“அருங்காட்சியகமாக மாற்றப்பட்டுள்ள அந்த வீடு பாசிசத்தின் அடையாளமாக இருப்பதால் வீட்டை கொளுத்த வேண்டும் என்று நினைத்ததாக,” போராட்டத்தில் ஈடுபட்ட ஒருவர் பிபிசியிடம் தெரிவித்தார்.

பாகுபாடுக்கு எதிரான அமைப்பின் ஒருங்கிணைப்பாளர் ஹஸ்னத் அப்துல்லா மற்றும் வேறு சிலர் இதே கருத்தை தங்கள் சமூக ஊடக பக்கங்களில் தெரிவித்திருந்தனர். “இந்த வீட்டை காப்பாற்ற வேண்டிய அவசியமில்லை. இது ஷேக் ஹசீனா அரசின் கட்டுப்பாட்டில் இருந்த அருங்காட்சியகம், மாணவர்களான நாங்கள் புரட்சியின் மூலம் புதிய அரசை அமைத்திருப்பதால், இதனை அடித்து நொறுக்குவதில் தவறில்லை” என்று ஒருவர் பதிவிட்டிருந்தார்.

ஷேக் முஜிபுர் ரஹ்மான் வங்கதேசத்தின் நிறுவனர் என்று அழைக்கப்படுபவர். பாகிஸ்தானிடமிருந்து பிரிந்து 1971ம் ஆண்டு வங்கதேசம் உருவானது. முஜிபுர் ரஹ்மான் 1975ம் ஆண்டு கொல்லப்பட்டார்.

வங்கதேசத்தில் அரசியல் கொலைகளும் பெரிய அளவிலான மனித உரிமை மீறல்களும் ஷேக் ஹசீனாவால் நிகழ்த்தப்பட்டது என்று அவரது எதிர்ப்பாளர்கள் அவர் மீது குற்றம் சாட்டுகின்றனர்.

இடைக்கால அரசின் உத்தரவின் அடிப்படையில், இந்த தாக்குதல் நடைபெற்றதாக கூறப்பட்டாலும், இது குறித்து எந்த தகவலும் இல்லை என்று டாக்கா நகர் காவல் செய்தித் தொடர்பாளர் தலிபுர் ரஹ்மான் தெரிவித்தார்.

போராட்டத்தில் ஈடுபட்ட தாரிகுல் இஸ்லாம் என்ற மாணவர், முதலில் அவர்கள் வீட்டுக்குள் நுழையும் போது, காவல்துறையினர் அவர்களை தடுத்ததாகவும், ஆனால் அவர்கள் வீட்டை இடித்துக் கொண்டிருந்த போது, காவல்துறையினர் எந்த நடவடிக்கையும் எடுக்கவில்லை எனவும் தெரிவித்தார்.