தற்போது வரை, இஸ்ரேல் பிரதமர் பெஞ்சமின் நெதன்யாகு இந்த ஒப்பந்தத்திற்கு ‘கொள்கையளவில்’ மட்டுமே ஒப்புக் கொண்டதாகக் கூறப்படுகிறது. லெபனான் நாடாளுமன்ற துணை சபாநாயகர் எலியாஸ் பௌ சாப், ராய்ட்டர்ஸ் செய்தி முகமையிடம், “நெதன்யாகு தனது மனதை மாற்றிக் கொண்டால் ஒழிய, போர் நிறுத்தத்திற்கு வேறு கடுமையான தடைகள் ஏதும் இல்லை” என்று கூறியுள்ளார்.

திங்கட்கிழமை (25-11-2024) மாலை, இது குறித்துப் பேசிய பிரான்ஸ் அரசு, ‘இந்தப் பேச்சுவார்த்தைகளில் கணிசமான முன்னேற்றங்கள் ஏற்பட்டுள்ளன என்றும், இஸ்ரேலும் ஹெஸ்பொலாவும், இந்த வாய்ப்பை விரைவாக பயன்படுத்திக்கொள்ள வேண்டும்’ என்றும் வலியுறுத்தியது.

அமெரிக்க தேசிய பாதுகாப்பு கவுன்சிலின் செய்தித் தொடர்பாளர் ஜான் கிர்பி, “அந்த ஒப்பந்தத்தை நிறைவேற்றுவதற்கான முழுமையான சூழல் அமையவில்லை என்றாலும் கூட, ஏறக்குறைய அதை நெருங்கிவிட்டோம்” என்று கூறினார்.

ஆனால் இஸ்ரேலின் (தீவிர வலதுசாரி) தேசிய பாதுகாப்பு அமைச்சர் இட்டாமர் பென்-க்விர் போர் நிறுத்தத்திற்கு எதிராக பேசியுள்ளார்.

“முழுமையான வெற்றி கிடைக்கும் வரை இஸ்ரேல் போரைத் தொடர வேண்டும் என்றும், இந்த ஒப்பந்தத்தை தடுத்து நிறுத்துவதற்கு இன்னும் காலம் அவகாசம் உள்ளது” என்றும் தெரிவித்துள்ளார்.

லெபனான் அதிகாரிகள் எந்த போர் நிறுத்த உடன்பாடும் ஐ.நா. பாதுகாப்புக் குழு தீர்மானம் 1701-இன் விதிகளுக்கு உட்பட்டதாக இருக்க வேண்டும் என்று கூறியுள்ளனர்.

லெபனானுக்கும் இஸ்ரேலுக்கும் இடையே உள்ள அதிகாரப்பூர்வமற்ற எல்லையான ‘ப்ளூ லைன்’ (Blue line) மற்றும் இஸ்ரேலுடனான எல்லையில் இருந்து 30 கி.மீ (18 மைல்கள்) தூரத்தில் உள்ள லிட்டனி நதிக்கும் இடையே உள்ள பகுதிகளில் இருந்து ஹெஸ்பொலா குழுவினர் மற்றும் அதன் ஆயுதங்கள் திரும்பப் பெறப்பட வேண்டும் என்று தீர்மானம் கூறுகிறது.

இந்த விதிமுறை ஒருபோதும் முழுமையாக மதிக்கப்படவில்லை என்று இஸ்ரேல் கூறுகிறது. அதே நேரத்தில், லெபனான் வான் பரப்பில் இஸ்ரேல் ராணுவ விமானங்கள் செல்வது உட்பட இஸ்ரேலின் விதிமீறல்களை லெபனான் சுட்டிக்காட்டுகிறது.