2

‘குளோபல் ஸ்டார் ‘ ராம் சரண் நடிக்கும் ‘கேம் சேஞ்சர்’ எனும் திரைப்படத்தின் கிளர்வோட்டம் வெளியாகும் திகதி அதிகாரப்பூர்வமாக அறிவிக்கப்பட்டிருக்கிறது.

பிரமாண்ட இயக்குநர் ஷங்கர் இயக்கத்தில் உருவாகி வரும் ‘கேம் சேஞ்சர்’ எனும் திரைப்படத்தில் ராம் சரண், கியாரா அத்வானி, எஸ். ஜே. சூர்யா, அஞ்சலி, பிரகாஷ்ராஜ், நாசர், சமுத்திரக்கனி, ஜெயராம், நவீன் சந்திரா, முரளி சர்மா, சுனில், ஸ்ரீகாந்த் உள்ளிட்ட பலர் நடித்திருக்கிறார்கள்.

திருநாவுக்கரசு ஒளிப்பதிவு செய்திருக்கும் இந்த திரைப்படத்திற்கு எஸ். தமன் இசையமைத்திருக்கிறார்.

இந்த திரைப்படத்தை ஸ்ரீ வெங்கடேஸ்வரா கிரியேஷன்ஸ் நிறுவனம் சார்பில் தயாரிப்பாளர்கள் தில் ராஜு மற்றும் சிரிஷ் ஆகியோர் இணைந்து தயாரித்திருக்கிறார்கள்.

இந்தியா முழுதும் பெரும் எதிர்பார்ப்பில் இருக்கும் இந்த திரைப்படம் தமிழ், தெலுங்கு, மலையாளம், கன்னடம், இந்தி ஆகிய மொழிகளில் 2025 ஆம் ஆண்டு ஜனவரி மாதம் 10 – ஆம் திகதியன்று பட மாளிகையில் வெளியாகிறது.

இந்நிலையில் இப்படத்தின் கிளர்வோட்டம் எதிர்வரும் ஒன்பதாம் திகதியன்று இணையத்தில் வெளியாகும் என படக் குழுவினர் பிரத்யேக புகைப்படத்துடன் உற்சாகமாக அறிவித்துள்ளார்கள்.

இதனிடையே பிரம்மாண்ட இயக்குநர் ஷங்கர் இயக்கத்தில் வெளியான உலக நாயகன் கமலஹாசனின் ‘இந்தியன் 2 ‘ திரைப்படம் வணிக ரீதியாக எதிர்பார்த்து வெற்றியை பெறாததால்  அவர் இயக்கத்தில் உருவாகி இருக்கும் இந்த ‘கேம் சேஞ்சர்’ எனும் திரைப்படம் வெளியாகி வெற்றி பெற்றால் தான் அவருடைய கலையுலக பயணம் காப்பாற்றப்படும் என திரையுலக வணிகர்கள் தெரிவித்திருக்கிறார்கள் என்பது குறிப்பிடத்தக்கது.