வாக்காளர் பட்டியலில் தனது பெயரைச் சேர்க்க, ஒருவர் தேர்தல் ஆணையத்தில் படிவம் எண் 6ஐ நிரப்பி விண்ணப்பிக்க வேண்டும்.

முதல் முறையாக வாக்காளராக தன்னைப் பதிவு செய்பவர்கள், இந்தப் படிவத்தை நிரப்ப வேண்டும். இந்தப் படிவத்தில், நபரின் பெயர், வயது, பிறந்த தேதி, பாலினம், முகவரி, குடும்பத்தில் ஏற்கெனவே பதிவு செய்யப்பட்ட வாக்காளர்களின் விவரங்கள் மற்றும் பாஸ்போர்ட் அளவு புகைப்படம் ஆகியவை தேவை.

இந்தப் படிவத்தை வாக்காளர் உதவி மைய செயலியில் ஆன்லைனில் நிரப்பலாம் அல்லது BLO அல்லது மாவட்ட தேர்தல் அலுவலகத்தில் சமர்ப்பிக்கலாம்.

டிஜிட்டல் வாக்காளர் பட்டியல் தரவை வழங்குமாறு தேர்தல் ஆணையத்திடம் காங்கிரஸ் தலைவர் ராகுல் காந்தி கோரிக்கை விடுத்துள்ளார்.

இதற்கு முன்பும் இதேபோன்ற கோரிக்கையை காங்கிரஸ் தலைவரும் அப்போதைய மத்தியப் பிரதேச முதலமைச்சருமான கமல்நாத் 2019ஆம் ஆண்டு தேர்தல் ஆணையத்திடம் முன்வைத்தார். வாக்காளர் பட்டியலை டிஜிட்டல் முறையில் பகுப்பாய்வு செய்ய, இயந்திரம் படிக்கக்கூடிய வடிவத்தில் முழுமையான வாக்காளர் பட்டியல் கொடுக்க வேண்டும் என்று அவர் தேர்தல் ஆணையத்திடம் கோரியிருந்தார்.

கமல்நாத்தின் கோரிக்கையை மறுத்த தேர்தல் ஆணையம், இயந்திரம் படிக்கக்கூடிய வாக்காளர் பட்டியல் வாக்காளர்களின் தனியுரிமைக்கு ஆபத்தை விளைவிக்கும் என்று தெரிவித்தது.

தேர்தல் ஆணையத்தின் முடிவை எதிர்த்து உச்ச நீதிமன்றத்தில் கமல்நாத் வழக்குத் தொடர்ந்தார். ஆனால், உச்ச நீதிமன்றம் கமல்நாத்தின் வழக்கை நிராகரித்துவிட்டது. தனியுரிமை மற்றும் தரவு பாதுகாப்பு அடிப்படையில் தேர்தல் ஆணையத்தின் கொள்கை சரியானது என்று நீதிமன்றம் நம்பியது.

“வாக்காளர் பட்டியலை PDF வடிவத்தில் வழங்குவது வாக்காளர்களின் தனியுரிமையை மீறவில்லை என்றால், அதே பட்டியலை டிஜிட்டல் வடிவத்தில் வழங்குவது எப்படி அதை மீறியதாக இருக்கும்? இது எனக்குப் புரியவில்லை” என்று ஜனநாயக சீர்திருத்த சங்கத்தின் (ADR) இணை நிறுவனர் ஜக்தீப் சோக்கர் கேள்வி எழுப்புகிறார்.

இதில் தனியுரிமை பற்றிய எந்த கேள்வியும் இல்லை என்றும், தேர்தல் ஆணையம் டிஜிட்டல் வடிவத்தில் வாக்காளர் பட்டியலைக் கொடுக்க விரும்பவில்லை” என்றும் அவர் கூறுகிறார்.