வங்கதேசத்துக்கான முன்னாள் இந்தியத் தூதர் பினாக் ரஞ்சன் சக்கிரவர்த்தி, இந்தியா தனது நீண்டகால நண்பர் ஷேக் ஹசீனாவை எந்த சூழ்நிலையிலும் எந்த ஆபத்திலும் சிக்க வைக்காது என்று உறுதியாக நம்புகிறார்.

“‘ஹசீனாவின் எதிர்காலம் என்ன?’ என்று நீங்கள் கேட்டால், அவர் எங்கேயும் செல்ல மாட்டார் என்பதுதான் என் நம்பிக்கை,” என்று பினாக் ரஞ்சன் பிபிசி வங்காள சேவையிடம் தெரிவித்தார்.

மேலும், “அவரை வேறு இடத்துக்கு அனுப்புவதில் சிக்கல்கள் இருக்கலாம். அவர் இந்தியாவில் இருக்கிறார், இங்கேயே இருப்பார். அவர் இதற்கு முன்பும் இங்கு இருந்திருக்கிறார். ஹசீனா 1975 முதல் 1981 வரை இங்கு இருந்தார்” என்றார்.

எந்தவொரு வெளிநாட்டு அரசியல்வாதியும் எந்தவொரு காரணத்துக்காகவும் இந்தியாவுக்கு வந்தால், அவரை வலுக்கட்டாயமாக தனது நாட்டுக்கு திருப்பி அனுப்புவது இந்தியாவின் கொள்கையாக இருந்ததில்லை என்பதை அவர் நினைவுபடுத்துகிறார்.

தொடர்ந்து பேசிய முன்னாள் தூதர் பினாக் ரஞ்சன், “எந்தவொரு அரசியல்வாதியையும் வலுக்கட்டாயமாக திருப்பி அனுப்புவது இந்தியாவின் கொள்கையாக இருந்ததில்லை. தலாய் லாமா கூட இன்னும் இந்தியாவில் இருக்கிறார்” என்றும் கூறினார்.

“இங்கு அடைக்கலம் தேடி வருபவர்களின் விஷயத்தில் ஒரு கலாசார அல்லது கொள்கைப் பிரச்னை இருப்பதாக நாங்கள் நம்புகிறோம். இந்தியா, அவர்களை வேறு எங்காவது வலுக்கட்டாயமாக திருப்பி அனுப்பாது. ஷேக் ஹசீனாவின் விஷயத்திலும் இதுதான் நிலைமை என்று நான் நினைக்கிறேன்.”

நீதிமன்ற விசாரணையை எதிர்கொள்ள, ஷேக் ஹசீனாவை வங்கதேசத்துக்கு திருப்பி அனுப்ப வேண்டும் என்ற வங்கதேசத்தின் கோரிக்கைக்கு எந்தவொரு நடைமுறை சாத்தியமும் இல்லை என்று முன்னாள் தூதர் சக்கிரவர்த்தி கருதுகிறார்.

பினாக் ரஞ்சன் சக்கிரவர்த்தியின் கூற்றுப்படி, “இந்த வழக்கில் ஹசீனாவை வங்கதேசத்துக்கு அனுப்ப வேண்டும் என்ற கோரிக்கை அரசியல் ரீதியாக உள்நோக்கம் கொண்டதாகத் தோன்றினால், அத்தகைய கோரிக்கையை நிராகரிக்க, இரு நாடுகளுக்கிடையேயான ‘ஒப்படைப்பு ஒப்பந்தத்திலேயே’ ஒரு விதி உள்ளது, மேலும் அந்த விதியை நாடுவதன் மூலம் இந்தியா வங்கதேசத்தின் கோரிக்கையை நிராகரிக்க முடியும்.”

ஷேக் ஹசீனாவின் மகள் சைமா வாஜெத்தின் அலுவலகமும் டெல்லியில்தான் உள்ளது. அவர் உலக சுகாதார அமைப்பில் (WHO) தென்கிழக்கு ஆசியாவுக்கான பிராந்திய இயக்குநராகப் பணியாற்றுகிறார்.

தாயும் மகளும் எப்போது விரும்பினாலும், தவறாமல் சந்தித்துக் கொள்கிறார்கள்.

ஆனால், அவர்கள் ஒரே வீட்டில் வாழ்வது சாத்தியமில்லை. இதற்கான காரணத்தைப் புரிந்துகொள்வதும் கடினம் அல்ல.

சைமா வாஜெத், ஐ.நா சபையில் ஒரு முக்கியப் பதவி வகிக்கிறார். மறுபுறம், இந்தியாவின் அரசியல் முடிவின் காரணமாக ஷேக் ஹசீனா இங்கு விருந்தினராக தங்கியுள்ளார்.

இந்தியா தனது அரசியல் விருந்தினரை ஐ.நா. பிரதிநிதியுடன் சேர்த்து தனது நாட்டில் வைத்திருக்க முடியாது என்பதைப் புரிந்துகொள்வது கடினம் அல்ல.

இருப்பினும், டெல்லியில் உள்ள மூத்த ராஜ்ஜீய பத்திரிகையாளர் நயனிமா பாசு, இந்தியாவின் உயர்நிலை அரசியல் தலைவர்கள் அவ்வப்போது ஷேக் ஹசீனாவை சந்திப்பார்கள் என்றார்.

“இந்த ஏழு மாதங்களில் ஷேக் ஹசீனா சமூக ஊடகங்களில் உரையாற்ற பலமுறை அனுமதிக்கப்பட்டிருப்பதை நாங்கள் கண்டிருக்கிறோம். அவர் இங்கே அமைதியாக அமர்ந்திருக்கிறார் என்று அர்த்தமில்லை” என நயனிமா பிபிசி வங்காள சேவையிடம் கூறுகிறார்.

மேலும் இந்த விவகாரம் குறித்து இந்திய அரசு எந்த கருத்தும் தெரிவிக்கவில்லை என்றும் அவர் கூறினார்.

ஆனால், அரசாங்கம் ஷேக் ஹசீனாவை சமூக ஊடகங்களைப் பயன்படுத்த அனுமதித்திருப்பதைக் பார்க்கிறோம். அது எக்ஸ் வலைதளமாக இருக்கட்டும் அல்லது ஃபேஸ்புக் ஆகட்டும்.

இவற்றின் மூலம், அவர் வங்கதேச குடிமக்களிடையே, குறிப்பாக அவாமி லீக் கட்சியின் ஆதரவாளர்களிடம் உரையாற்ற அனுமதிக்கப்பட்டுள்ளார்.

சமூக ஊடகங்களைப் பயன்படுத்தினாலும், ஹசீனாவால் தனக்குத் தெரிந்தவர்களுடன் இயல்பாகப் பழக முடியவில்லை.

“அவர் இங்கு பலத்த பாதுகாப்பில் வைக்கப்பட்டுள்ளார் என்பது எங்களுக்குத் தெரியும். மிகச் சிலரே அவரைச் சந்திக்க அனுமதிக்கப்படுகிறார்கள்” என்று நயனிமா பாசு கூறுகிறார்.

தொடர்ந்து பேசிய அவர், “பிரதமர் நரேந்திர மோதி மற்றும் தேசிய பாதுகாப்பு ஆலோசகர் அஜித் தோவல் ஆகிய இருவர் மட்டுமே அவரைச் சந்தித்ததாகக் கேள்விப்பட்டுள்ளோம், மேலும் எங்கள் வட்டாரங்களும் இதை உறுதிப்படுத்தியுள்ளன”என்றார்.