டெல்லி 78 ரன்களுக்கு 2 விக்கெட்டுகளை இழந்தநிலையில் விராட் கோலி களமிறங்கினார். அவர் களத்துக்கு வந்தது முதலே வேகப்பந்துவீச்சுக்குத் திணறினார். குணால் யாதவ் வீசிய பந்துவீச்சில் ஆஃப்சைடு விலகிச் சென்ற 10 பந்துகளில் 2 பந்துகள் கோலியை பீட்டன் செய்தன.

அடுத்ததாக வேகப்பந்துவீச்சாளர் ஹிமான்சு சங்வான்பந்துவீசினார். ஹிமான்சு சங்வான் பந்துவீச்சில் முதல் பந்தில் கோலி பவுண்டரி விளாசினார்.

அடுத்த பந்தில் அதிர்ச்சி காத்திருந்தது. ஹிமான்சு சிறிது லென்த்தை இழுத்துப் பந்துவீசினார், இதை ஃபிரன்ட் ஃபுட்டில் கோலி விளையாட முயன்றபோது, பந்து இன்ஸ்விங் ஆகி, கோலியின் பேட்டுக்கும், கால்காப்புக்கும் இடையே ஸ்டெம்பில் பட்டு போல்டானது.

பந்து ஸ்டெம்பில் பட்ட வேக்தில் ஆஃப் ஸ்டெம்ப் “கார்ட்வீலிங்” பல்டி அடித்து தெறித்து விழுந்தது. விராட் கோலி 15 பந்துகளைச் சந்தித்து 6 ரன்களில் க்ளீன் போல்டாகி ஆட்டமிழந்து வெளியேறினார்.

விராட் கோலியின் பேட்டிங்கை பார்க்க குவிந்த ரசிகர்கள் சொற்ப ரன்னில் ஆட்டமிழந்ததும் அடுத்த சிறிது நேரத்திலேயே மைதானத்தில் இருந்து வெளியேறினர். காலையில் மனிதத் தலைகள் நிரம்பிக் காட்சியளித்த மைதானம், சிறிது நேரத்திலேயே இருக்கைகள் மட்டுமே இருக்கும் மைதானமாக மாறியது.

கடந்த 5 ஆண்டுகளாக விராட் கோலியின் மோசமான ஃபார்ம் தெரிந்தே அவர் அணியில் நீட்டிக்கப்பட்டுள்ளதாக விமர்சனங்கள் எழுந்தன.

சாம்பியன்ஸ் கோப்பைக்கு முன்பாக ரஞ்சி கோப்பைத் தொடரில் சீனியர் வீரர்கள் விளையாடினால் ஃபார்முக்கு வருவார்கள் என்ற நம்பிக்கையில்தான் பிசிசிஐ ரஞ்சி கோப்பையில் விளையாட உத்தரவிட்டது.

ஆனால், கோலி, ரோஹித் சர்மா, ரிஷப் பந்த் போன்றோர் தொடர்ந்து பேட்டிங்கில் சொதப்பும்போது எந்த அடிப்படையில் பிசிசிஐ சாம்பியன்ஸ் டிராபிக்கான அணியில் சேர்க்கப் போகிறது என்று கிரிக்கெட் ரசிகர்கள் சமூக ஊடகங்களி விமர்சித்து வருகின்றனர்.

ஃபார்மில் இல்லாத கோலி இந்திய அணியில் சேர்க்கப்பட வேண்டுமா என ரசிகர்கள் மத்தியில் எழுந்துள்ள விவாதம் குறித்து சென்னை எம்ஆர்எஃப் அணியின் பயிற்சியாளர் எட்வர்ட் கென்னடி பிபிசி தமிழிடம் பேசுகையில், “இதுபோன்ற விவாதங்கள் சீனியர் வீரர்கள் ஃபார்மில் இல்லாதபோது எழுவது இயல்புதான். கிரிக்கெட்டில் ஒரு வீரர் ஃபார்ம் இழப்பதும், மீட்பதும் இயல்பானது. இதை வைத்து கோலி போன்ற பெரிய வீரரை அணியில் இருந்து நீக்கக் கோருவது அபத்தமானது,” என்று தெரிவித்தார்.

மேலும், “சரியான தருணம் வரும்போது கோலி நிச்சயம் விளையாடுவார், சாம்பியன்ஸ் டிராபி போன்ற பெரிய போட்டித் தொடருக்கு கோலி, ரோஹித் இருவரும் கண்டிப்பாக தேவை. இருவரின் பெயரைக் கேட்டாலே எதிரணிக்கு ஒருவிதமான பயம் இருக்கும்போது இருவரையும் நீக்குவது தோல்வியை ஒப்புக்கொள்வது போலாகும்” எனத் தெரிவித்தார்.

பாகிஸ்தான் முன்னாள் வேகப்பந்துவீச்சாளர் ஷோயிப் அக்தர் தனது யூட்ப் பக்கத்தில் கோலி குறித்து சமீபத்தில் கூறுகையில், “கோலியின் ஃபார்ம் தற்போது பெரிதாகப் பேசப்பட்டு வருகிறது. மோசமான ஃபார்மில் இருக்கிறார் எனக் கூறி கோலி மீது விமர்சனங்கள் வருகின்றன. கோலி உலகளவில் சிறந்த பேட்டர் என்பதை யாரும் மறுக்க முடியாது. கோலியின் இழந்த ஃபார்மை மீட்க வேண்டுமா, பாகிஸ்தானுக்கு எதிராக ஒரு போட்டியில் ஆடினால் அவர் இழந்த ஃபார்மை மீட்டுவிடுவார்,” எனத் தெரிவித்துள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு