள்ளி துறைமுகங்களில் நான்காம் எண் புயல் எச்சரிக்கை கூண்டு ஏற்றப்பட்டுள்ளது.

தமிழ்நாட்டின் கடலூர், நாகப்பட்டினம், தூத்துக்குடி, பாம்பன் துறைமுகங்களிலும், புதுச்சேரியில் புதுச்சேரி, காரைக்கால் ஆகிய இரு துறைமுகங்களிலும் இரண்டாம் எண் புயல் எச்சரிக்கைக் கூண்டு ஏற்றப்பட்டிருக்கிறது.

அக்டோபர் 29-ஆம் தேதி வரை கடல் சீற்றத்துடன் காணப்படும் என்று சென்னை வானிலை ஆயுவு மையம் தெரிவித்திருக்கிறது. இன்றும் நாளையும் தமிழ்நாட்டு கடற்கரைப் பகுதிகளில் மணிக்கு 45-55 கிலோமீட்டர் வேகத்தில் காற்று வீசும். அது மணிக்கு 65 கிலோமீட்டர் வேகத்தையும் எட்டலாம்.

ஆகவே, தமிழ்நாட்டு மீனவர்கள் அக்டோபர் 29-ஆம் தேதி வரை கடலுக்குள் செல்லவேண்டாம் என்று அறிவுறுத்தப்பட்டுள்ளது.

கடந்த 24 மணி நேரங்களில் தமிழ்நாட்டில் 16 இடங்களில் கனமழையும், ஒரு இடத்தில் மிக கன மழையும் பெய்துள்ளது என்றும், எண்ணூரில் அதிகபட்சமாக 13 செ.மீ மழை பெய்துள்ளது என்றும் இந்திய வானிலை ஆய்வு மைய விஞ்ஞானி செந்தாமரைக்கண்ணன் தெரிவித்தார். தமிழ்நாட்டில் அடுத்த 5 நாள்களுக்கு லேசானது முதல் மிதமான மழை பெய்யும் என்றும் அவர் கூறினார்.

மேற்கு கோதாவரி, கிருஷ்ணா, விசாகப்பட்டினம் உள்ளிட்ட 17 கடலோர மற்றும் அதைச் சுற்றியுள்ள மாவட்டங்கள் மற்றும் புதுச்சேரியின் ஏனாம் ஆகிய இடங்களில் இடியுடன் கூடிய அதிகனமழை பெய்யும் என்பதால் ரெட் அலர்ட் கொடுக்கப்பட்டிருக்கிறது.

ஆந்திரா, ஏனாம் மற்றும் ராயலசீமா கடலோரப் பகுதிகளில் மணிக்கு 60-70 கிலோமீட்டர் வேகத்தில் புயல் காற்று வீசுமென்றும், அது மணிக்கு 80 கிலோமீட்டர் வரை வேகமடையும் என்றும் வானிலை ஆயுவு மையம் எச்சரிக்கிறது. இதே புயல் இன்றே மணிக்கு 90-100 கிலோமீட்டர் வேகத்தை அடையலாம் என்றும் கூறப்பட்டிருக்கிறது. ஒருசில மாவட்டங்களுக்கு நாளையும் ரெட் அலர்ட் எச்சரிக்கை விடுக்கப்பட்டுள்ளது.

சில இடங்களில் நிலச்சரிவு ஏற்படலாம் என்றும், கடலோரப் பகுதிகளில் வெள்ளம் ஏற்படும் அபாயம் இருப்பதாகவும் எச்சரிக்கப்பட்டுள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு