டாம் பேட்மேன், வெளியுறவு செய்தியாளர், வாஷிங்டன்

டொனால்ட் டிரம்பும், ஜேடி வான்ஸும் ஸெலன்ஸ்கியை அவமானத்தப்படுத்தும் வகையில் நடத்திய பின்னர், அமெரிக்க அதிபர் யுக்ரேனுக்கு வழங்கப்படும் ராணுவ மற்றும் உளவுத் தகவல் பரிமாற்ற உதவிகளை நிறுத்திவைத்தார்.

இதனால் காலம் செல்ல செல்ல யுக்ரேன் தன்னை தற்காத்துக்கொள்ளும் திறன் அடிமட்ட அளவில் பாதிக்கப்படும். டிரம்பை எதிர்க்கும் ஜனநாயக கட்சியினர் அவர் ரஷ்யாவுடன் கூட்டு சேர்ந்திருக்கிறார் என்பதில் எந்த சந்தேகமும் இல்லை என கூறுகின்றனர்.

அமெரிக்க அதிபரின் கனிம ஒப்பந்தத்தில் கையெழுத்திடவும், போர் நிறுத்தத்திற்கு ஒப்புக்கொள்ளவும் ஸெலன்ஸ்கிக்கு அளிக்கப்படும் அழுத்தமாக இந்த நடவடிக்கையை அமெரிக்க நிர்வாகம் பார்க்கிறது.

டிரம்பின் தூதர் ஜெனரல் கீத் கெல்லாக் அமெரிக்கா ராணுவ உதவியை திரும்பப் பெற்றுக்கொள்வது “கழுதையை அதன் முகத்தில் (ஒரு கட்டையால்) அடிப்பதை போன்றது…இப்போது நீங்கள் அவர்களது கவனத்தை ஈர்த்துள்ளீர்கள், இது மிகவும் முக்கியமானது…. அதன் பின்னர் (அதிபர் விரும்புவதை) செய்வது அவர்களைப் பொறுத்தது.”

இவ்வளவு அழுத்தங்களை கொடுத்த பின்னர், செளதி அரேபியாவில் யுக்ரேனைச் சேர்ந்தவர்களுடன் பேச்சுவார்த்தை நடத்தவுள்ள டிரம்பின் முதன்மையான வெளிநாட்டு கொள்கை குழுவைச் சேர்ந்தவர்கள் சற்று சமரசமான குரலில் பேசத் தொடங்கியுள்ளனர்.

ரஷ்யா யுக்ரேன் மீதான குண்டுவீச்சுகளை தீவிரப்படுத்துவதை தடுக்கும் நோக்கோடு, வெள்ளிக்கிழமையன்று அரிதாக ரஷ்யாவை விமர்சித்த டிரம்ப், ஏற்கனவே கடும் தடைகள் விதிக்கப்பட்ட அந்த நாட்டின் மீது மேலும் அதிக தடைகள் விதிக்கப்படும் என எச்சரித்தார்.

ஆனால், இந்த ஒரு தருணத்தை தவிர, இந்த நிர்வாகம் தனது கூட்டாளியாக கருதப்படும் நாட்டை திரும்ப திரும்ப கண்டித்ததுடன், தனது விரோதியை நோக்கி அதுபோன்ற விமர்சனங்கள் செய்வதை தவிர்த்து வந்திருக்கிறது.

ரஷ்ய வெளியுறவு அமைச்சர் செர்ஜய் லேவரோவ் யுக்ரேனில் ஐரோப்பிய அமைதிப்படையினரை அனுமதிக்க முடியாது என தெரிவித்த கருத்தை பற்றி அமெரிக்க வெளியுறவுத் துறை செய்தித் தொடர்பாளர் டேமி புருஸிடம் வியாழக்கிழமை கேட்டேன். அது மேற்கின் “பகைமையான குறிக்கோள்” என குறிப்பிட்ட செர்ஜெய் இதில் “சமரசத்திற்கு இடமில்லை” என தெரிவித்திருந்தார்.

இது குறித்து பதிலளிக்க மறுத்த புரூஸ், வெளிநாட்டு தலைவர்கள் அல்லது அமைச்சர்கள் குறித்து கருத்து தெரிவிக்க தனக்கு அதிகாரமில்லை என தெரிவித்தார். ஆனால் அதற்கு சற்று முன்னர்தான் ஸெலன்ஸ்கி “அமைதிக்கு தயாராக இல்லை” என டிரம்ப் கூறியதை புரூஸ் திரும்பக் கூறினார்.