நள்ளிரவில் நடத்தப்பட்ட வான் தாக்குதலில் ஹெஸ்பொலா அமைப்பை சேர்ந்த 15 பேர் கொல்லப்பட்டதாக இஸ்ரேல் ராணுவம் தெவித்துள்ளது.

மத்திய பெய்ரூட்டில் நடத்திய தாக்குதல் தவிர்த்து தெற்கு பெய்ரூட்டில் மேலும் ஐந்து வான்வழித் தாக்குதல்களையும் இஸ்ரேல் நடத்தியுள்ளது.

தாக்குதலுக்கு உள்ளான பெய்ரூட்டின் பஷோரா பகுதியில் உள்ள அடுக்குமாடி கட்டடத்தில் ஹெஸ்பொலாவுக்கு தொடர்புடைய மருத்துவ முகாம் செயல்பட்டு வந்ததாக இஸ்ரேல் ராணுவம் தெரிவிக்கிறது.

இஸ்ரேல் மற்றும் ஆயுதக்குழுவான ஹெஸ்பொலாவுக்கும் இடையேயான தற்போதைய மோதல், கடந்த நாற்பது ஆண்டுகளாக வேரூன்றியுள்ள நன்கு வரையறுக்கப்பட்ட இரு கருத்துகளின் அடிப்படையில் நடைபெறுகிறது.

லெபனானிலிருந்து ஹெஸ்பொலா தங்கள் நாட்டுக்கு விடுக்கும் அச்சுறுத்தலை அழிக்க உறுதிகொண்டுள்ளதாக இஸ்ரேல் தெரிவித்துள்ளது. அதேசமயம், இஸ்ரேலை அழிக்கும் முயற்சியாக, இஸ்ரேலிய நிலைகளின் மீது ஹெஸ்பொலா குறிவைத்துவருகிறது.

கடந்த 11 மாதங்களாக இருபுறமும் நடைபெறும் எல்லை கடந்த தாக்குதல்கள் பதற்றத்தை மேலும் அதிகரித்தன.

தற்போது 2006-ஆம் ஆண்டுக்குப் பிறகு லெபனானில் இஸ்ரேலின் படையெடுப்பு நிகழ்ந்து வருகிறது.

இவ்வளவுக்கும் மத்தியில் லெபனான் ராணுவம் எங்குள்ளது, இத்தாக்குதல் நிகழாமல் இருக்க ராணுவம் என்ன செய்தது என பலரும் கேள்வி எழுப்புகின்றனர்.