மேகாலயா காவல்துறையினர் சோனத்தை காஸிபூர் மாவட்ட நீதிமன்றத்தில் இரவில் ஆஜர்படுத்தி டிரான்சிட் ரிமாண்டில் காவலில் எடுத்தனர். இப்போது அவரை அவர்கள் ஷில்லாங்கிற்கு அழைத்துச் செல்கின்றனர்.

மே 23ஆம் தேதியிலிருந்து காணாமல் போயிருந்த ராஜா, ஜூன் 2ஆம் தேதி மேகாலயாவின் கிழக்கு காசி மலையில் உள்ள வீசடாங் அருவி அருகே 150 அடி ஆழ பள்ளத்தில் கண்டெடுக்கப்பட்டார்

இந்த கேள்விக்கு பதிலளித்த காவல் கண்காணிப்பாளர் விவேக் சியெம் சொல்கிறார், “ஆம் அப்படித்தான் தெரிகிறது. மேகாலயா காவல்துறையின் இரண்டு குழுக்கள் மத்தியப் பிரதேசத்தில் உள்ளன, மற்றொரு குழு சோனம்-ஐ கைது செய்ய உத்தரப் பிரதேசம் சென்றுள்ளது.”

மேகாலயா காவல்துறை தன்னை தவறாக வழிநடத்தியதாக குற்றம் சாட்டும் சோனமின் தந்தை தேவி சிங் தனது மகள் அப்பாவி என்கிறார்.

இதற்கிடையில், இந்த வழக்கில் ‘வேறு 3 பேர் கைது செய்யப்பட்டப் போது’ சோனம் ‘தானாகவே முன்வந்து சரணடைந்ததாகவும், இதுவே ‘அனைத்தையும் காட்டுவதாகவும்’ காவல்துறையினர் சொல்கின்றனர்.

இந்த விவகாரத்தில் சிபிஐ விசாரணை வேண்டும் என சோனமின் குடும்பத்தினர் வலியுறுத்துகின்றனர்.

சோனம் ரகுவன்ஷியை தேடும் பணி கடந்த 17 நாட்களாக நடைபெற்று வந்தது. ராஜாவின் உடல் அருகே மேகாலயா காவல்துறையினர் சிவப்பு மற்றும் கருப்பு நிற ரெயின் கோட் ஒன்றை கண்டுபிடித்தனர். இந்த ரெயின் கோட் மற்றும் ஹோட்டலுக்கு வெளியே இருந்த சிசிடிவி காட்சி தவிர சோனம் பற்றிய எந்த தகவலும் இருக்கவில்லை.

சோனமின் தந்தை தேவி சிங் சொல்கிறார், “ஜூன் 8ஆம் தேதி இரவில், சோனமின் சகோதரர் கோவிந்த் சிங்கிற்கு உத்தரப் பிரதேசத்திலிருந்து ஒரு தொலைபேசி அழைப்பு வந்தது. காஸிபூரில் ஒரு தாபாவிலிருந்து சோனம் அழைத்திருந்தாள். அதன் பின்னர் நாங்கள் காவல்துறையினரிடம் தெரிவித்தோம். காவல்துறையினர் தாபாவிற்கு வந்திருந்தனர். அது இரண்டு மணி, எனது மகள் கோவிந்திடம் மட்டும்தான் பேசியிருந்தாள்.”

காசி தாபா காஸிபூரில் நந்த்கஞ்ச் காவல் நிலையத்திற்குட்பட்ட தேசிய நெடுஞ்சாலையில் அமைந்துள்ளது. காஸிபூர் காவல்துறையினரின் தகவல்படி அவர்கள் சோனமை காவலில் எடுத்துள்ளனர்.

காஸிபூர் காவல் கண்காணிப்பாளர் இறைராஜா செய்தியாளர்களிடம், “சோனம் அழைத்த பின்னர் சோனமின் குடும்பத்தினர் மத்தியப் பிரதேச காவல்துறையிடம் தெரிவித்தனர். அதன் பின்னர், மத்தியப் பிரதேச காவல்துறையினர் காஸிபூர் போலீஸாரை தொடர்பு கொண்டனர், பின்னர் சோனம் தாபாவிலிருந்து மீட்டு அழைத்து வரப்பட்டார்,” என தெரிவித்தார்.

உள்ளூர் காவல் நிலையத்திற்கு தகவல் அளித்ததாக காசி தாபாவை நடத்தும் சஹில் யாதவ் சொல்கிறார்.

ஊடகங்களுக்கு பேட்டியளித்த சஹில் யாதவ், “தனது குடும்பத்தை அழைக்க சோனம் எனது தொலைபேசியை கேட்டார். அவரது குடும்பத்தினருடன் தொலைபேசியில் பேசும்போது அவர் அழ ஆரம்பித்தார். சிறிது நேரத்திற்கு பிறகு அவரது சகோதரர் என்னை அழைத்து உள்ளூர் காவல் நிலையத்திற்கு தகவல் அளிக்கும்படி கூறினார். காவல்துறையினர் இங்கு வந்து அவரை இரவில் சுமார் 2:30 மணியளவில் அழைத்துச் சென்றனர்,” என்று தெரிவித்தார்,

எப்படி இங்கு வந்து சேர்ந்தார் என சோனமிடம் கேட்டபோது, சோனம் எந்த பதிலும் தரவில்லை என சஹில் சொல்கிறார்.

“காஸிபூர் காவல்துறையினர் சோனம் ரகுவன்ஷியை மீட்டிருப்பதாக ஷில்லாங் காவல்துறையினர் மூலம் நேற்றிரவு தகவல் கிடைத்தது. ஷில்லாங் காவல்துறையினர் இந்தூரை தொடர்பு கொண்டு குற்றவாளிகள் என கருதப்பட்ட 3 பேர் பற்றிய தகவல் தெரிவித்தனர். இந்தூர் காவல்துறையும், ஷில்லாங் காவல்துறையும் இணைந்து ஒரு நடவடிக்கையை மேற்கொண்டு மூவரையும் கைது செய்தனர்.” என இந்தூர் துணை காவல் ஆணையர் (குற்றங்கள்) ராஜேஷ் டாண்டோடியா பிபிசியிடம் தெரிவித்தார்.

காவலில் எடுக்கப்பட்ட நபர்களிடம் தற்போது ஷில்லாங் காவல்துறை விசாரணை நடத்திக்கொண்டிருக்கிறது.

இதற்கிடையில் “இந்தூர் நபரின் கொலை தொடர்பாக அவரது மனைவி உட்பட 4 பேர் கைது செய்யப்பட்டுள்ளனர். தேனிலவின் போது மனைவி கொலைத் திட்டத்தை தீட்டி, அதை செயல்படுத்த மற்றவர்களின் உதவியை எடுத்துக்கொண்டார்,” என மேகாலயா டிஜிபி ஐ நான்கிராங் பிடிஐ செய்தி நிறுவனத்திடம் தெரிவித்தார்.