“நாடாளுமன்ற நுழைவு வாயில் வழியாக நுழைய முயன்றேன். பாஜக எம்.பி. என்னை தடுக்க முயன்று, தள்ளினார். அது எங்களை பாதிக்காது. இது நாடாளுமன்றத்தின் நுழைவு வாயில், உள்ளே செல்ல எங்களுக்கு உரிமை உள்ளது” என ராகுல் காந்தி தெரிவித்துள்ளார்.

நாடாளுமன்றம் இன்று (டிசம்பர் 19) கூடுவதற்கு முன்னதாக ராகுல் காந்தி, பிரியங்கா காந்தி தலைமையில் ‘இந்தியா’ கூட்டணி எம்.பிக்கள் நாடாளுமன்ற வளாகத்தில் பேரணியாக சென்று. உள்துறை அமைச்சர் அமித் ஷாவுக்கு எதிராகப் போராட்டம் நடத்தினர். அவர்களில் பெரும்பாலானோர் நீல நிற ஆடைகளை அணிந்திருந்தனர்.

மத்திய உள்துறை அமைச்சர் அமித்ஷா, அம்பேத்கர் குறித்த தன் கருத்துக்கு மன்னிப்பு கேட்க வேண்டும் மற்றும் ராஜினாமா செய்ய வேண்டும் என்று வலியுறுத்தி, நாடாளுமன்ற வளாகத்தில் உள்ள அம்பேத்கர் சிலையிலிருந்து மகர் துவார் வரை பேரணி நடத்தினர்.

மகர் துவார் என்பது, நாடாளுமன்றத்தின் நுழைவு வாயிலை குறிக்கிறது.

அதன் பின்னர், ராகுல் காந்தி நாடாளுமன்றத்துக்குள் நுழைய முயன்றார். அங்கு, பாஜக எம்.பிக்கள் சிலர் அங்கு வந்த நிலையில் தள்ளுமுள்ளு ஏற்பட்டது. இதில், பாஜக எம்.பி. பிரதாப் சாரங்கி காயமடைந்தார். அவரை சக்கர நாற்காலியில் அமர்த்தி, மருத்துவமனைக்குப் கொண்டு செல்லும் காணொளி ஏஎன்ஐ செய்தி முகமையின் ட்விட்டர் பக்கத்தில் வெளியாகியுள்ளது.

முன்னதாக, பிரதாப் சாரங்கி செய்தியாளர்களிடம், “ராகுல் காந்தி ஒரு எம்.பி.யை கடுமையாக இடித்துத் தள்ளினார். அந்த எம்.பி. என் மீது விழ, நான் கீழே விழுந்தேன்” என்று கூறியிருந்தார்.

மேலும், மத்திய அமைச்சர்கள் பிரகலாத் ஜோஷி, அர்ஜுன் ராம் மேக்வால், பியூஷ் கோயல் மற்றும் பிற பாஜக தலைவர்கள் பலரும் பிரதாப் சாரங்கியை ஆர்எம்எல் மருத்துவமனைக்குச் சென்று பார்த்தனர்.

“நாடாளுமன்ற நுழைவு வாயில் வழியாக நுழைய முயன்றேன். பாஜக எம்.பி. என்னைத் தடுக்க முயன்று, தள்ளினார். அது எங்களை பாதிக்காது. இது நாடாளுமன்றத்தின் நுழைவு வாயில், உள்ளே செல்ல எங்களுக்கு உரிமை உள்ளது. ஆனால், எங்களுக்கு உரிமை இல்லை என்பது போல், பாஜகவினர் எங்களை உள்ளே செல்ல விடாமல் தடுத்தனர்.” என்று ராகுல் காந்தி செய்தியாளர்களிடம் கூறினார்.

அமித் ஷா ராஜினாமா செய்ய வேண்டும் என்ற காங்கிரஸின் கோரிக்கை குறித்த கேள்விக்கு, “இது தான் முக்கிய பிரச்னை. அவர்கள் அரசியல் சாசனத்தை தாக்குகின்றனர். அம்பேத்கர் பற்றிய கருத்துக்களை அவமதிக்கிறார்கள்” என்று ராகுல் கூறினார்.

இதுகுறித்து காங்கிரஸ் தலைவர் மல்லிகார்ஜுன கார்கே மற்றும் ராகுல் காந்தி ஆகியோர் மாலையிலும் செய்தியாளர்களை சந்தித்து விளக்கம் அளித்தனர்.

ராகுல் காந்தி கூறுகையில், “நாடாளுமன்றக் கூட்டத் தொடர் தொடங்குவதற்கு சில நாட்களுக்கு முன், அமெரிக்காவில் அதானி மீதான வழக்கு விவகாரம் வந்தது. அதன் மீதான விவாதத்தை நிறுத்த பாஜக முயன்றது. அதானி விவகாரத்தில் விவாதம் நடக்கக் கூடாது, என்பதே பாஜகவின் அடிப்படை உத்தியாக இருந்தது.” என்றார்.

இப்போது அமித்ஷாவின் கருத்துகள் பிரச்னையை ஏற்படுத்தியதைத் தொடர்ந்து இந்த விவகாரத்தை பாஜக திசைத்திருப்ப முயற்சி செய்கிறது என்றும் விமர்சித்தார். பாஜக மற்றும் ஆர்எஸ்எஸ்ஸின் சிந்தனைகள் அரசியல் சாசனத்துக்கு எதிரானது, அம்பேத்கருக்கு எதிரானது என்று ஆரம்பத்திலிருந்தே நாங்கள் சொல்லி வருகிறோம் என்றும் அவர் கூறினார்.

“அவர்கள் அம்பேத்கரின் நினைவுகளையும் பங்களிப்புகளையும் அழிக்க விரும்புகிறார்கள். உள்துறை அமைச்சர் அமித் ஷா மன்னிப்பு கேட்டு ராஜினாமா செய்ய வேண்டும் என்று கூறினோம். இன்று மீண்டும் ஒரு புதிய பிரச்னையை ஆரம்பித்துள்ளனர். நாங்கள் அமைதியாக அம்பேத்கர் சிலையிலிருந்து பேரணி நடத்தி, நாடாளுமன்ற வளாகத்துக்குச் சென்று கொண்டிருந்தோம். பாஜக எம்.பிக்கள் எங்களை உள்ளே செல்ல விடவில்லை. அவர்கள் தொடர்ந்து அம்பேத்கரை அவமதிக்கிறார்கள் என்பதுதான் யதார்த்தம்.” என்றும் கூறினார்.

இதற்கிடையில், காங்கிரஸ் தலைவர் மல்லிகார்ஜுன கார்கேவும், தன்னை பாஜக எம்பிக்கள் தள்ளிவிட்டதாகக் குறிப்பிட்டு மக்களவை சபாநாயகருக்குக் கடிதம் எழுதியுள்ளார்.

நாடாளுமன்ற நுழைவு வாயில் அருகே இருந்தபோது பாஜக எம்.பி.க்கள் தன்னை தள்ளியதால் முழங்காலில் காயம் ஏற்பட்டதாக காங்கிரஸ் தலைவர் தனது கடிதத்தில் குறிப்பிட்டுள்ளார்.

இந்த சம்பவம் குறித்து சபாநாயகரிடம் விசாரணை நடத்த வேண்டும் என அவர் கோரிக்கை விடுத்துள்ளார்.